Cakacaka 20 - AI VOLA TABU

Sa lako ki Masitonia ko Paula, a sa kitaka na cakacaka ni Kalou. Sa moce ko Utiko ni sa rogoci Paula tiko, a sa lutu maicake, a sa ciba, a sa vakabulai koya tale ko Paula, 1-12. Sa veitatau ko Paula kei ira na qase ni lotu mai Efeso, 13-38.

¹ IA ni sa oti na kidroa, sa kacivi ira era sa lotu ko Paula, a sa tatau, ka lako tani yani me lako ki Masitonia.

² Ia ni sa lakova oti na yasana ko ya ko koya, ka vakavulici ira vakalevu, sa qai lako ki Kirisi:

³ ia ni sa tiko oti ka vula tolu, ni ra sa buki kena vere ko ira na Jiu, e na nona voleka ni soko vaka ki Siria, sa qai nanuma ko koya me lakovi Masitonia e na nona lesu tale.

⁴ A ratou sa lako vata kaya ki Esia ko Sopatero na kai Peria; kei Arisitariko kei Sekudu, koi rau na kai Cesalonika; kei Keio na kai Teripi, kei Timoci; kei Tikiko kei Tirofimo, koi rau na kai Esia.

⁵ O iratou o qo eratou sa lako eliu ka waraki keitou mai Tiroa.

⁶ Ia ni sa oti mada na gauna ni ka tawa-leveni, keitou sa qai soko tani e Filipai, a sa bogi lima mada keitou sa qai vauci ira mai Tiroa; keitou sa tiko mada kina ka bogi vitu.

⁷ Ia e nai matai ni siga ni wiki, ni sa soqoni vata ko ira sa lotu me ra dovi madrai, sa vunau vei ira ko Paula, ni sa melo me lako e na mataka; a sa kitaka tiko na vunau ka lomaloma-ni-bogi na vanua.

⁸ A sa vuqa na cina e nai taba loma ni vale ecake, era sa soqoni vata kina.

⁹ A sa dua na cauravou na yacana ko Utiko, sa tiko voleka ki na katuba ecake, a sa moce lutu sara; ia ni sa vunau vakadede ko Paula, sa biti koya na moce, a sa lutu sobu kina mai nai katolu ni taba loma ni vale, ia ni sa laveti cake sa mate tu.

¹⁰ A sa lako sobu ko Paula, a sa bale ki delana, ka cuquma, ka kaya, Dou kakua ni kidroa; ni sa tiko e lomana na yalona.

¹¹ Ia ni sa lako cake ko koya, ka dovi madrai, ka kana, a ra sa veivosaki vakadede, ka kida na mataka, sa qai lako tani ko koya.

¹² A ra sa kauta mai na cauravou ni sa bula, a ra sa vakacegui vakalevu.

¹³ Ia keitou sa liu yani ka vodoka na waqa, ka soko ki Aso, ni keitou sa nanuma me vakavodoki Paula kina, ni sa vakaoqo na nona lewa, a sa via taubale ko koya.

¹⁴ Ia ni keitou sa sota kaya mai Aso, keitou sa vakavodoka, ka yaco ki Mitilini.

¹⁵ Ia keitou sa soko tani yani eke, ka yaco me donui Kio e na siga emuri; e na siga tale sa muri, keitou sa yaco ki Samo, ka tiko mada mai Tirokilio; e na siga tale emuri, keitou sa yaco ki Milito.

¹⁶ Ni sa lewa oti ko Paula me soko tani me sivi Efeso, me kua ni tiko vakadede mai Esia: ni sa vakariri, kevaka e rawa vua, me tiko mada mai Jerusalemi ka qai yaco na solevu ni kalimasagavulu ni bogi.

¹⁷ A sa talaki mai Milito ki Efeso, me lakovi ira na nodra qase nai vavakoso lewe ni soro.

