Apakuki 2 - AI VOLA TABU

O Epakuki, ni sa waraka tiko na vosa ni Kalou, sa vakavulici me waraka na kena vakayacori, e na yala e vakabauta, 1-4. Ena cudruvi na kai Kalitea e na vuku ni nodra daukocova na veivanua, 5-8, kei na nodra domonikoco, 9-11, kei na nodrai valavala kaukamea, 12-14, kei na tawa bau vakacegu nai valu, 15-17, kei na dauqarava na kalou lasu, 18-20.

¹ E NA noqui tutu i vakatawa kaʼu na tu ga, ia kaʼu na tiko ga e na dela ni bai kaukauwa, ia kaʼu na vakatawa tiko meʼu raica na ka ena kaya mai vei au ko koya, kei na ka meʼu kaya yani niʼu sa vunauci.

² A sa vosa vei au ko Jiova, ka kaya, Mo vola na raivotu, me macala e na rara ni volavola, me cici vaka ko koya sa wilika.

³ Ni na dede mada na raivotu a qai yaco na kenai loku, ia ni sa yaco nai otioti ni gauna, ena qai vosa, ena sega ni lasu: kevaka ena berabera, mo waraka ga; ena yaco vakaidina ga, ena sega ni berabera sara.

⁴ Raica, o koya sa viavialevu sa sega ni dodonu na yalona e lomana: ia ko koya sa yalododonu ena bula e na nona vakabauta.

⁵ Ia na waini talega sa ka dauveivakaisini, a tamata viavialevu talega sa tawa tiko mai vale, sa vakalevutaka ga na nona domonikoco me vaka nai bulubulu, io, sa vakataki mate, sa sega ga ni mamau rawa; a sa vakasoqona vata me nona na veimatanitu kecega, a sa kumuna vata me nona kecega na veimataqali:

⁶ o ira kece o qo, me ra sega beka ni taurivaka e dua na kena meke, io, e dua na kenai bole vakaibalebale? ka kaya, Ena ca ko koya sa vakalevutaka na ka sa sega ni nona! a cava na kena dede? ka bitaki koya e na qele vavaku!

⁷ Ena sega li ni vakidacala na nodra tu cake era na kati iko, ka yadra mai era na tauri iko, ia ko na qai yaco me nodrai toki ni valu?

⁸ Ia ko iko, ni ko sa vakacacana na veimatanitu e vuqa, ena vakacacani iko kina ko ira kece na vo ni veimataqali; e na vuku ni kedra dra na tamata, kei nai valavala vakausausa e caka ki na vanua, kei na koro, kei ira kecega era tiko kina.

⁹ Ena ca ko koya sa kocova vakaca nai yau me nodra na nona mataqali, me tauyavutaka kicake na nona sova, me maroroi kina ko koya mai na kaukauwa ni ca!

¹⁰ O sa bosea na ka ena madua kina na nomu mataqali, ni ko sa muduka tani na veimataqali e vuqa, ka sai valavala ca ki na yalomu dina.

¹¹ Ni na kaci na vatu mai na lalaga ni vale, ia na vatu-buli mai na loma ni kau ni vale ena rogo yani kina.

¹² Ena ca ko koya sa tara na koro e na dra, ka vakataudeitaka na koro e na caka cala!

¹³ Raica, sa sega li maivei Jiova ni lewe vuqa era na oca kina na veimataqali me kena na buka, io, na veimatanitu era na veivakaocataki vakai ira e na vuku ni ka wale sara?

¹⁴ Ni na sinai ko vuravura e na kila nai ukuuku i Jiova, me vaka ni sa ubia na wasa titobu na wai.

¹⁵ Ena ca ko koya sa vagunuva na kai nona, io, ko iko sa sovaraka na nomu cudru, ka sa vakamatenitaki ira talega, mo sa raica kina na nodra luvawale!

¹⁶ O sa vakamamautaki e na madua ka sega e na lagilagi; mo gunu ko iko talega me votu mai na nomu tawa cilivi; ena lako voli sara vei iko na bilo e na liga i matau i Jiova, ia na veivakamaduataki velavela ena tabonaka na nomu lagilagi.

¹⁷ Ia na nomui valavala vakausausa mai Lipanoni ena ubi iko, me vaka na kedra veivakacacani na manumanu sa vakadomobulataki ira, e na vuku ni kedra dra na tamata, kei nai valavala vakausausa e caka ki na vanua, kei na koro, kei ira kecega era tiko kina.

¹⁸ A cava na kena yaga na matakau ceuceu sa ceuta na kena matai; na matakau e vakawaicalataki, kei nai vakavuvuli daulasu, me sa vakararavi li na kena matai e na nona cakacaka, ni sa cakava na matakau galu?

¹⁹ Ena ca ko koya sa kaya ki na kau, Mo yadra mai! Mo tu cake! ki na vatu galu. Me vakavuvuli li na ka ko ya? Raica, sa botani e na koula kei na siliva, ia na cegu, sa sega sara ga e lomana.

²⁰ Ia ko Jiova sa tiko e na nona vale tabu: me vakadirorogo e matana ko vuravura kecega.