Cakacaka 18 - AI VOLA TABU

Sa lako ki Korinica ko Paula, a sa vunau kina, ka daucakacaka, 1-6. Sa vakacegui koya ko na agilose, 7-11. Era sa kauti koya na kai Jutia vei Kalioni, 12-17. Sa lakova na veikoro e so ko Paula, 18-23. Sa dauvunau ko Apolosi, 24-28.

¹ IA ni sa oti na veika o qo, sa lako tani e Aceni ko Paula, ka yaco ki Korinica;

² a sa kunea kina e dua na kai Jutia a yacana ko Akuila, sa sucu mai Ponito, a sa qai lako walega mai Itali, kei na watina ko Pirisila; (ni sa kaya ko Kilotiu me lako tani e Roma na kai Jutia kecega;) a sa lako vei rau ko koya.

³ Ia e na vuku ni ratou sa matai vata, sa tiko vata kei rau ko koya, ka cakacaka: ni ratou sa matai ni vale-gatu.

⁴ A sa vunau e na vale ni lotu e na veisiga ni vakacecegu kecega, a sa rawai ira na kai Jutia kei ira na kai Kirisi.

⁵ Ia ni sa yaco mai Masitonia ko Seilasi kei Timoci, sa vakayavalati na loma i Paula, a sa dautukuna vei ira na kai Jutia ni sa Karisito ga ko Jisu.

⁶ Ni ra sa qai vorata ka vosavakacaca, sa kuretaka na nonai sulu ko koya, ka kaya vei ira, Ena cala koi kemudou ga e na vuku ni nomudou rusa; au sa tawa cala kina: e na gauna maimuri kaʼu na lako vei ira na veimatanitu tani.

⁷ A sa lako tani eke, ka curu ki na nona vale e dua, a yacana ko Jusitu, a tamata sa rerevaka na Kalou, a sa voleka ki na vale ni lotu na nona vale.

⁸ A sa vakabauta na Turaga ko Kirisipo, na turaga ni vale ni lotu, kei ira kecega na nona lewe-ni-vale; a sa lewe vuqa na kai Korinica ni ra sa rogoca, era sa vakabauta, ka ra sa papitaisotaki.

⁹ Sa qai kaya na Turaga vei Paula e na bogi e na raivotu, Kakua ni rere, mo vosa ga, ka kua ni ko galu;

¹⁰ ni kaʼu sa tiko vata kei iko, ka na sega e dua me kitaki iko me vakacacani iko: ni sa lewe vuqa na noqu tamata e na koro o qo.

¹¹ A sa tiko maikea ko koya ka yabaki dua ka ono na vula, ka dauvakavulici ira e na vosa ni Kalou.

¹² Ia ni sa turaga mai Akaia ko Kalioni, era sa lomavata na Jiu me ra tauri Paula vakaivalu, a ra sa kauta ki na mata ni tikotiko ni veilewai,

¹³ ka kaya, O koya o qo sa vakavulici ira na tamata me ra masu vakatani vua na Kalou ka sega ni vaka na vunau.

¹⁴ Ia ni sa voleka ni dalaga na gusuna ko Paula, sa kaya vei ira na Jiu ko Kalioni, Oi kemudou na Jiu, kevaka sa dua na ka e kovei, se vosalevu ca, e dodonu meʼu vosoti kemudou:

¹⁵ ia kevaka e veiletitaki nai vakavuvuli, kei na veiyaca, kei na nomudou vunau, dou lewa ga; ni kaʼu na sega ni via lewa na veika vakaoqo.

¹⁶ A sa vakasavi ira tani e na mata ni tikotiko ni veilewai.

¹⁷ A ra sa qai tauri Sosiceni na turaga ni vale ni lotu, o ira kecega sa kai Kirisi, ka yavita e na mata ni tikotiko ni veilewai. A sa wele ga ko Kalioni e na ka kecega o qori.

¹⁸ A SA oti o qori sa tiko ga ko Paula ka dede, a sa qai tatau vei ira na veiwekani, ka soko ki Siria, o iratou vata kaya ko Pirisila kei Akuila; a sa tasia mada na uluna mai Kenikiria: ni ka bubului eliu ko koya.

¹⁹ A sa yaco ki Efeso, ka laivi rau kina: a sa curu ko koya ki na vale ni lotu, ka vakavulici ira na Jiu.

²⁰ Ia ni ra sa masuta me tiko dede vei ira, sa sega ni vinakata ko koya;

²¹ a sa tatau ga vei ira, ka kaya, Mai Jerusalemi sa dodonu sara kina meʼu cakava kina na solevu o qo sa voleka ni yaco: ia kaʼu na lesu tale mai vei kemudou, kevaka e vinakata ko na Kalou. A sa soko tani yani e Efeso ko koya.

²² Ia ni sa sobu ki Sisaria, ka lako kicake, ka veikidavaki kei ira nai vavakoso lewe ni soro, sa qai lako sobu ki Anitioki.

²³ Ia ni sa tiko dede vakalailai, sa qai lako tani, a sa lakova vakadodonu voli na vanua ko Kalatia, kei Firijia, a sa vakataudeitaki ira kecega era sa lotu.

²⁴ A SA dua na Jiu na yacana ko Apolosi, sa sucu mai Alekisadria, a tamata sa dauvosa vakavuku, a sa rawata sara me tukuna nai Vola, o koya sa tadu ki Efeso.

²⁵ Sa vakatavulici ko koya o qo e nai vakavuvuli ni Turaga; ia sa katakata na yalona, a sa tukuna ko koya ka vunautaka mamakutu na veika ni Turaga, a sa kila na papitaiso i Joni ga.

²⁶ A sa vakatekivu me vosa doudou e na vale ni lotu: ia ni rau sa rogoca ko Akuila kei Pirisila, erau sa kauta vei rau, a rau sa tukuna vakadodonu cake nai vakavuvuli ni Kalou vei koya.

²⁷ Ia ni sa via lako yani ki Akaia ko koya, era sa vola ko ira na veiwekani, a ra sa masuti ira sa lotu me ra vakacegui koya: ia ni sa yaco kina ko koya, sa vakavuna ko na loloma ni Kalou na nona veivuke vakalevu kei ira era sa vakabauta:

²⁸ ni sa ka kaukauwa votu na nona rawai ira na Jiu, e na veileti kei ira, ka vakatakila mai nai Vola ni sa Karisito ko Jisu.