Cakacaka 21 - AI VOLA TABU

Sa gadreva sara ko Paula me lako ki Jerusalemi, a ratou sa lako mada ki Sisaria, 1-16. Sa yaco ki Jerusalemi ko Paula, a ra sa vakacacana vakalevu ko ira na kai Jerusalemi, a sa vakabulai koya e dua na turaga ni valu, 17-40.

¹ IA ni keitou sa vakalaivi ira rawa, keitou sa vakarewa ka vue yani ki Koo, ka e na siga cake ki Roti: ka maikea ki Patara:

² ia ni keitou sa kunea e dua na waqa sa soko yani ki Feneisi, keitou sa vodoka, ka soko yani.

³ Ia ni keitou sa kunei Kipiro, keitou sa vakadawasivita e na neitou i mawi, a keitou sa soko ki Siria, ka uru ki Teiri; ni sa sobu kina nai usana ni waqa.

⁴ Ia ni keitou sa kunei ira sa lotu, keitou sa tiko kina ka bogi vitu: ia ni sa vakavuna ko na Yalo, era sa kaya vei Paula, me kakua ni lako cake ko koya ki Jerusalemi.

⁵ Ia ni keitou sa vakaotia na veisiga ko ya, keitou a qai cavu tu ka lako yani: a sa talatala vei keitou ko ira kecega kei ira na watidra, kei ira na luvedra, keitou sa yaco mada ki nai bili ni koro; keitou sa qai tekiduru e matasawa, ka masu.

⁶ Ia ni keitou sa veitatau, keitou sa vodo ki waqa; a ra sa suka tale ki nodratou.

⁷ Ia ni keitou sa soko oti mai Teiri, keitou sa yaco ki Toleme, ka veikidavaki kei ira na veiwekani, ka tiko vata kei ira ka siga dua.

⁸ E na sabogibogi cake keitou sa lako yani koi keitou sa lako vata kei Paula, ka yaco ki Sisaria: ia keitou sa curu ki na vale i Filipo nai vakavuvuli, o koya sa dua vei ira na lewe vitu, ka keitou sa tiko vata kaya.

⁹ A sa lewe va na luvena, eratou sa gonealewa, a ratou sa dauparofisai.

¹⁰ Ia ni keitou sa bogi vuqa maikea, sa lako sobu mai Jutia e dua na parofita, ko Akapo na yacana.

¹¹ Ia ni sa curu vei keitou ko koya, sa taura nai vau-ni-sulu nei Paula, a sa vauca na ligana kei na yavana, ka kaya, Sa vakaoqo na vosa ni Yalo Tabu, Era na vauca vakaoqo nai taukei ni vau-ni-sulu o qo ko ira na kai Jutia era sa tiko mai Jerusalemi, a ra na solia ki na ligadra era sa tawa lotu.

¹² Ia ni keitou a rogoca na veika o qo, oi keitou kei ira talega nai taukei, keitou a masuti koya me kakua ni lako cake ki Jerusalemi.

¹³ Sa qai kaya ko Paula, A cava dou sa kitaka ni dou sa tagi ka vakadatuvutaka na lomaqu? niʼu sa sega ni vakarau meʼu vesu walega, a ya meʼu mate talega mai Jerusalemi e na vuku ni yacana na Turaga ko Jisu.

¹⁴ Ia ni sa bese ni vakarogoca ko koya, keitou sa kua soti, ka kaya, Me yaco ga na ka e veitaliataka ko na Turaga.

¹⁵ Ia ni sa oti na veisiga o qo, keitou sa vakasosolo na neitou veika, ka lako cake ki Jerusalemi.

¹⁶ E so talega era sa lotu mai Sisaria, era sa lako vata kei keitou, a ra sa kauta e dua na qase sa lotu ko Minasoni, na kai Kipiro, me keitou moce e nona vale.

¹⁷ IA ni keitou sa yaco ki Jerusalemi, era sa vakacegui keitou e na reki ko ira na veiwekani.

¹⁸ Ia e na sabogibogi cake sa lako vata kei keitou ko Paula vei Jemesi; a sa tiko kina ko ira kecega na qase.

¹⁹ Ia ni sa veikidavaki kei ira ko koya, sa qai tukuna na ka kece ka cakava na Kalou e na kedra maliwa na veimatanitu, e na nona vunau tiko.

²⁰ Ia ni ra sa rogoca, era sa vakarokorokotaka na Turaga, a ra sa kaya vua, O iko na wekaitou, ko sa raica, era sa vica vata na udolu na Jiu era sa vakabauta; a ra sa gumatua kecega e na vuku ni vunau:

²¹ ia ka so sa tukuni iko vei ira, ni ko sa vakavulici ira kecega na Jiu, era sa tiko e na kedra maliwa na veimatanitu tani, me ra biuti Mosese, ni ko sa kaya me ra kakua ni cilivi ira na gone, se muria nai valavala eliu.

