Cakacaka 5 - AI VOLA TABU

Sa mate ko Anania kei Safeira e na vuku ni rau sa vosa lasu, 1-11. Sa kitaka na cakamana e vuqa ko iratou nai apositolo, a sa lewe vuqa na tamata sa lotu, 12-16. Sa biuti iratou ki na vale ni veivesu ko ira na bete levu; a sa vakabulai iratou ko na agilose ni Kalou, 17-25. Eratou sa qai lewai tale, 26-42.

¹ A SA dua na tamata ko Anani a na yacana, kei Safeira na watina, sa volitaka e dua na vanua,

² a sa vunia e so na kenai voli, e bau kila talega ko na watina, a sa kauta e so, ka virikotora ki na yavadratou nai apositolo.

³ A sa kaya ko Petero, Anania, e vakaevei ka sa vakasinaita kina na yalomu ko Satani mo lasu vua na Yalo Tabu, ka vunia e so nai voli ni vanua?

⁴ Ni sa tu ga eliu, sa sega li ni nomu ga? ia ni sa volitaki oti, o sa sega li ni veitalia ga kina? e vakaevei ni ko sa nanuma kina na ka o qo e na lomamu, ne? o sa sega ni lasu kivei ira na tamata, vua ga na Kalou.

⁵ Ia ni sa rogoca ko Anania na vosa o qo, sa bale sobu, ka ciba: a ra sa rere vakalevu kina ko ira kecega sa rogoca na veika o qo.

⁶ A sa tu cake mai ko iratou na cauravou, ka solegi koya, ka colata ki tautuba, ka buluta.

⁷ Ia ni sa oti e tolu beka na tiki-ni-siga, sa qai curu mai na watina, a sa sega ni kila na ka sa caka.

⁸ A sa kaya vua ko Petero, Tukuna mai vei au se drau sa volitaka na vanua e nai lavo vakakoya, se segai? A sa kaya ko koya, Io, e vaka ga ko ya.

⁹ Sa qai kaya vua ko Petero, E vakaevei ni drau sa lomavata kina me vakatovolea vakaca na Yalo ni Turaga? raica, sa tu e katuba na yavadratou eratou sa buluta na watimu, eratou na colati iko talega ki tautuba.

¹⁰ Sa qai bale sobu sara ki yavana ko koya, ka ciba: a ratou sa curu mai na cauravou, ka kunea ni sa ciba ko koya, a ratou sa colata yani, ka buluta vata kei na watina.

¹¹ A ra sa rere vakalevu kina ko ira kece nai vavakoso lewe ni soro, kei ira vakaaduaga era sa rogoca na veika o qo.

¹² A sa caka nai vakatakilakila kei na ka e veivakidacalataki vakavuqa e na ligadratou nai apositolo vei ira na tamata; (a ra sa lomavata kecega e na yasana nei Solomoni ni vale ni soro:

¹³ a sa sega e dua vei ira sa vo sa doudou me to vata kei ira; a sa vakarokorokotaki ira ko ira na tamata:

¹⁴ a sa vakaikuritaki vakalevu vua na Turaga na tamata e so era vakabauta, era lewe vuqa na tagane kei na yalewa talega;)

¹⁵ a ra sa kauti ira kina ki tuba ki na veisala, era sa tauvi-mate, a ra sa vakadavora e nai mocemoce lelevu kei nai mocemoce lalai, me vakaru-ruga e so vei ira na yaloyalo i Petero ni sa lako yani kina.

¹⁶ Era lewe vuqa talega sa lako mai na Veikoro sa vakavolivoliti Jerusalemi, a ra sa kauta mai na tamata e so sa tauvi-mate, kei ira sa vakararawataki ira ko na yalo tawa-savasava e so: a ra sa vakabulai vakaaduaga.

¹⁷ Sa qai tu cake na bete levu, kei ira kecega era sa dautiko vata kaya, (o ira nai vavakoso sai tokani i Satoki,) a ra sa sinai e na cudru,

¹⁸ a ra sa tauri iratou nai apositolo, ka biuti iratou ki na vale ni veivesu ni kaisi.

¹⁹ Ia ni sa qai bogi sa dolava na katuba ni vale ni veivesu e dua na agilose ni Turaga, a sa kauti iratou maikina, ka kaya,

²⁰ Dou lako, ka laʼki tu e na vale ni soro, ka tukuna vei ira na tamata na vosa kecega ni bula o qo.

²¹ Ia ni ratou sa rogoca, eratou sa curu ki na vale ni soro, ni sa kida na mataka, ka vakatavuvuli. A sa lako mai na bete levu, kei ira era sa dautiko vata kaya, a ra sa vakasoqoni ira vata na mataveilewai, kei ira kecega na nodra qase na luve i Isireli, a ra sa tala e so ki na vale ni veivesu me kauti iratou mai.

