Cakacaka 12 - AI VOLA TABU

Sa vakacacani ira na lewe ni soro ko Eroti, ka vakamatei Jemesi; a sa biuti Petero ki na vale ni veivesu, a sa vakabulai koya ko na agilose, ni sa masulaka ko ira nai vavakoso lewe ni soro, 1-19. Ni sa viavia kalou ko Eroti, sa vakamatei koya e dua na agilose ni Turaga, 20-23. Sa qai tubu vakalevu na vosa ni Kalou, 24, 25.

¹ IA e na gauna ko ya sa kitaka ko Eroti na tui me vakararawataka e so vei ira nai vavakoso lewe ni soro.

² A sa vakamatei Jemesi na tuaka i Joni e nai seleiwau.

³ Ia ni sa raica ni sa vinakata ko ira na Jiu, sa qai tauri Petero talega. (Ia sa gauna ni ka tawa-leveni.)

⁴ O koya, ni sa vauca, sa biuta ki na vale ni veivesu, a sa solia ki na matai valu e va eratou dui le va, me ratou vakatawai koya; ni sa nanuma me kauta vei ira na tamata, ni sa oti na solevu ni lako-sivia.

⁵ A sa vakatawai kina ko Petero e na vale ni veivesu; a ra sa daumasulaki koya tiko ki na Kalou ko ira nai vavakoso lewe ni soro.

⁶ Ia ni sa nanuma ko Eroti me kauta mai, e na bogi ga ko ya sa moce ko Petero e na kedrau maliwa e lewe rua na tamatai valu, a sa vesu e na sinucodo e rua; a ra sa tu nai vakatawa e na mata ni katuba, me ra vakatawa na vale ni veivesu.

⁷ Ka raica, sa dua na agilose ni Turaga sa lako mai, a sa cila mai na rarama ki na vale ni veivesu; a sa tavia ko koya na sarisari i Petero, a sa vakaduria cake, ka kaya, Tu kusarawa cake. A sa lutu tani e na ligana na nona sinucodo.

⁸ A sa kaya na agilose vei koya, Vauca na nomui sulu, ka vauca na nomui vava. A sa kitaka vakakina. A sa kaya vua, Ovici iko e na nomui tutuvi, ka muri au.

⁹ A sa lako ki tautuba ko koya, a sa muri koya; a sa sega ni kila ni sa dina na ka sa cakava ko na agilose; a sa nanuma ga ni sa raica na raivotu.

¹⁰ Ia ni rau sa sivi iratou nai matai ni vakatawa kei iratou nai karua, erau sa yaco ki nai sogo kaukamea sa basika ki na koro; a sa tadola vakai koya walega vei rau: a rau sa lako sara ki tuba; ka sivia e dua na gau-ni-sala; a sa qai lako tani vakasauri vua ko na agilose.

¹¹ Ia ni sa qai kila yalona ko Petero, sa kaya, Au sa qai kila dina sara, ni sa vakatala mai na nona agilose ko na Turaga, a sa vakabulai au mai na liga i Eroti, mai na nodrai naki kece talega na kai Jutia.

¹² Ia ni sa vakananuma tiko, sa yaco ko koya ki na vale i Meri na tina i Joni, a yacana talega ko Marika; era sa lewe vuqa sa soqoni vata kina me masu.

¹³ Ia ni sa tukituki ko Petero ki nai sogo ni matamata-ni-koro, sa qai lako e dua na vada me vakarorogo, a yacana ko Rota.

¹⁴ Ia ni sa kila na domo i Petero, sa sega mada ni dolava nai sogo ni sa reki, a sa cici sara ki loma, ka tukuna ni sa wavu tu ko Petero e na matamata-ni-koro.

¹⁵ A ra sa kaya vua, O sa lialia. A sa vakadinadina ko koya ni sa vaka ga kina. A ra sa qai kaya, Ena sa nona agilose.

¹⁶ A sa tukituki tikoga ko Petero: ia ni ra sa dolava, era sa raica, ka kidacala.

¹⁷ A sa vakatabatabataki ira ko koya e na ligana me ra tiko lo; a sa tukuna vei ira ni sa kauti koya mai na vale ni veivesu ko na Turaga. A sa kaya, Laʼki tukuna na veika o qo vei Jemesi, vei ira talega na veiwekani. Sa qai lako tani ko koya, a sa lako ki na dua tani na yasana.

¹⁸ Ia ni sa siga, sa sega ni lailai na nodra kidroa na tamatai valu, se sa lako beka kivei ko Petero.

¹⁹ Ia ni sa vakasaqara ko Eroti, ka sega ni kunea, sa tarogi ira nai vakatawa, a sa kaya me ra vakamatei. A sa lako sobu ko koya mai Jutia ki Sisaria, ka tiko kina.

²⁰ A sa cudru vakalevu ko Eroti vei ira na kai Teiri kei Saitoni; a ra sa qai lomavata ka ra lako mai vei koya; ia ni ra sa rawai Pilasito oti, o koya sa lewa na vale ni moce nei Eroti, me vukei ira, era sa masuta na veivinakati; e na vuku ni sa vakani na nodra vanua mai na nona na tui.

²¹ Ia ni sa yaco na siga sa lokuci, sa qai vakaisulu ko Eroti e nai sulu vakaturaga, a sa: tiko e nai tikotiko vakaturaga, a sa vunau vei ira.

²² Sa qai qolouvaka ko ira na tamata, Sa domona na kalou, sa sega ni nona na tamata.

²³ A sa yaviti koya vakasauri e dua na agilose ni Turaga, e na vuku ni sa sega ni vakarokorokotaka na Kalou ko koya; a sa kani koya na baca, a sa ciba ko koya.

²⁴ Ia ka sa tubu ga na vosa ni Kalou me levu sara mai.

²⁵ A rau sa lako tale mai Jerusalemi ko Parinapa kei Saula, ni rau sa vakaotia na cakacaka, a rau sa kauti Joni, a yacana talega ko Marika.