¹⁸ Ia ni ra sa yaco vua, sa kaya vei ira ko koya, Dou sa kila na noqui valavala e na veisiga kecega kaʼu a tiko kina kei kemudou, sa vakatekivu e nai matai ni siga kaʼu a lako mai kina ki Esia;

¹⁹ niʼu a qarava na Turaga e na yalo e malumalumu sara, kei na wai ni mataqu na ka levu, kei na dauvere sa yaco vei au ni ra sa buki qau vere ko ira na Jiu:

²⁰ ni kaʼu a sega ni maninitaka e dua na ka sa vinaka, meʼu kua ni vakatakila vei kemudou, ka vakavulici kemudou, ni dou sa soqoni vata, e na veivale talega,

²¹ niʼu a vakarota tiko kivei ira na Jiu, kei ira talega na veimatanitu tani, na veivutuni e na mata ni Kalou, kei na vakabauta na noda Turaga ko Jisu Karisito.

²² Ka raica, au sa qai lako ki Jerusalemi ka sa vesu na yaloqu, niʼu sa sega ni kila se cava ena yaco kina vei au;

²³ o qo ga, ni sa vakatakila na Yalo Tabu e na veikoro kecega, ka kaya ni sa waraki au nai vesu kei na rarawa.

²⁴ Ia kaʼu sa sega sara ni lomaocaoca kina, se nanuma e ka talei vei au na noqu bula, a ya ga meʼu vakaotia na noqu cakacaka e na marau, kei nai tavi ka solia mai vei au na Turaga ko Jisu, meʼu vakatakila nai tukutuku-vinaka ni loloma ni Kalou.

²⁵ Ka raica, au sa kila ni dou na sega ni raica tale na mataqu koi kemudou kecega, au a lako voli e matamudou ka vunautaka na matanitu ni Kalou.

²⁶ O koya ga kaʼu sa kaya kina mo dou vakadinadina vei au e na siga o qo, niʼu sa tawa cala e na vukuna e dua sa cudruvi:

²⁷ niʼu sa sega ni maninitaka meʼu kakua ni tukuna vei kemudou na lomana kecega na Kalou.

²⁸ O koya ga mo dou qai qarauni kemudou, kei ira kecega na qele-ni-sipi, sa lesi kemudou kina na Yalo Tabu mo dou nodrai vakatawa, mo dou vakania nai vavakoso lewe ni soro ni Kalou; o ira sa volia ko koya e na dra sa nona dina.

²⁹ Niʼu sa kila o qo, niʼu sa lako tani oti ena qai curu mai vei kemudou e so na wolifa ca sara; era na sega ni lomani ira na qele-ni-sipi.

³⁰ Ena tubu cake talega e so na tamata maivei kemudou, era na vosataka na ka e veivakacalai, me mari ira kina era sa lotu me ra muri ira.

³¹ O koya mo dou qai vakatawa, ka nanuma, ni sa tolu na yabaki kaʼu a tawa mudu kina ni vunauci kemudou kecega e na siga kei na bogi, ka vakawai tiko na mataqu.

³² Oi kemudou na veiwekani, au sa qai vakalaivi kemudou vua na Kalou, kei na vosa ni nona loloma, a ya sa rawata me vakatataki kemudou ka solia vei kemudou mo doui votavota vata kei ira kecega sa vakasavasavataki.

³³ Au sa sega ni kocova na siliva, se na koula, se nai sulu ni tamata e dua.

³⁴ Dou sa kila talega, ni sa daucakacaka na ligaqu o qo me so na ka e yaga vei au, vei iratou talega eratou sa tiko vei au.

³⁵ Au sa vakatakila vei kemudou na ka kecega, ni sa kili kei kemudou mo dou daucakacaka vakaoqo mo dou vukei ira sa malumalumu, mo dou nanuma talega na vosa ni Turaga ko Jisu, ni sa kaya ko koya, A ka e veivakalougatataki vakalevu me soli ka, ka lailai ga me taura.

³⁶ Ia ni sa vosa oti vakaoqori ko koya, sa tekiduru, ka masu vata kei ira vakaaduaga.

³⁷ A ra sa tagi sara kecega, ka bale ki na domo i Paula, ka reguci koya;

³⁸ a sa rarawa vakalevu na lomadra e na vuku ni vosa ka kaya ko koya, ni ra na sega ni raica tale na matana. A ra sa talatala vua ki waqa.