Cakacaka 27 - AI VOLA TABU

Sa vodoka e dua na waqa ko Paula me lako ki Roma, a sa vakasalataka na ca ena yaco e na soko, 1-12. A sa labati ira na cagi levu, a sa ca na waqa, a ra sa qato bula kecega ki vanua na lewena, 13-44.

¹ IA ni sa lewai oti me keitou soko ki Itali, era sa soli Paula, kei na so tale na tamata sa vesu, vua e dua na turaga ni matai valu nei Akusito, na yacana ko Juliu.

² Ia ni keitou sa vodoka e dua na waqa ni Atira-mitio, keitou sa vakarewa, ka nakita me keitou sokoravita na baravi kei Esia; a sa dua na kai Masitonia mai Cesalonika, o Arisitariko, sa lako kei keitou.

³ Ia e na; sabogibogi keitou sa uru ki Saitoni. A sa lomavinaka vei Paula ko Juliu, a sa vakalaiva me lako vei ira na wekana me ra karoni koya.

⁴ Keitou sa qai soko tani yani eke, ka sokoraviti Kipiro, e na vuku ni sa ca na cagi.

⁵ Ia keitou sa soko yani ka sivia na wasawasa kei Silisia kei Pamifilia, ka yaco sara ki Maira mai Lisia.

⁶ A sa kunea kina ko na turaga ni valu e dua na waqa ni Alekisadria, a ya sa soko vaka ki Itali; a sa vakavodoki keitou kina.

⁷ Ia ni keitou sa soko malua ga ka bogi vuqa, ka tawa yaco sara me donui Nito, ni sa tarovi keitou na cagi, keitou sa sokoraviti Kiriti, ka donui Salimoni;

⁸ a sa vo e lailai me dredre ni sivia, keitou sa yacova e dua na yasana na yacana na Toba Vinaka; a sa voleka kina e dua na koro ko Leseia.

⁹ Ia ni sa oti e vuqa na bogi, a sa mai dredre na soko, e na vuku ni sa qai oti na gauna ni lolo, sa qai vakasalataki ira ko Paula,

¹⁰ ka kaya vei ira, Oi kemudou na turaga, au sa kila ni na levu na ka e ca kei na ka eda na biuta e na soko, ena sega ni ca walega nai usana kei na waqa, oi keda talega.

¹¹ Ia na turaga ni valu sa vakabauti rau na turaga ni waqa kei na kenai taukei, ka sega na veika sa kaya ko Paula.

¹² Ia e na vuku ni sa sega ni vinaka na toba ko ya me kele kina e na vula i liliwa, era sa lewe vuqa vei ira sa lewa me ra soko tani yani, ni ra nanuma de ra yaco mada ki Feneisi, me ra kele kina e na vula i liliwa; a ya na toba ki Kiriti, a sa donuya na ceva era kei na tokalau vualiku.

¹³ Ni sa qai liwa vakamalua na ceva, era sa vakasama ni ra a rawata na ka era a nakita, a ra sa cavui kelekele, ka sokoraviti Kiriti.

¹⁴ A sa sega mada ni dede, sa qai labati ira na cava levu, a yacana ko Uroki-litoni.

¹⁵ Ia ni sa lebuka na laca ni waqa, ka sega kina ni tau rawa ki na mata ni cagi, keitou sa vakalaiva ga me savu yani.

¹⁶ A sa savu kina ka volekata e dua na yanuyanu na yacana ko Kilota, a sa vo sara e lailai me keitou sega ni rawata na velovelo:

¹⁷ ia ni ra sa vakayawataka cake mai o qo, era sa cakava nai vakatukuwalu, a ra sa vakatukuwalutaka kina na waqa; ia ni ra sa rere de ra kasa ki na nuku, era sa sereka na gacagaca, ka savu yani.

¹⁸ Ia ni keitou sa viriviri vakalevu sara e na cava, e na sabogibogi era sa biuta nai usana:

¹⁹ ia e nai katolu ni bogi, keitou sa biuta e na ligaitou na gacagaca ni waqa.

²⁰ Ni sa qai bogi vuqa ka sega ni rairai na mata-ni-siga se na veikalokalo, a sa laba na cava levu, sa takali kece na dinata me keitou bula.

²¹ Ia ni sa dede ni keitou sa tawa kana, sa tu cake ko Paula e na kedra maliwa, ka kaya, Oi kemudou na turaga, sa dodonu mo dou vakarogoci au eliu, ka kakua ni cavui kelekele mai Kiriti, sa yaco kina na ca o qo kei na biu.