²² A ratou sa tadu nai talatala, a ratou sa tawa kunei iratou c na vale ni veivesu; a ratou sa lesu tale, ka mai tukuna,

²³ ka kaya, Keitou sa kunea dina ni sa sogo vakaukauwa tu na vale ni veivesu, a ra sa tu talega nai vakatawa e na mata ni katuba etautuba; ia ni keitou sa dolava, e sega e dua keitou sa kunea eloma.

²⁴ Ia ni sa rogoca na veika o qo na bete levu kei na turaga ni vale ni soro kei ira talega na bete turaga, era sa sega ni kila rawa se na tubu beka mo vakaevei na ka o qo.

²⁵ Sa qai lako mai e dua, ka tukuna vei ira, ka kaya, Raica, o iratou na tamata dou a biuta ki na vale ni veivesu eratou sa tu e na vale ni soro, ka vakavulici ira na tamata.

²⁶ Sa qai lako na turaga kei iratou nai talatala, ka kauti iratou mai, a ratou sa sega ga ni vakasaurarataka: ni ratou sa rerevaki ira na tamata, de ra viriki iratou e na vatu.

²⁷ Ia ni ratou sa kauti iratou mai, eratou sa vakatura e na matadra na mataveilewai: a sa tarogi iratou ko na bete levu,

²⁸ ka kaya, Keitou a sega beka ni vakarota matua vei kemudou, mo dou kakua ni vakatavuvuli e na yaca o qo, ne? ka raica, dou sa vakasinaiti Jerusalemi e na nomudoui vakavuvuli, dou sa nakita talega me keitou tarogi e na dra ni tamata o qo.

²⁹ Sa qai vosa ko Petero kei iratou nai apositolo, ka kaya, Sa kilikili kei keitou me talairawarawa vua na Kalou, me kakua ga vei ira na tamata.

³⁰ A nodra Kalou na noda qase sa vakaturi Jisu cake tale mai, o koya dou a vakamatea ni dou a vakarubeca e na dua na kau.

³¹ O koya sa laveta cake ko na Kalou e na ligana i matau me Turaga kai Vakabula, me solia kina na veivutuni kivei ira na Isireli, kei na bokoci ni valavala ca.

³² Keitou sa yaco talega me nona dautukutuku e na veika o qo; sa vaka talega kina na Yalo Tabu, o koya sa solia ko na Kalou vei ira sa talairawarawa vua.

³³ Ia ni ra sa rogoca, era sa cudru vakalevu, a ra sa bose me ra vakamatei iratou.

³⁴ Sa qai tu cake e dua e na kedra maliwa na mataveilewai, a Farisi, ko Kamelieli na yacana, a vu-ni-vunau, sa rogorogo vinaka vei ira ua tamata kecega, a sa kaya me kau vakalailai ga ki tuba ko iratou nai apositolo;

³⁵ a sa qai kaya vei ira, Oi kemudou na tamata na Isireli, dou raici kemudou vinaka e na vuku ni ka dou sa nanuma me kitaka vei iratou na tamata o qo.

³⁶ Ni sa tubu cake eliu ko Cuta, a sa dautukuni koya me ka levu, a ra sa laʼki to vata kaya na tamata e so, era sa wili vata era sa lewe va beka na drau; a sa qai vakamatei ko koya o qo; kei ira kecega, era sa talairawarawa vua, era sa vakasesei, ka oti yani.

³⁷ Sa oti o qo sa qai tubu cake ko Juta na kai Kalili e na gauna sa ia kina na veivolavolai, a ra sa lewe vuqa sa kauta vakatani ko koya me ra muri koya: sa rusa talega ko koya o qo; kei ira vakaaduaga era sa talairawarawa vua, era sa vakasevi.

³⁸ Ia o qo, au sa kaya vei kemudou, Dou kakua soti ni kitaki iratou na tamata o qo, dou laivi iratou ga: ia kevaka e ka mai na tamata nai naki o qo se na cakacaka o qo, ena vakarusai ga:

³⁹ ia kevaka e ka mai vua na Kalou, dou sa sega ni vakarusa rawa; de dou na kunei beka ni dou veivala kei na Kalou.

⁴⁰ A ra sa qai yalovata kaya: ia ni ra sa kacivi iratou nai apositolo, ka vakanakuitataka, era sa vakarota matua vei iratou me ratou kakua sara ni vosa e na yaca i Jisu, a ra sa qai laivi iratou me ratou lako.

⁴¹ Ia ni ratou sa lako tani e matadra na mataveilewai, eratou sa reki ni ratou sa yaga me ratou vakacacani e na vuku ni yacana.

⁴² Ia e na veisiga kecega e na vale ni soro, kei na veivale kecega, era sa sega ni mudu ni vakatavuvuli ka vunautaki Jisu Karisito.