Cakacaka 25 - AI VOLA TABU

Sa beitaki Paula ko ira na Jiu e na matai Fesito, a sa tukuni koya vua ko Paula; a sa vosataka ko Fesito na nona laʼki lewai mai Jerusalemi, a sa kaya ko Paula me lewai koya ko Sisari, 1-12. Sa qai lewai koya ko Akiripa kei Fesito, 13-27.

¹ NI sa tadu mai ki na vanua ko Fesito, a sa oti e tolu na bogi, sa qai cavu tu e Sisaria me lako cake ki Jerusalemi.

² Sa qai beitaki Paula vua ko ira na bete levu kei ira na nodra turaga na Jiu, a ra sa vakamasuta,

³ a ra sa kerea vua me lomani ira e na vukuna, me talaki me lako mai ki Jerusalemi ko koya, a ra sa lawavaka me ra vakamatea e na sala.

⁴ A sa kaya ko Fesito, ni sa vakatawai tu mai Sisaria ko Paula, a sa voleka na nona lako yani.

⁵ A sa kaya, O ira vei kemudou sa turaga, me da lako vata sobu, mo dou beitaka na tamata o qo, ke dua na ca sa tu vua.

⁶ A sa tiko vata ga kei ira ko koya ka oti e tini ka vakacaca na bogi, sa qai lako sobu ki Sisaria; e na sabogibogi cake sa tiko ko koya e nai tikotiko ni veilewai, a Sa kaya me kau mai ko Paula.

⁷ Ia ni sa yaco mai ko koya, era sa tu vakavolivolita ko ira na Jiu era a lako sobu mai Jerusalemi, a ra sa beitaki Paula e na ka ca sara e vuqa, a ya era sa sega ni vakatakila rawa ni sa dina.

⁸ A sa tukuni koya ko koya, Au sa sega ni kitaka e dua na ka ca, ki na nodra vunau na Jiu, se ki na vale ni soro, se kivei Sisari.

⁹ Ia e na vuku ni sa vinakata ko Fesito me vakareki ira na Jiu, sa vosa vei Paula, ka kaya, O sa vinakata mo lako cake ki Jerusalemi, mo lewai kina e mataqu e na veika o qo, se segai?

¹⁰ Sa qai kaya ko Paula, Au sa tu e na mata ni tikotiko ni veilewai nei Sisari, a tikina e dodonu meʼu lewai kina: au a sega ni kitaka e dua na ka ca vei ira na Jiu, o qori ko sa kila vinaka sara.

¹¹ Kevaka kaʼu sa tamatai valavala ca, seʼu kitaka e dua na ka e dodonu meʼu mate kina, au sa sega ni bese ni mate: ia kevaka e sega na veika o qo era sa beitaki au kina, sa sega e dua e rawata me soli au vei ira. Au sa cavuti Sisari me lewai au.

¹² Ia ko Fesito, ni sa veivosaki oti kei ira na mataveilewai, sa kaya, O sa cavuti Sisari, ne? o na lako vei Sisari.

¹³ Ia ni sa oti na bogi e so, erau sa qai lako mai ko Akiripa na tui kei Periniki ki Sisaria, me rau veikidavaki kei Fesito.

¹⁴ Ia ni rau sa tiko kina ka bogi vuqa, sa tukuni Paula ko Fesito vei koya na tui, ka kaya, Sa dua na tamata sa vesu tu, o koya ka vakalaiva ko Filikisa:

¹⁵ ia niʼu a tiko mai Jerusalemi, era sa beitaki koya ko ira na bete levu kei ira na nodra qase na Jiu, a ra sa masu meʼu lewai koya me cudruvi.

¹⁶ Au sa qai kaya vei ira, E sega ni nodrai valavala na kai Roma me solia walega na tamata e dua me vakamatei, ka malua me veirai mada kei ira sa beitaka, me sa rawa talega mada na nona tukuni koya e na vuku ni ka ca sa beitaki vua.

¹⁷ Ia ni ra sa yaco mai kike, au sa sega ni caka bera, e na sabogibogi cake kaʼu sa tiko e nai tikotiko ni veilewai, ka kaya me kau mai na tamata o qo.

¹⁸ Ia ni ra sa tu cake ko ira era sa beitaka, era sa sega ni kauta mai na ka ca me beitaka vua, me vaka na ka kaʼu a nanuma:

¹⁹ ia ka so ga na ka sa veiletitaki kaya e na nodra lotu, kei na dua na tamata ko Jisu, o koya sa mate, ia ka kaya ko Paula ni sa bula tu ko koya.

²⁰ Ia e na vuku ni kaʼu sa sega ni kila vinaka me lewa na veika vaka, au sa taroga se via lako cake ki Jerusalemi ko koya, me lewai kina e na veika o qori, se segai.

²¹ Ia ni sa vaka ko Paula, me tiko mada me lewai koya ko Akusito, au sa qai kaya me vakatawai ka malua meʼu vakatalai koya yani vei Sisari.

²² Sa qai kaya ko Akiripa vei Fesito, Oi au talega, kaʼu sa via rogoca na tamata o qo. Sa kaya ko koya, E na sabogibogi o na rogoca.

²³ E na sabogibogi, ni rau sa lako mai ko Akiripa, kei Periniki, erau ukucavu mai, a rau curu ki na yasana ni vakarorogo, kei ira vata kei rau na turaga levu ni valu, kei ira na turaga ni koro, ia ni sa vakarota ko Fesito, sa kau mai ko Paula.

²⁴ A sa kaya ko Fesito, I Akiripa na tui, kei kemudou kecega na tamata sa tiko kei keitou eke, dou sa raica na tamata o qo, e na vuku i koya era sa cikevi au ko ira na lewe vuqa na Jiu, mai Jerusalemi, eke talega, a ra sa kaya e sega ni dodonu me bula ko koya.

²⁵ Ia ni kaʼu sa kunea ni sa sega ni cakava ko koya e dua na ka ca sa dodonu me mate kina, a sa cavuti Akusito ko koya me lewai koya, au sa qai lewa meʼu vakatala yani.

²⁶ Ia ka sega na ka e matata meʼu volai koya kina vua na noqu turaga. O koya ga o qo kaʼu sa kauta mai kina ki na matamudou, ia vakaidina ki na matamu, i Akiripa na tui, me so kina na ka meʼu vola, ni sa tarogi oti ko koya.

²⁷ Ni sa vaka na ka lialia vei au me vakatala e dua sa vesu, ka sega ni vakatakila talega na ka ca sa beitaki vua.