²² Ia o qo, au sa masuti kemudou mo dou kua ni yalolailai: ni sa sega e dua vei kemudou ena yali na nona bula, na waqa ga:

²³ ni sa tu voleka vei au e na bogi e na noa e dua na agilose ni Kalou, o koya kaʼu sa nona, o koya kaʼu sa qarava talega,

²⁴ a sa kaya, Kakua ni rere, Paula: o na kau ga ki na mata i Sisari: ka raica, sa soli ira kecega vei iko ko na Kalou o ira ko sa soko kaya.

²⁵ O koya o qo, koi kemudou na turaga, mo dou qai kua ni yalolailai; niʼu sa vakadinata na Kalou, ni na yaco ga me vaka sa tukuni mai vei au.

²⁶ Ia sa lesi ga ni da na biu ki na dua na yanuyanu.

²⁷ Ia ni sa yaco mai nai katinikava ni bogi, ni keitou sa veisavuyaki tiko e na Atiria, ni sa lomaloma-ni-bogi era sa nanuma na lewe ni waqa era sa volekata e dua na vanua;

²⁸ a ra sa vakarauta na wai, a ra sa kunea kina ni sa katu ruasagavulu: ia ni ra sa savu yani vakalailai, ka vakarauta tale na wai, era sa kunea kina ni sa katu tinikalima.

²⁹ Ia ni ra sa rere de keitou kasa ki na veivatu, era sa biuta nai kelekele e va mai na mua ni turaga, a ra sa gadreva tu me siga.

³⁰ Ia ni ra sa voleka ni dro tani e na waqa ko ira na lewe ni waqa, ni ra sa vakatukuca na velovelo ki wai, me vaka era sa ia me biuta nai kelekele mai na mua ni kaisi,

³¹ sa kaya ko Paula vua na turaga ni valu, vei ira talega na tamatai valu, Kevaka era na sega ni tiko ga e na waqa ko ira o qo, dou na sega ni bula rawa.

³² Era sa qai seledrutia nai noka ni velovelo ko ira na tamatai valu, a ra sa biuta me ciri yani.

³³ Ia ni sa voleka mai na siga, sa masuti ira kecega ko Paula me ra kana, ka kaya, O qo na kenai katinikava ni bogi dou sa wawa ga ka lolo, ka sega ni kania e dua na ka;

³⁴ o koya o qo kaʼu sa masuti kemudou kina mo dou kania e so na ka: o qo ena yaga mo dou bula kina: ni sa sega e dua vei kemudou ena lutu mai e dua na drau ni uluna.

³⁵ Ia ni sa vosa oti vakaoqo, sa taura na madrai, a sa vakavinavinaka vua na Kalou e na matadra kecega; ia ni sa dovia, sa vakatekivu me kana.

³⁶ A ra sa qai vakacegui kecega, ka kania na ka e so ko ira talega.

³⁷ Ia koi keimami kecega sa tiko e waqa keimami sa le rua na drau ka vitusagavulu ka ono.

³⁸ Ia ni ra sa kana oti ka mamau, era sa vakamamadataka na waqa, ka biuta na sila ki loma ni waitui.

³⁹ Ni sa qai siga mai, era sa sega ni kila na vanua: a ra sa kunea e dua na toba sa vakamatasawa, a ra sa nakita me vakasara kina na waqa, kevaka era rawata.

⁴⁰ Ia ni ra sa drutia laivi nai kelekele ni waqa, era sa biuta ki loma ni wai, ka sereka nai noka ni uli, ka vakarewa na laca levu ki na cagi, a ra sa soko vakaki vanua.

⁴¹ A ra sa ciri ki na yasana e sota vata kina e rua na drodro, a ra sa vakasa na waqa, a sa coba sara na mua ni kaisi, ka sega ni yavala rawa, a sa kasere na mua ni turaga e na kaukauwa ni biau.

⁴² A ra sa bose ko ira na tamatai valu me vakamatei ira na tamata era sa vesu tu, de ra qalo dro e so, ka bula.

⁴³ Ia sa vinakata na turaga ni valu me vakabulai Paula, a sa tarovi ira kina mai na ka era sa nanuma; a sa kaya me rika eliu ko ira sa qalo rawa; me ra lako ki vanua:

⁴⁴ ia ko ira sa vo, e so e na rara e so, ka so e na veika mai na waqa. A sa vakaoqo, era sa cabe bula kecega ki vanua.