Cakacaka 19 - AI VOLA TABU

Sa soli na Yalo Tabu vei ira e so sa lotu mai Efeso, 1-7. Sa tiko mai Efeso ko Paula ka dauvunau, ka cakava na ka-mana e vuqa, 8-12. E so na Jiu, a tamata vakatevoro, era sa vakatovolea me ra vakasava tani e dua na tevoro e na yaca i Jisu, a ra sa dredreta, a sa tubu kina na lotu, 13-20. Sa qai vakacacani ira na tamata lotu ko ira e so, 21-41.

¹ A SA yaco ni sa tiko mai Korinica ko Apolosi, sa lako ko Paula ki na yasana vaka kicake, ka yaco ki Efeso: a sa kunea e so sa lotu,

² a sa kaya vei iratou, Sa yaco vei kemudou na Yalo Tabu ni dou sa qai vakabauta, se segai? A ratou sa kaya vua, Keitou sa sega mada ni rogoca se sa yaco na Yalo Tabu, se segai.

³ A sa kaya vei iratou ko koya, Dou sa papitaisotaki beka e na cava? A ratou sa kaya, E na papitaiso i Joni.

⁴ Sa qai kaya ko Paula, E dina ya ka dauveipapitaisotaki ko Joni e na papitaiso ni veivutuni, ka kaya vei ira na tamata, me ra vakabauti koya ena muri koya mai, o koya o qo, ko Karisito Jisu.

⁵ Ia ni ratou sa rogoca, eratou sa papitaisotaki e na yaca ni Turaga ko Jisu.

⁶ Ia ni sa tabaki ira ko Paula e na ligana, sa yaco mai vei ira na Yalo Tabu; a ra sa vosataka na vosa ni veivanua tani, ka dauvakatavuvuli.

⁷ O iratou kecega na tagane eratou sa tinikarua beka.

⁸ A sa lako ko koya ki na vale ni lotu, a sa vosa doudou tikoga ka vula tolu, a sa vakavuvuli ka vakadinadinataka na veika ni matanitu ni Kalou.

⁹ Ia ni ra sa vakalomaqataki e so, ka sega ni vakabauta, ka sa vosavakacacataka na lotu e na matadra na lewe vuqa, sa qai lako tani maivei ira ko koya, ka tawasei ira tani era sa lotu, a sa dauvakatavuvuli tiko e na veisiga e na vale ni wili vola nei Tirano.

¹⁰ A sa kitaka vakakina ka oti e rua na yabaki; ia era sa rogoca kina na vosa ni Turaga ko Jisu ko ira kecega era sa tiko mai Esia, o ira na kai Jutia, kei ira talega na kai Kirisi.

¹¹ A sa kitaka ko na Kalou na ka-mana vakaidina e so e na liga i Paula:

¹² a ra sa kauta tani mai na yagona nai tavoi e so kei nai sulu e so vei ira era tauvi-mate, a sa takali kina na veimate, a sa lako tani maivei ira ko ira na yalo ca.

¹³ Ia ka so na kai Jutia era sa dauveilakoyaki, ka dauia me vakasavi ira na tevoro, eratou sa qai kitaka me ratou cavuta na yaca ni Turaga ko Jisu vei ira ka curuma ko ira na yalo ca, a ratou sa kaya, Keitou sa vakatalai kemudou tani e na yaca i Jisu, o koya sa vunautaka ko Paula.

¹⁴ A ratou sa lewe vitu na luve i Siva na kai Jutia, ka bete levu, eratou sa kitaka vakakina.

¹⁵ Sa qai vosa na yalo ca, ka kaya, O Jisu kaʼu sa kila, o Paula talega kaʼu sa kila; ia ko cei koi kemudou?

¹⁶ A sa rika vei iratou ko na tamata sa tiko vua ko na yalo ca, a sa rawai iratou, ka kaukauwa vei iratou, a ratou sa dro tani kina mai na vale ko ya, a ratou sa luvawale ka vuetaki.

¹⁷ A sa kila na ka o qo ko ira kecega, na kai Jutia kei na kai Kirisi talega, era sa tiko mai Efeso; a sa lutu vei ira kecega na rere, a sa vakabekabei na yaca ni Turaga ko Jisu.

¹⁸ A sa lewe vuqa vei ira sa vakabauta era sa lako mai, ka vakatusa, ka vakatakila na nodrai valavala.

¹⁹ A sa lewe vuqa talega vei ira era daukitaka eliu nai lawaki e so, era sa soqona vata na nodrai vola, ka visa e na matadra kecega; a ra sa wilika vata na kedrai voli, a ra sa kunea ni sa limasagavulu na udolu nai lavo siliva.

