Cakacaka 3 - AI VOLA TABU

Erau sa Vakabula e dua sa lokiloki ko Petero kei Joni, 1-11. Sa tukuna ko Petero ni sa bula ko koya e na vuku i Jisu, o koya era a vakamatea, 12-18. Sa qai vakavulici ira me ra veivutuni, 19-26.

¹ IA erau sa lako vata ko Petero kei Joni ki na vale ni soro e na tiki-ni-siga sa dauia kina na masumasu, e na kenai kaciwa.

² A sa dua na tamata sa lokiloki mai na kete i tinana sa colati voli, o koya era sa vakadavora e na veisiga e na mata ni katuba ni vale ni soro, a ya sa vakatokai ko Lagilagi, me kere ka-ni-loloma vei ira sa curu ki na vale ni soro;

³ o koya, ni sa raici Petero kei Joni ni rau sa voleka ni curu ki na vale ni soro, sa kerekere me dua na ka-ni-loloma.

⁴ A rau sa vakaraica matua ko Petero kei Joni, ka kaya, Raici ke irau mai.

⁵ A sa vakasautu rau ko koya, ni sa nanuma ena rawata maivei rau e dua na ka.

⁶ Sa qai kaya ko Petero, A siliva kei na koula e sega ni tu vei au; ia na ka ga sa tu vei au kaʼu na solia vei iko: E na yaca i Jisu Karisito na kai Nasareci mo tu cake ka lako voli.

⁷ Sa qai taura na ligana i matau, a sa tubera cake: sa qai vakaukauwataki vakasauri sara na yavana kei na nona qurulasawa.

⁸ Sa qai rika cake ko koya ka wavu tu, ka lako voli, a sa curu vata kei rau ki na vale ni soro, a sa lako, ka rika, ka vakarokorokotaka na Kalou.

⁹ A sa raici koya ko ira na tamata kecega, ni sa lako voli ka vakarokorokotaka na Kalou:

¹⁰ a ra sa kila ni sai koya ka dautiko e na mata ni katuba ko Lagilagi, mai na vale ni soro, me dua na ka-ni-loloma: a ra sa sinai e na kidacala kei na kurabui e na vuku ni ka sa qai yaco vua.

¹¹ Ia ni sa tauri Petero kei Joni na tamata lokiloki sa qai vakabulai, era sa cici vata ko ira kecega na tamata kivei iratou ki na tiki ni vale, a ya sa vakatokai Na nei Solomoni, a ra sa kidacala vakalevu.

¹² Ia ni sa raica ko Petero, sa kaya vei ira na tamata, Oi kemudou na tamata na Isireli, dou sa kidacala e na ka o qo e na vuku ni cava? se e na vuku ni cava dou sa vakaraici keirau matua kina, me vaka sai koya na neirau kaukauwa se yalododonu, keirau sa kitaki koya o qo kina me lako rawa?

¹³ A Kalou i Eparaama, kei Aisake, kei Jekope, a nodra Kalou na noda qase, sa vakarokorokotaka na Luvena ko Jisu: o koya dou a solia yani, ka cakitaka e na mata i Pilato, ni sa lewa ko koya me sereka.

¹⁴ Ia dou a cakitaki koya na Yalosavasava ka Dodonu, ka masuta me soli vei kemudou e dua na daulaba:

¹⁵ ka dou a vakamatea na Vu ni bula, o koya sa vakatura cake tale ko na Kalou mai na mate; ia keitou sai vakadinadina e na ka o qo.

¹⁶ Ia na yacana, e na vuku ni sa vakabauti na yacana, sa vakaukauwataki kina ko koya o qo, o koya dou sa raica ka kila: io, e na vuku ni sa vakabauti koya, sa soli vua na bula vinaka sara o qo e na matamudou vakaaduaga.

¹⁷ Ia o qo, oi kemudou na veiwekani, au sa kila ni dou a cakava ni dou sa tawa kila, me vakai ira talega na nomudou turaga.

¹⁸ Ia na veika o qori sa vakatakila eliu ko na Kalou, e na gusudra kecega na nona parofita, ni na mate na Karisito, sa qai vakayacora vakakina ko koya.

¹⁹ O koya mo dou qai veivutuni ka saumaki mai, me bokoci kina na nomudoui valavala ca, me yaco mai kina na gauna ni vakacegu mai na mata ni Turaga;

²⁰ ka talai Jisu Karisito ko koya, o koya ka vunautaki eliu vei kemudou:

²¹ o koya e dodonu me tiko mada ga mai lomalagi, me yaco mada na gauna ena caka tale me vinaka kina na ka kecega, ka vosa kina na Kalou e na gusudra kecega na nona parofita yalosavasava, e na gauna makawa.

²² Ni sa dina ni sa kaya ko Mosese kivei ira na qase, Ena vakatubura cake vei kemudou ko Jiova na nomudou Kalou, maivei ira na wekamudou, e dua na parofita me vakai au; o koya dou na rogoca e na ka vakaaduaga ena vosataka vei kemudou:

²³ ia ena yaco, a tamata yadua sa na tawa rogoca na parofita ko ya, ena vakarusai tani maivei ira na tamata.

²⁴ Ia ko ira talega na parofita kecega, sa kenai vakatekivu ko Samueli kei ira talega sa tarava, o ira kecega era sa vosa, era sa tukuna eliu na gauna o qo.

²⁵ Oi kemudou sa luvedra na parofita, kei na vosa ni veiyalayalati ka cakava na Kalou vei ira na noda qase, ni sa kaya vei Eparaama, Ena kalougata na veimataqali kecega e vuravura e na vuku ni nomu kawa.

²⁶ Sa tala na Luvena ko Jisu ko na Kalou, ka liu vei kemudou, ni sa vakatura cake, me vakalougatataki kemudou, ni sa saumaki kemudou yadua mai na nomudoui valavala ca.