Cakacaka 16 - AI VOLA TABU

Sa lako ko Paula ki Filipai, a sa lotu kina ko Litia, 1-15. Sa vakasava tani ko Paula na yala ni tevoro sa tiko vua e dua na yalewa, a rau sa biu kina ko Paula kei Seilasi ki na vale ni veivesu, 16-24. Sa veivutuni nai vakatawa, ka vakabauti Jisu, ka papitaisotaki, kei ira kecega na nona lewe ni vale, 25-34. Sa lako tani e na koro ko Paula kei Seilasi, 35-40.

¹ SA qai tadu ko koya ki Teripi kei Lisitira: ka raica, e dua sa lotu sa tiko kina, ko Timoci na yacana, a luvena e dua na yalewa Jiu sa vakabauta; ia ka sa kai matanitu tani na tamana:

² a sa rogorogo vinaka ko koya o qo vei ira na veiwekani mai Lisitira kei Ikoniona.

³ Sa vinakati koya ko Paula me rau lako kaya: a sa kauta mada ka ciliva, e na vukudra na Jiu era sa tiko e na yasana ko ya: ni ra sa kila kecega ni sa kai matanitu kisau na tamana.

⁴ Ia ni rau sa lakova na Veikoro, erau sa solia vei ira, me ra vakabauta, nai vakaro ka lesia ko iratou nai apositolo kei ira na qase sa tiko mai Jerusalemi.

⁵ A sa vakataudeitaki vakakina na veivavakoso lewe ni soro e na vakabauta, a ra sa tubu talega e na veisiga me ra lewe vuqa.

⁶ Ia ni rau sa lakovi Firijia kei na vanua ko Kalatia, a sa tarovi rau na Yalo Tabu me rau kakua ni vunautaka na vosa mai Esia,

⁷ ni rau sa yaco mada ki Misia, erau sa vakatovolea sara me lako ki Picinia: a sa sega ni laivi rau ko na Yalo.

⁸ A rau sa sivi Misia, ka lako sobu ki Tiroa.

⁹ A sa rairai vei Paula na raivotu e na bogi: Sa tu e dua na kai Masitonia, o koya sa masuta, ka kaya, Lako mai ki Masitonia, me vukei keimami.

¹⁰ Ia ni sa raica oti ko koya na raivotu, keitou sa vakatovolea vakusakusa me lako ki Masitonia, ni keitou sa vakananuma e dina sara ni sa kacivi keitou na Turaga me keitou vunautaka vei ira nai tukutuku-vinaka.

¹¹ Ia ni keitou sa vakarewa mai Tiroa, keitou sa vue yani ki Samoceresia, ka e na sabogibogi ki Niapoli;

¹² ia maikea ki Filipai, a koro levu e na yasa i Masitonia ko ya, a koro vaka-Roma: a keitou sa tiko e na koro ko ya ka siga e so.

¹³ Ia e na siga ni vakacecegu keitou sa lako ki nai bili ni koro e na bati ni uciwai, ki na yasana sa daucaka kina na masu; a keitou sa tiko sobu, ka vosa vei ira na yalewa era sa soqoni vata kina.

¹⁴ A sa vakarogoca e dua na yalewa ko Litia na yacana, sa dauvolitaka na ka-damudamu, mai na koro ko Ciateira, o koya sa daumasu ki na Kalou: a sa dolava na yalona ko na Turaga, a sa vakabauta kina ko koya na veika sa tukuna ko Paula.

¹⁵ Ia ni sa papitaisotaki oti ko koya, kei ira talega na nona lewe-ni-vale, sa vakamamasu ko koya, ka kaya, Kevaka dou sa lewa niʼu sa dina vua na Turaga, curu ki na noqu vale, ka tiko kina. A sa cikevi keitou sara ko koya.

¹⁶ A sa yaco, ni keitou sa lako me masu, keitou sa sota kei na dua na vada sa tiko kina na yalo i Piconi, o koya sa dauvakavu-tuniyautaki iratou vakalevu na nona turaga e na nona parofisai lasu:

¹⁷ a sa muri Paula kei keitou ko koya o qo, a sa qoqolou, ka kaya, Sai talatala ni Kalou cecere sara ko iratou na tamata o qo, a ratou sa vakatakila vei keda na sala ni bula.

¹⁸ A sa bogi vuqa ka kitaka tikoga na ka o qo. A sa qai rarawa na loma i Paula, a sa rai vuki, ka kaya vua na yalo, Au sa vakarota vei iko e na yaca i Jisu Karisito mo lako tani mai vua. A sa lako tani sara mai e na tiki-ni-siga ko ya.

