Cakacaka 10 - AI VOLA TABU

E dua na agilose ni Kalou sa rairai vei Korinilio, ka vakavulica me lakovi Petero, 1-8. Era sa lako ki Jopa na nona tamata, a sa raica na raivotu ko Petero mai Jopa, 9-18. Sa lako ki Samaria ko Petero, ka vunautaki Jisu vei Korinilio kei ira na wekana, 19-48.

¹ SA dua na tamata mai Sisaria, ko Korinilio na yacana, a nodra turaga na matai valu sa vakayaca vaka-Itali,

² a tamata daulotu, a sa rerevaka na Kalou, vata kei ira kecega na nona lewe ni vale, a sa dausolia vakalevu na ka-ni-loloma vei ira na tamata, a sa daumasu vua na Kalou e na veisiga.

³ Sa raica ko koya e na raivotu, e nai kaciwa ni tiki-ni-siga, e dua na agilose ni Kalou ni sa curu vua, a sa kaya vua, I Korinilio.

⁴ Ia ni sa vakaraica, sa rerevaka, ka kaya, A cava o qori, Turaga? A sa kaya vua ko koya, A nomu masu kei na nomu ka-ni-loloma sa lako cake ki na mata ni Kalou mo nanumi kina:

⁵ ia mo tala na tamata e so ki Jopa, me lakovi Saimoni, a yacana talega ko Petero:

⁶ sa tiko vata ko koya kei Saimoni na matai ni kuli-ni-manumanu, sa tu na nona vale e baravi: ena tukuna vei iko ko koya na ka e dodonu mo cakava.

⁷ Ia ni sa lako tani na agilose ka vosa vei Korinilio, sa qai kaciva e lewe rua na nona lewe ni vale, kei na tamatai valu sa daulotu, e le dua vei ira sa dauqaravi koya:

⁸ ia ni sa tukuna vei iratou na ka kecega, sa talai iratou ki Jopa.

⁹ Ia e na sabogibogi, ni ratou sa lako e na gau-ni-sala, ka toro voleka ki na koro, sa cabe cake ki na dela ni vale ko Petero me masu e nai kaono ni tiki-ni-siga;

¹⁰ a sa viakana sara, ka garova na ka me kania; ia ni ra sa vakarau tiko, sa raivotu vei koya,

¹¹ a sa raici lomalagi ni sa tawase rua, a sa dua na ka sa lako sobu mai vua, sa vaka nai tutuvi levu sa buki na tutuna e va, a sa tukuci sobu mai ki vuravura;

¹² a sa tiko kina na manumanu ni vanua e yavai va e dui nodra veimataqali kecega, kei na manumanu kila, kei na veika sa dauqasi voli, kei na manumanu ni lagi.

¹³ Sa qai lako mai vua na vosa, Tu cake, Petero; mo vakamatea, ka kania.

¹⁴ A sa kaya ko Petero, Kakua, Turaga; niʼu a sega ni kania na ka sa tabu se tawa-savasava.

¹⁵ A sa vakarua tale vua na vosa, A ka sa vakasavasavataka ko na Kalou, mo kakua ni vaka e tabu.

¹⁶ A sa caka vakatolu na ka o qo: a sa qai kau tale na ka ki lomalagi.

¹⁷ Ia ni sa taqaya tiko na loma i Petero, se cava na ka sa raica e na raivotu, raica, sa taroga na vale i Saimoni ko iratou na tamata sa tala ko Korinilio, a ratou sa tu e na matamata-ni-koro;

¹⁸ a ratou sa kaci, ka taroga, se sa tiko ekeri ko Saimoni, a yacana talega ko Petero, se segai.

¹⁹ Ia ni sa vakananuma tiko na raivotu ko Petero, sa kaya na Yalo vei koya, Raica, e tolu na tamata sa vakasaqarai iko.

²⁰ Mo tu cake kina ka lako sobu, ia mo lako vata kei iratou, me kakua ni veileti na lomamu: niʼu sa talai iratou mai.

²¹ Sa qai lako sobu ko Petero vei iratou na tamata sa tala ko Korinilio vei koya; a sa kaya, Raica, oi au ga o qo dou sa vakasaqara: a cava na vu ni nomudou lako mai?

²² A ratou sa kaya, Sa dua na agilose yalosavasava sa vakatakila vei Korinilio, e dua na turaga ni valu, a tamata yalododonu, ka sa rerevaka na Kalou, a sa rogorogo vinaka vei ira kecega na kai Jutia, me lakovi iko, mo mai lako ki nona vale, me rogoca vei iko na vosa ko koya.

²³ Sa qai kacivi iratou mai ko koya, ka karoni iratou. Ia e na mataka sa lako vata kei iratou ko Petero, ka sa lako kaya e so na veiwekani mai Jopa.

²⁴ Ia e na bogi rua eratou sa curu ki Sisaria. A sa waraki iratou ko Korinilio, a sa vakasoqoni ira vata oti na kai nona kei na wekana dina.

