Aisea 9 - AI VOLA TABU

Ni sa ka levu sara na butobuto, ena qai sucu mai na Karisito me rarama levu, 1-7. Era na cudruvi na Isireli e na vuku ni nodra viavialevu, 8-12, kei na nodra lotu vakailasu, 13-17, kei na nodra tawa veivutuni, 18-21.

¹ IA ena tawa butobuto tu ga ko koya sa vakararawataki o qo: me vaka ni sa beci eliu na vanua ko Sepuloni kei na vanua ko Nafitali, ena vakarokorokotaki e na gauna maimuri na yasayasa vakawaitui, na bati ni Joritani, ko Kalili ni veimatanitu.

² O ira na tamata ka lako e na butobuto, era sa raica na rarama levu; vei ira sa tiko e na yasana ni yaloyalo ni mate sa cadra cake kina na rarama.

³ O sa qai vakalevutaka na matanitu, o sa vakaikuritaka na kena marau; era sa marau e matamu me vaka na marau ni sa cava na yabaki, ka vaka na nodra marau era sa vota nai toki ni valu.

⁴ Io na nonai savenaki bibi, kei nai vua ni domona, kei nai titoko i koya ka vakasaurarataki koya, ko sa musuka me vaka e na siga i Mitiani.

⁵ Io na nodrai yaragi kecega na dauia nai valu kei na kaila ni valu, kei nai sulu sa vakatatoqitoqi e na di a, ena ka ga me visa, me buka ni buka waqa.

⁶ Ni sa sucu mai e dua na gone me noda, sa soli mai vei keda e dua na goneatagane: ena virikotori ki tabana na lewa: ena vakatokai na yacana ko Veivakidacalataki, ko Vakavuvuli, na Kalou kaukau wa, na Tama ni gauna tawa mudu, na Tui ni Sautu.

⁷ Ena tawa oti na kena tubu na nona lewa kei na sautu, e nai tikotiko vakaturaga i Tevita, kei na nona matanitu, me vakataudeitaka, ka vakaukauwataka e na lewa dodonu kei nai valavala dodonu mai na gauna o qo ka yacova na gauna kecega. A lomakatakata i Jiova ni lewe vuqa ena cakava na ka o qo.

⁸ SA tala na vosa na Turaga kivei ira na Jekope, a sa tauci ira na Isireli.

⁹ Ena kila kina ko ira na tamata kecega, na Ifireimi kei na kai Samaria, era sa kaya e na viavialevu kei na kaukauwa ni lomadra,

¹⁰ Sa bale sobu na vatu-buli, ia e na vatu sa ta eda na qai tara tale kina: sa ta sobu na lolo, ia eda na qai vakaisosomitaka e na sitari.

¹¹ Ia ko Jiova ena qai vakalevulevui ira na meca i Risina me vala vei ira, ena qisi ira talega na nodra meca dina me ra to vata kei ira;

¹² o ira na kai Siria mai cake, kei ira na kai Filisitia mai ra; a ra na tilomi ira sara na Isireli. E na ka kece o qo sa sega ga ni lesu tani kina na nona cudru, ka sa laveti tu ga na ligana.

¹³ Ia ni ra sa sega ni lesu mai na tamata vei koya sa yaviti ira, a ra sa sega ni qaravi Jiova ni lewe vuqa:

¹⁴ ena muduka tani kina ko Jiova maivei ira na Isireli na uluna kei na buina, na ulu ni niu kei na taria, e na siga e dua bauga.

¹⁵ A qase kei koya sa rogo, o qori na uluna; a parofita sa vakavulica na ka lasu, o koya na buina.

¹⁶ Io ko ira sa tuberi ira na tamata o qo, era sa vakasesei ira; o ira era sa tubera, era sa tilomi sara.

¹⁷ Ia na Turaga ena sega kina ni rekitaki ira na nodra cauravou, ena sega talega ni yalolomani ira na nodra gone era luveniyali kei na nodra alewa dawai: ni ra sa dui veivakaisini kai valavala ca, a gusudra kece sa daucavuta ga na ka lialia. E na ka kece o qo sa sega ga ni lesu tani kina na nona cudru, ka sa laveti tu ga na ligana.

¹⁸ Ni sa waqa na yaloca me vaka na buka; ena kania na kau vakavotona kei na soni; ena vakacaudreva na kau ni veikau, ka kuvu cake me vaka na kubou.

¹⁹ Sa vakabutobutotaki na vanua e na cudru i Jiova, ia na tamata era sa vaka na buka ni buka waqa: ena sega e yalololoma vua na tacina.

²⁰ Ena kaliraka mai nai matau, ka viakana ga; ena kana mai nai mawi, ka sega ni mamau: era na dui kania na lewe ni ligana:

²¹ ena kani Ifireimi ko Manase, kei Manase ko Ifireimi: a rau na to vata me cati Juta. E na ka kece o qo sa sega ga ni lesu tani kina na nona cudru, ka sa laveti tu ga na ligana.