¹⁹ Ia ni sa raica ko iratou na nona turaga ni sa takali na ka eratou a vakanuinui kina me levu kina na nodratoui yau, eratou sa tauri Paula kei Seilasi, ka yarataka ki na rara ni veivoli vei ira na turaga;

²⁰ ka kauti rau ki na mataveilewai, ka kaya, Oi rau na tamata o qo, erau kai Jutia, erau sa vakidroataka na noda koro,

²¹ ka vakarota nai valavala e so sa sega ni dodonu vei keda me da vakabauta, se vakamuria, ni da sa kai Roma.

²² Era sa qai tu cake vata vakaivalu vei rau na lewe vuqa: a sa luvata sara na nodraui sulu ko ira na mataveilewai, a ra sa kaya me rau yaviti.

²³ Ia ni ra sa yaviti rau vakalevu oti, era sa biuta ki na vale ni veivesu, a ra sa vakarota vua nai vakatawa me raici rau matua:

²⁴ o koya, ni sa vakaroti vakaoqo, sa biliraki rau ki na tiki ni vale ni veivesu eloma, a sa vauca matua sara na yavadrau e na kau.

²⁵ Ia ni sa lomaloma-ni-bogi na vanua, sa masu ko Paula kei Seilasi, ka sere vua na Kalou; a ra sa rogoci rau ko ira na tamata sa vesu tu.

²⁶ A sa tavuki vakalevu vakasauri na vanua, a sa yavala kina na yavu ni vale ni veivesu: a sa tadola vakasauri kecega nai sogo ni katuba, a sa sereki yadua na kedrai vesu na tamata.

²⁷ A sa yadra mai na moce nai vakatawa ni vale ni veivesu, ia ni sa raica ni sa tadola tu nai sogo ni katuba ni vale ni veivesu, sa ucuna na nonai seleiwau, ka nakita me vakamatei koya, ni sa nanuma ni sa dro tani ko ira na tamata sa vesu tu.

²⁸ A sa kaci e na domo levu ko Paula, ka kaya, Kakua ni ko vakacacani iko: ni keitou sa tiko kecega eke.

²⁹ Sa qai kaciva na veicina ko koya, a sa rika ki loma, a sa sautaninini mai, a sa bale sobu e na mata i Paula kei Seilasi,

³⁰ a sa kauti rau ki tuba, ka kaya, Oi kemudrau na turaga, a cava meʼu kitaka meʼu bula kina?

³¹ A rau sa kaya, Vakabauta na Turaga ko Jisu Karisito, o na bula kina, kei ira talega na nomu lewe-ni-vale.

³² A rau sa tukuna vua na vosa ni Turaga, vei ira kece talega era sa tiko e nona vale.

³³ A sa kauti rau ko koya e na tiki-ni-bogi ko ya, a sa quaraka na we ni kuita; a sa papitaisotaki sara, ko koya kei ira kecega na kai nona.

³⁴ Ia ni sa kauti rau oti ki nona vale, sa viritu na kakana e na matadrau, a sa reki, ni sa vakabauta na Kalou, vata kei ira kecega na nona lewe-ni-vale.

³⁵ Ia ni sa siga mai, era sa tala nai talatala ko ira na mataveilewai, ka kaya, Vakalaivi rau na tamata o qori me rau lako.

³⁶ A sa tukuna vei Paula na vosa o qo nai vakatawa ni vale ni veivesu, Sa talaki mai na mataveilewai mo drau vakalaivi me lako: drau qai cavu yani, ka lako e na vakacegu.

³⁷ A sa kaya vei ira ko Paula, Era sa yaviti keirau votu ka ra sa sega ni lewai keirau mada eliu, ia sa kai Roma koi keirau; a ra sa biuti keirau ki na vale ni veivesu; a ra sa qai biuti keirau vuni tani, ne? me kakua sara; ia me ra lako ga mai ka kauti keirau yani ki tuba.

³⁸ A sa tukuna ko ira nai talatala na vosa o qo vei ira na mataveilewai; era sa qai rere, ni ra sa rogoca erau sa kai Roma.

³⁹ A ra sa lako mai ka masuti rau, ka kauta ki tuba, ka vakamamasu me rau lako tani yani e na koro.

⁴⁰ A rau sa lako tani kina e na vale ni veivesu, ka curu ki na vale i Litia: ia ni rau sa raici ira na veiwekani, erau sa vakacegui ira, ka lako yani.