Cakacaka 7 - AI VOLA TABU

Sa vosa ko Sitifeni vei ira era sa kaya ni ka vosavakacacataka na Kalou ko koya. Sa tukuna na kedrai tukutuku na nodra qase, 1-50. Sa qai vunauci ira ni ra sa talaidredre vua na Kalou, ka vakacacani ira na nona parofita, ka vakamatei Jisu Karisito, 51-53. Era sa qai cudru vakalevu, ka vakamatei koya e na vatu, 54-60.

¹ SA qai kaya na bete levu, Sa vakakoya na veika o qo, se segai?

² Sa qai kaya ko koya, Oi kemudou na tamata, a matavei-wekani, kei na qase, dou vakarorogo mai: A Kalou vakaiukuuku sa rairai eliu vua na noda qase ko Eparaama, ni sa tiko mai Mesopotemia, sa tiko emuri mai Karana,

³ a sa kaya vua, Lako tani e na nomu vanua, ka maivei ira na wekamu, ka lako ki na vanua kaʼu na vakatakila vei iko.

⁴ Sa qai lako tani ko koya mai na vanua ko Kalitea, a sa laʼki tiko mai Karana: ia sa tuberi koya tani maikina ko koya, ni sa mate oti ko tamana, a sa vakatikora e na vanua o qo, dou sa qai tiko kina.

⁵ A sa sega ni solia kina vua ko koya e dua na yasana me taukena, e sega me butuka e na yavana: a sa yalata ga me solia vua me taukena, vei ira talega na nona kawa e muri koya, ni sa sega kina na luvena.

⁶ A sa kaya vakaoqo na Kalou: Ni ra na tiko vulagi na nona kawa e na vanua sa sega ni nodra; ka ra na vakabobulataki ira, ka vakararawataki ira, ka va na drau na yabaki.

⁷ A sa kaya na Kalou, Na matanitu era na qarava, kaʼu na lewa; a sa oti, era na qai lako tani mai, ka qaravi au e na yasana o qo.

⁸ A sa solia na veiyalayalati ni veicili vei koya; a sa tama i Aisake ko koya, a sa bogi walu sa qai ciliva ko koya; a sa tama i Jekope ko Aisake; a sa tamadra na qase e tinikarua ko Jekope.

⁹ Ia ni ratou sa vuvutaki Josefa ko iratou na qase o qori, eratou sa volitaka ki Ijipita: a sa tiko vata kaya ko na Kalou,

¹⁰ a sa vakabulai koya mai na nona rarawa kecega, ka solia vua me vinaka ka vuku e na mata i Fero na tui Ijipita; a sa lesia ko koya me turaga me lewai Ijipita kei ira kecega na lewe ni nona vale.

¹¹ Sa qai yaco na dausiga kei na rarawa levu ki na vanua taucoko ko Ijipita kei Kenani, a ratou sa sega ni kune kakana ko iratou na noda qase.

¹² Ia ni sa rogoca ko Jekope ni sa tu ga na sila mai Ijipita, sa qai talai iratou vakadua kina na noda qase.

¹³ Ia e na kena vakarua sa vakatakilai koya ko Josefa vei iratou na tuakana: a sa vakatakilai na mataqali i Josefa kivei Fero.

¹⁴ Sa qai talaki ko Josefa, me lakovi ko Jekope na tamana, kei ira kece talega na nona mataqali, era sa lewe vitusagavulu ka lima.

¹⁵ A sa lako sobu ki Ijipita, ko Jekope, a sa mate, o koya kei iratou na noda qase,

¹⁶ a ratou sa kau ki Sikemi, a ratou sa vakotori e nai bulubulu ka volia ko Eparaama e na tiki ni siliva e so vei ira na luve i Emori na tama i Sikemi.

¹⁷ Ia ni sa voleka ni yaco mai na gauna ni vosa ni veiyalayalati, ka bubului kina ko na Kalou vei Eparaama, era sa qai tubu ko ira na tamata me ra lewe levu mai Ijipita,

¹⁸ ka yacova na gauna sa tubu cake kina e dua tani na tui, sa sega ni kilai Josefa.

¹⁹ Sa lawakitaki ira na wekada ko koya o qo, a sa vakacacani ira na noda qase, a ra sa biuti ira kina na nodra gone ki tautuba, me ra kakua ni bula.