²⁰ Sa tubu vakaukauwa vakaoqo na vosa ni Turaga, ka gumatua.

²¹ Ia ni sa oti na veika o qo, sa nakita ko Paula e lomana, me lakovi Masitonia mada kei Akaia, ka qai lako ki Jerusalemi, a sa kaya, Ni kaʼu sa yaco oti kikea, e dodonu meʼu qai raici Roma talega.

²² A sa qai talai rau ki Masitonia na lewe rua na nonai tokani, ko Timoci kei Irasito; a sa tiko vakadede vakalailai ko koya mai Esia.

²³ Ia e na gauna ko ya sa tubu vakalevu na ue e na vuku ni lotu.

²⁴ Ni sa dua na yacana ko Timitirio, a matai ni siliva, sa daucakava e na siliva nai vakatakarakara ni bure kalou nei Tiena, a sa vakalevutaka kina na nodrai yau na matai;

²⁵ ni sa kacivi ira vata, kei ira na tamata era sa daucakacaka vakakina, sa kaya ko koya, Oi kemudou na turaga, dou sa kila ni sa cakacaka o qo eda sa rawata kina na nodai yau.

²⁶ Ia dou sa qai raica ka rogoca, ni sa sega mai Efeso duaduaga, sa vo e lailai ga me oti ko Esia taucoko, era sa lewe vuqa sara kina sa rawata ko Paula o qo, ka saumaka tani, ni sa kaya, era sa sega ni kalou ko ira sa caka e na liga:

²⁷ ia sa voleka ni ca kina na noda cakacaka o qo, ka sega ni koya duaduaga o qo, sa voleka talega me vakawaletaki na bure i Tiena na kalouyalewa levu, ka vakaoti na kena levu, o koya sa soro vua ko Esia taucoko kei vuravura.

²⁸ Ia ni ra sa rogoca, era sa sinai e na cudru, a ra sa qoqolou, ka kaya, Sa levu ga ko Tiena sa nodra na kai Efeso.

²⁹ A sa sinai na koro taucoko e na ue; a ra sa tauri Keio vakaivalu kei Arisitariko, erau sa kai Masitonia, erau sa daulako kei Paula, a ra sa curu vakaukauwa vata ki na bure levu.

³⁰ Ia ni sa via curu ko Paula vei ira na tamata, era sa sega ni vakalaiva ko ira era sa lotu.

³¹ O ira e so era sa turaga mai Esia, era sa nonai to, a ra sa talaki vua, a ra sa masuta me kakua ni doudou me curu ki na bure levu.

³² A ra sa dui qoqolou: ni ra sa ue nai vavakoso lewe vuqa; a sa lewe levu vei ira era sega ni kila se cava era a soqo vata kina.

³³ Ia e so vei ira na lewe vuqa era sa vakaturi Alekisadro cake, ni sa cikevi koya ko ira na Jiu. A sa vakatabataba ko Alekisadro e na ligana, a sa via tusanaki koya vei ira na tamata.

³⁴ Ia ni ra sa kila e kai Jutia ko koya, sa sosoraki vata na domodra ka oti e rua na tiki-ni-siga, ka qoqolou vaka, Sa levu ga ko Tiena na nodra na kai Efeso.

³⁵ Ia ni sa tarovi ira oti na lewe vuqa ko na mata-ni-vanua sa daumaroroya nai vola ni koro, sa kaya, Oi kemudou na kai Efeso, o cei na tamata sa sega ni kila ni sa dausoro na lewe ni koro ko Efeso vua na kalouyalewa levu ko Tiena, kei na matakau sa lutu sobu maivei Jupiteri?

³⁶ E na vuku ni sa sega ni vakatitiqataki rawa na veika o qo, sa dodonu mo dou tiko malua, ka kua ni kitaka vakailoa e dua na ka:

³⁷ ni dou sa kauti ira mai na tamata o qo kike, era sa sega ni daubutako mai na vale ni soro, se vosavakacacataka na nomudou kalouyalewa.

³⁸ Ia kevaka sa via beitaka e dua ko Timitirio, kei ira na matai era sa nonai to, sa ia na veilewai, a sa so na turaga ni veilewai: me ra laʼki veileti.

³⁹ Ia kevaka sa dua tani na ka dou sa taroga, ena lewai e nai vavakoso e vaka na vunau.

⁴⁰ Ni na beitaki beka vei keda na ue, e na vuku ni ka sa yaco edaidai, ni sa sega e dua na ka e vuna eda na tusanaka rawa kina na soqoni vata o qo.

⁴¹ Ia ni sa oti na nona vosa vakaoqo, sa qai vakatalai ira nai vavakoso.