²⁵ Ia ni sa curu ko Petero, sa veitata kei koya ko Korinilio, a sa bale sobu ki yavana, ka cuva.

²⁶ A sa vakaduria cake ko Petero, a sa kaya, Tu cake; au sa bau tamata talega koi au.

²⁷ A rau sa veivosaki kaya, a sa qai curu ki loma, a sa kunei ira na lewe vuqa era sa soqoni vata mai.

²⁸ A sa kaya vei ira ko koya, Dou sa kila ni sa ka tabu vua na kai Jutia me tiko vata, se toro voleka vua na tamata sa matanitu tani; ia sa vakatakila ga vei au na Kalou meʼu kakua ni vakatoka e dua na tamata me tabu se tawa-savasava.

²⁹ O koya ga o qo kaʼu sa lako mai kina ka sega ni veileti, niʼu sa lakovi yani; au sa taroga kina se na vuku ni cava dou sa lakovi au yani kina.

³⁰ A sa kaya ko Korinilio, Sa qai oti ga e va na bogi kaʼu a lolo ka yacova na tiki-ni-siga o qo; e nai kaciwa ni tiki-ni-siga kaʼu a masu e na noqu vale, ka raica, sa dua na tamata sa tu e mataqu sa vakaisulu lumilumisa,

³¹ a sa kaya, Korinilio, sa rogo na nomu masu, a sa vakananumi na nomu ka-ni-loloma e na mata ni Kalou:

³² o koya ga o qo mo qai talaki ki Jopa, ka lakovi Saimoni mai, a yacana talega ko Petero; sa tiko ko koya e na vale i Saimoni na matai ni kuli-ni-manumanu mai na baravi: ni sa lako mai ko koya, ena vosa vei iko.

³³ O koya ga o qo kaʼu sa talaki vakasauri kina vei iko; ia ko sa caka vinaka ni ko sa lako mai. Keimami sa qai tiko kecega eke e na mata ni Kalou, me keimami rogoca na ka kecega sa vakarota vei iko ko na Kalou.

³⁴ Sa qai dalaga na gusuna ko Petero, ka kaya, E dina kaʼu sa qai kila ni sa sega ni vinakati ira vakailoa na tamata ko na Kalou:

³⁵ ia e na veivanua kecega sa vinaka vua ko koya sa rerevaki koya, ka caka dodonu.

³⁶ Ai vakavuvuli sa tukuna ko koya vei ira na luve i Isireli, ni sa vunautaki na veivinakati e ua vuku i Jisu Karisito: (o koya ga sa Turaga e na ka kecega:)

³⁷ ai vakavuvuli ko ya, dou sa kila, sa vunautaki mai Jutia taucoko, a sa vakatekivuni mai Kalili, ni sa oti na papitaiso ka vunautaka ko Joni;

³⁸ ni sa lumuti Jisu na kai Nasareci ko na Kalou e na Yalo Tabu kei na kaukauwa: o koya ka lako voli ka daucaka vinaka, a sa vakabulai ira kecega sa vakasaurarataki ira ko na tevoro; ni sa tiko kaya ko na Kalou.

³⁹ Ia keitou sa yaco me dautukutuku e na ka kecega ka cakava ko koya e na nodra vanua na kai Jutia, mai Jerusalemi talega; o koya era sa vakamatea ni ra sa vakarubeca e na dua na kau:

⁴⁰ sa vakaturi koya cake ko na Kalou e nai katolu ni siga, a sa vakatakilai koya votu;

⁴¹ e segai vei ira na tamata kecega, vei ira ga ka digitaka eliu ko na Kalou, me ra dautukuna, io vei keitou, koi keitou a kana ka gunu kaya ni sa tu cake oti tale mai na mate ko koya.

⁴² A sa vakarota vei keitou me keitou vunau vei ira na tamata, ka vakadinadina ni sai koya ga ka lesia eliu ko na Kalou me lewai ira na bula kei ira na mate.

⁴³ O koya era sa dautukuna ko ira kecega na parofita, ni na bokoci e na vuku ni yacana na nodrai valavala ca na tamata kecega era sa vakabauti koya.

⁴⁴ Ni sa tukuna tiko ko Petero na vosa o qo, sa lutu ko na Yalo Tabu kivei ira kece era sa rogoca na vosa.

⁴⁵ Ia ko iratou sa cili ka sa vakabauta, o iratou kecega eratou sa lako vata kei Petero, eratou sa kidacala, ni sa sovaraki na Yalo Tabu nai solisoli kivei ira talega era sa matanitu kisau.

⁴⁶ Ni ratou sa rogoci ira ni ra sa vosataka na vosa ni veivanua tani, ka vakarokorokotaka na Kalou. Sa qai kaya ko Petero,

⁴⁷ Sa dua beka na tamata me bureitaka na wai, me kakua ni papitaisotaki ko ira na tamata o qo, era sa rawata na Yalo Tabu me vakataki keda?

⁴⁸ A sa qai kaya me ra papitaisotaki e na yaca ni Turaga. A ra sa qai masuta me tiko me oti mada na veisiga e so.