Cakacaka 1 - AI VOLA TABU

A WASE I. —Sa yalata na Yalo Tabu kivei iratou na nona tisaipeli ko Jisu, 1-8. Sa rairai mai vei iratou na agilose e rua, ni sa kau cake ko Jisu ki lomalagi, a rau sa tukuna ni na lako tale mai emuri ko koya, 9-11. Eratou sa soqoni vata ki Jerusalemi ka daumasu, 12-14. Sa digitaki ko Maticeia mei apositolo, mei sosomi kei Juta, 15-26.

¹ AU a cakava nai vola eliu, Ciofilo, e na ka kecega sa vakatekivu me cakava ka vakatavulica ko Jisu;

² ka yacova na siga sa kau cake kina ko koya, ni sa oti na nona vosa e na Yalo Tabu vei iratou nai apositolo, o iratou ka digitaka ko koya:

³ o iratou sa vakatakilai koya talega kina ko koya, ni sa bula, e nai vakatakilakila e vuqa, ni sa oti na nona mate, a sa daurairai vei iratou ka bogi vasagavulu, a sa vosataka na veika ni matanitu ni Kalou.

⁴ Ia, ni sa dausoqoni vata kei iratou, sa vakarota me ratou kakua ni biuti Jerusalemi, me ratou waraka ga na vosa ni yalayala i Tamana, a ya, sa kaya ko koya, dau a rogoca maivei au:

⁵ e dina ka dauveipapitaiso ko Joni e na wai; ia ni sa sega ni oti e vuqa na bogi, dou na papitaisotaki e na Yalo Tabu.

⁶ Ni ratou sa qai soqoni vata tu, eratou sa tarogi koya, ka kaya, Turaga, o na cakavi ira tale na Isireli me ra vakamatanitu e na gauna o qo, se segai?

⁷ A sa kaya vei iratou ko koya, Sa sega ni nomudou me kila na kena gauna, se na kena yabaki, sa veitalia duaduaga kina ko Tamaqu:

⁸ ia dou na rawata na kaukauwa, ni sa lako mai vei kemudou na Yalo Tabu; dou na qai dautukuni au mai Jerusalemi, kei Jutia taucoko, kei Samaria, ka yacova nai yalayala kei vuravura.

⁹ Ia ni sa tukuna oti ko koya na veika o qo, sa qai kau cake, ni ratou sa vakaraica tu; a sa dua na o sa kauti koya tani e matadratou.

¹⁰ Ia ni ratou sa rai matua ki lomalagi, ni sa lako yani ko koya, raica, e rua na tamata sa tu voleka vei iratou erau vakaisulu vulavula,

¹¹ a rau sai kaya, Oi kemudou na kai Kalili, dou sa tu ka rai matua ki lomalagi e na vuku ni cava? o Jisu o qo o koya sa kau tani cake vei kemudou ki lomalagi, ena lako mai vakakina me vaka dou sa raici koya ni sa lako ki lomalagi.

¹² Eratou sa qai lesu tale ki Jerusalemi mai na ulu-ni-vanua sa vakayaca ki na veiolive, sa voleka ki Jerusalemi me vaka ga na kena yawa ni lakolako e na dua na siga ni vakacecegu.

¹³ Ia ni ratou sa curu ki loma, eratou sa cabe ki nai taba loma ni vale ecake, eratou sa dautiko kina, io, ko Petero, kei Jemesi, kei Joni, kei Adriu, o Filipo, kei Tomasi, o Paricolomiu, kei Maciu, o Jemesi na luve i Alifio, kei Saimoni e dua vei ira sa vakatokai Na gumatua, kei Juta na taci i Jemesi.

¹⁴ Eratou sa gumatua kecega ko iratou o qo, a ratou sa lomavata e na kerekere kei na daumasu, kei iratou talega na yalewa, kei Meri na tina i Jisu, kei iratou na tacina.

¹⁵ Ia e na gauna ko ya, sa tu cake kina ko Petero e na kedra maliwa na tisaipeli, (ni sa wili vata na yacadra era sa dua beka na drau ka ruasagavulu,) a sa kaya,

¹⁶ Oi kemudou na veiwekani, e dodonu me vakayacori na tiki-ni-vola o qo, a ya ka vosataka eliu na Yalo Tabu e na gusu i Tavita, e na vuku i Juta, o koya ka liutaki ira era sa tauri Jisu:

¹⁷ ni sa wili vata kei keitou ko koya, a sa lesi ki na cakacaka o qo. [

¹⁸ Ia ko koya o qo sa volia e dua na tiki-ni-vanua e nai voli ni valavala ca ko ya; a sa lutu ka saumakidule kira, a sa kacabote na boto ni ketena, a sa kasabura kecega na nona wawa:

¹⁹ a sa kilai na ka o qo vei ira kecega sa tiko mai Jerusalemi: a sai vakatokai kina na tiki-ni-vanua ko ya e na nodra vosa, Akelitama, o koya ko ya, Na vanua ni dra.]

²⁰ Ni sai volai e nai vola ni Veisere, Me lala didi mai na nona vale, ia me kakua na tamata me tiko kina: ia, Me dua tani me taura na nonai tavi.

²¹ O koya sa dodonu kina, maivei ira ua tamata era sai dausoqo vata kei keda e na gauna taucoko sa tiko kina kei keda na Turaga ko Jisu,

²² sa vakatekivu mai na papitaiso i Joni, ka yacova na siga sa kau tani cake kina vei keda ko koya, me dua vei ira o qo me lesi me tukuna vata kei kedatou na nona tu cake tale mai.

²³ A ra sa lesia e lewe rua, o Josefa sa vakatokai ko Parisapa, a yacana talega ko Jusitu, kei Maticeia.

²⁴ Era sa qai masu, ka kaya, O iko, Turaga, ko sa kila na yalo ni tamata kecega, mo vakatakila mai se ko cei vei rau o qo ko sa digitaka,

²⁵ me nonai tavi na cakacaka vakaiapositolo o qo, sa sivo tani maikina vakaca ko Juta, me lako ki na nona yasana.

²⁶ A ra sa qai dui tara na madigi vola e na vukudrau, a sa bale vei Maticeia nai vola; a sa wili vata kina ko koya kei iratou nai apositolo e tinikadua.