²² Ena vakaevei beka o qori? e dina sara ena soqoni vata mai ko ira na lewe vuqa: ni ra na rogoca ni ko sa tadu mai.

²³ O koya mo qai kitaka na ka o qo keitou sa kaya vei iko: E va na tamata sa tiko vata kei keitou, eratou a bubului;

²⁴ mo kauti iratou, ka vakasavasavataki iko vata kei iratou, ka volia na nodratoui madrali, me ratou tasia na uludratou; me ra kila kecega kina ni sa sega ga na ka kecega ko sa tukuni kina vei ira, ni ko sa muria talega na vunau e na nomui valavala.

²⁵ Ia e na vukudra na veimatanitu tani era sa vakabauta, eda sa vola oti kina ka lewa oti me ra kakua ni vakabauta e dua na ka vakaoqo, me ra maroroi ira ga mai na ka sa cabo ki na veimatakau, mai na dra talega, kei na ka sa kuna, kei na daudara.

²⁶ Sa qai kauti iratou na tamata ko Paula, ia ni sa vakasavasavataki koya vata kei iratou e na sabogibogi cake, sa curu ki na vale ni soro, me tukuna na siga ena oti kina na vakasavasavataki, me cabori mada nai madrali e na vukudratou yadua.

²⁷ Ia ni sa vo e lailai me oti na bogi e vitu, ni ra sa raici koya e na vale ni soro ko ira na Jiu mai Esia, era sa vakidroataki ira na tamata kecega, ka tauri koya,

²⁸ a ra sa qoqolou, Oi kemudou na tamata na Isireli, dou veivuke mai: ko koya o qo na tamata sa dauvakavulici ira na tamata kece, e na veiyasana kecega, me ra cati ira na kai noda, kei na vunau, kei na tikina o qo: a sa kauta talega e so era sa matanitu tani ki na vale ni soro, a sa vakadukadukalitaka na tikina tabu o qo. (

²⁹ Ni ra a raica eliu ni sa tiko vata kaya e na koro ko Tirofimo na kai Efeso, a ra sa nanuma ni sa kauta ko Paula ki na vale ni soro.)

³⁰ A ra sa kidroa na lewe ni koro taucoko, a ra sa cici vata ko ira na tamata: a ra sa tauri Paula, ka yarataka ki tautuba mai na vale ni soro: a sa sogoti sara na katuba.

³¹ Ia ni ra sa vakasaqarai koya me ra vakamatea, sa yaco vua na turaga levu ni mataivalu nai tukutuku, ni sa kidroa ko Jerusalemi taucoko.

³² A sa kauta sara ko koya e so na tamatai valu, ka so na turaga lalai, ka cici sobu vei ira: ia ni ra sa raica na turaga levu kei ira na tamatai valu, era sa kua so ni yaviti Paula.

³³ Sa qai lako voleka na turaga levu, ka kauti koya, a sa kaya me vesuki e na sinucodo e rua; a sa taroga se ko cei ko koya, se cava talega ka kitaka.

³⁴ A sa dui; kacivaka na ka tani ko ira na lewe vuqa; ia ni sa sega ni kila ko koya na kena dina e na vuku ni kidroa, sa qai kaya me tuberi ko koya ki na bure ni valu.

³⁵ Ia ni sa yaco ko koya ki nai kabakaba, sa yaco ni ra sa colati koya ko ira na tamatai valu e na vuku ni nodrai valavala vakaukauwa na lewe vuqa:

³⁶ ni sa lewe vuqa na tamata era sa muria, ka qoqolou, Kauta tani yani.

³⁷ Ia ni sa kolai tuberi ko Paula ki na bure ni valu, sa kaya ko koya vua na turaga levu ni valu, E tara meʼu vosa mada vei iko? Sa qai kaya ko koya, O sa kila li na vosa vaka-Kirisi?

³⁸ o sa sega li ni koya na kai Ijipita, o koya ka vere e na gauna sa oti, ka kauti ira ki na veikau e va na udolu na tamata daulaba?

³⁹ Sa qai kaya ko Paula, Oi au na Jiu, na kai Tarisu mai Silisia, sa sega ni koro kaisi na noqu koro; ia kaʼu sa masuti iko mo laivi au meʼu vosa vei ira na tamata.

⁴⁰ Ia ni sa vakalaiva ko koya, sa tu cake ko Paula e nai kabakaba, ka vakatabataba vei ira na tamata e na ligana. Ia ni sa ia na tiko lo sara, sa vosa vei ira ko koya e na vosa vaka-Iperiu, ka kaya,