²⁰ A sa sucu ko Mosese e na gauna ko ya, a sa mata vinaka sara, a sa vula tolu ka susugi e na vale i tamana:

²¹ ia ni sa biu ki tautuba ko koya, sa keveta mai ko na luvena-yalewa i Fero, a sa susuga me luvena.

²² A sa vakavulici ko Mosese e na nodra vuku kecega na kai Ijipita, a sa kaukauwa e na vosa kei na cakacaka.

²³ Ia ni sa vasagavulu dina na nona yabaki, sa qai vakananuma cake mai e na lomana me laʼki raici ira na wekana na luve i Isireli.

²⁴ Ia ni sa raica e dua vei ira ni sa vakacacani sa totoka, a sa cudruvaki koya sa vakararawataki, a sa yavita na kai Ijipita:

²⁵ ia sa nanuma ko koya era na kila na wekana ni sa ligana ena vakabulai ira kina ko na Kalou: a ra sa sega ga ni kila.

²⁶ Ia e na sabogibogi sa rairai ko koya ki na lewe rua erau sa veivala, a sa kali rau me rau veivinakati tale, a sa kaya, Oi kemudrau na turaga, drau sa veiwekani ga; a cava drau sa veivakacacani kemudrau kina?

²⁷ A sa biligi koya tani ko koya sa vakacacana na wekana, ka kaya, O cei sa lesi iko mo turaga mo mai lewai keimami?

²⁸ o sa via vakamatei au beka, me vaka ko a vakamatea na kai Ijipita e na noa?

²⁹ Sa qai dro ko Mosese e na vuku ni vosa ko ya, a sa laʼki vulagi tiko e na vanua ko Mitiani, a sa mani sucu kina e rua na luvena-tagane.

³⁰ Ia ni sa oti e vasagavulu na yabaki, sa qai rairai e dua na agilose ni Turaga vei koya e na veikau, e na ulu-ni-vanua ko Sinei, e na yameyame ni buka e na dua na kau.

³¹ Ia ni sa raica ko Mosese, sa kidacalataka na ka sa raica: ia ni sa torova yani me vakaraica, sa yaco mai vua na vosa ni Turaga,

³² Oi au na nodra Kalou na nomu qase, na Kalou i Eparaama, kei na Kalou i Aisake, kei na Kalou i Jekope. A sa sautaninini ko Mosese, a sa rere ni vakaraica.

³³ Sa qai kaya na Turaga vei koya, Luvata tani na nomui vava mai na yavamu: ni sa qele tabu na tikina ko sa tu kina.

³⁴ Au a raica, au a raica na nodra rarawa na noqu tamata era sa tiko mai Ijipita, ia kaʼu a rogoca na nodra vutugu; ia kaʼu sa lako sobu mai me vakabulai ira: ia o qo, mo ia, au na talai iko ki Ijipita.

³⁵ O Mosese o qo ko koya era sa cata, ka kaya, O cei sa lesi iko mo turaga ka dauveilewai? o koya ga o qo ka tala ko na Kalou me turaga kai vakabula e na ligana na agilose sa rairai mai vua e na kau.

³⁶ Sa kauti ira yani ko koya, ni sa kitaka oti e so na ka e veivakidacalataki kei nai vakatakilakila e na vanua ko Ijipita, kei na waitui damudamu, kei na veikau, ka yabaki vasagavulu.

³⁷ O koya o qo ko Mosese sa kaya vei ira na luve i Isireli, Ena vakatubura kivei kemudou ko Jiova na nomudou Kalou, maivei ira na wekamudou, e dua na parofita me vakai au: o koya o qo dou na vakarogoca.

³⁸ O koya e qo, sa tiko kei ira nai vavakoso lewe ni soro e na veikau, kei na agilose sa vosa vua, e na ulu-ni-vanua ko Sinei, kei ira na noda qase: a sa taura ko koya na vunau bula me solia vei keda:

³⁹ o koya o qo era sa bese ni talairawarawa vua ko ira na noda qase, a ra sa biliga tani vei ira, a sa suka tale yani ki Ijipita na yalodra,

⁴⁰ a ra sa kaya vei Eroni. Cakava vei keda e so na kalou me ra liutaki keda: ni ko Mosese o qo, o koya ka kauti keda tani mai na vanua ko Ijipita, eda sa sega ni kila se cava beka sa yaco vua.

