Apakuki 3 - AI VOLA TABU

A masu i Epakuki, 1-16. Sa dauvakararavi ko koya vua na Kalou, 17-19.

¹ A MASU i Epakuki na parofita: a meke e na veivakasevi.

² I Jiova, au a rogoca na kemui rogorogo; kaʼu a rere: I Jiova, a nomu cakacaka mo vakabulabulataka e na veimama ni gauna, e na veimama ni gauna mo vakatakila mai; ni sa ia na cudru, mo nanuma na yalololoma.

³ A Kalou, sa lako mai Temani, io ko koya sa Yalosavasava, mai na ulu-ni-vanua ko Perana. Sela. Sa ubia na mata-ni-lagi na nonai ukuuku, ia e na vakavinavinaka vei koya sa sinai ko vuravura.

⁴ Ia na kenai serau sa vaka na rarama; ka cila mai na ligana: ia maikea sa tabonaki ga na nona kaukauwa.

⁵ Sa liutaki koya na mate dauveitauvi, a sa muri koya na mate waqawaqa.

⁶ Sa tu ko koya, ka vakarauti vuravura; sa vakararai ko koya, ka dui veiseyaki ira na veimatanitu; a sa duibiubiuti na veiulu-ni-vanua makawa, ka cuva sobu na veiulu-ni-koro ka tu mailiu: sa tawa mudu na nona cakacaka.

⁷ Ni sa rarawa sara mai kaʼu a raica na veivale malo i Kusani; sa yavavala na gatu ni vanua ko Mitiani.

⁸ Sa ki na uciwai li ka ca kina na yalomu, Jiova? sa ki na uciwai li ka ia kina na nomu cudru? sa ki na waitui li ka ia kina na nomu veilesavi, ko a vodoka kina na nomu ose, na nomu vale-vodoki dauveivakabulai?

⁹ Sa ucuni sara na nomu dakai, me vaka na vosavavakini vei ira na veimataqali, io na nomu vosa. Sela. O a basia na vanua me uciwai.

¹⁰ Ni sa raici iko, sa sautaninini na veiulu-ni-vanua; sa vuabale mai na dobui; sa tabalaka na domona na wasa titobu, sa dodoka kicake na ligana.

¹¹ Na siga kei na vula sa sudra yani ki na kedraui tikotiko, ni sa cila na nomu gasau e vuka, ka serau na nomu moto makamakalivata.

¹² Ni ko cudru, ko a lako voli yani e vuravura; ni ko lesa, ko a butuqaqia na veimatanitu.

¹³ O a lako yani me vakabulai ira na nomu tamata, me vakabulai ira ko a lumuta; o a vuetaka sara na ulu ni mataqali valavala ca, ka vakarairaitaka na vuna, io, ki na vu ni domona. Sela.

¹⁴ O a laubasikataki ira e na nona moto dina na ulu ni nona veikoro qali, sa ra cici vaka-covulaca mai me vakasevi au: sa nodra ka ni reki me kani ira lo era malumalumu.

¹⁵ O a lako ga e na loma ni wasawasa, o iko kei na nomu ose, e nai soqosoqo ni wai levu.

¹⁶ Au a rogoca, ka rise na bati ni ketequ; ni sa rogo mai, sa yavala kina na tebenigusuqu: sa curu na vuca ki suiqu, au a sautaninini tu e yavaqu: ia kaʼu na vakacegu ga e na siga ni rarawa, ni ra lako cake mai na lewe ni vanua era na mai kabai keimami.

¹⁷ Ia na lolo, ke sa tawa seraki, ka sega na vuana na veivaini, ke sa yali na vua ni olive, na veiwere talega, ke sa tawa tubura na kakana; ke muduki tani mai na bai na qele ni sipi, ka sega na karavau e na loma ni bai:

¹⁸ keʼu na rekitaki Jiova ga, kaʼu na marautaki koya na Kalou, na noqui Vakabula.

¹⁹ Sai Jiova na Turaga e sa noqu kaukauwa, ena cakava na yavaqu mo vaka, na nodra na koti kila, ia e na noqu veitikina cecere ena kauti au tale mai ko koya. Vua na domo-ni-meke e na Nikinoca.