⁴¹ A ra sa cakava e dua na luve ni karavau e na gauna ko ya, a ra sa vakacabora nai madrali ki na matakau, a ra sa rekitaka na cakacaka ni ligadra.

⁴² Sa qai lesu tani na Kalou, a sa biuti ira tu yani me ra qarava na veikalokalo ni lomalagi; me vaka na ka sa volai e na nodrai vola na parofita, Oi kemudou nei mataqali nei Isireli, dou a vakacabora vei au na manumanu sa vakamatei, kei nai madrali, e na veikau ka yabaki vasagavulu, se segai?

⁴³ io, dou a colata na vale nei Moloke, kei na kalokalo ni nomudou kalou ko Remifani, a matakau dou a cakava me soro kina: ia kaʼu na kauti kemudou tani yani me sivi ko Papiloni.

⁴⁴ Sa tu ga vei ira na noda qase e na veikau na vale gatu ni vunau, me vaka sa vosa kina ko koya, ni sa kaya vei Mosese, me cakava me vaka na kenai vakatakarakara sa raica:

⁴⁵ a ya era sa taura emuri talega na noda qase, era sa qai kauta mai ko ira kei Josua ki na nodra vanua na veimatanitu, o ira sa vakasava tani ko na Kalou e na matadra na noda qase, ka yacova na gauna i Tavita;

⁴⁶ o koya sa kune loloma mai vua na Kalou, a sa masuta me kunea e dua na vale-tikotiko me nona na Kalou i Jekope.

⁴⁷ Ia ko Solomoni ga sa tara na vale me nona.

⁴⁸ A sa sega ni tiko ko Koya sa cecere sara e na veivale ni soro sa caka e na liga; me vaka na vosa ni parofita,

⁴⁹ A noqui tikotiko-vakaturaga ko lomalagi, kei nai tutu-ni-yavaqu ko vuravura: a vale cava dou na tara me noqu? sa taroga ko Jiova: se na tikina cava me na noqui vakavakacegu?

⁵⁰ sa sega li ni cakava na ka kecega o qori na ligaqu?

⁵¹ Oi kemudou na domokaukauwa, ka tawa cili na yalomudou, kei na daligamudou, dou sa dauveivala tikoga kei na Yalo Tabu; me vakataki ira na nomudou qase, sa vakakina koi kemudou.

⁵² O cei vei ira na parofita sa sega ni vakacacana ko ira na nomudou qase? a ra sa vakamatei ira era a vakatakila eliu ni na lako mai ko koya na Yalododonu; o koya dou sa qai solia yani ka vakamatea:

⁵³ a sa soli vei kemudou na vunau ni sa so na agilose sa tukuna, ia dou a sega ga ni vakabauta.

⁵⁴ Ia ni ra sa rogoca na veika o qo, sa laucoka na yalodra, a ra sa vakasequruquru vua e na batidra.

⁵⁵ Ia ko koya ni sa qai sinai e na Yalo Tabu, sa rai matua ki lomalagi, a sa raica nai ukuuku ni Kalou, kei Jisu ni sa tu ena liga i matau ni Kalou,

⁵⁶ a sa kaya, Raica, au sa raica ni sa wase rua na lomalagi, ni sa wavu tu talega na Luve ni tamata e na liga i matau ni Kalou.

⁵⁷ Era sa qai qoqolou e na domo levu, ka tabonaka na qara ni daligadra, ka cici vakaivalu vua ni ra sa lomavata,

⁵⁸ a ra sa biuta ki nai bili ni koro, ka virika e na vatu; ia ko ira era sa beitaka, era sa virikotora sobu na nodrai sulu ki na yavana e dua na cauravou, a yacana ko Saula.

⁵⁹ A ra sa viriki Sitifeni e na vatu, ni sa masu tiko, ka kaya, Turaga Jisu, taura na yaloqu.

⁶⁰ A sa tekiduru sobu ko koya, a sa kaci e na domo levu, Turaga, kakua ni cudruvi ira e nai valavala ca o qo. Ia ni sa vosa oti vakaoqo, sa qai moce.