Aisea 8 - AI VOLA TABU

Sa tukuni ni na rawai Siria kei ira na Isireli ko Asiria, 1-4; ena rawai ira talega na Juta e na vuku ni nodra tawa vakabauta, 5-8. Ena tawa vakadaroi rawa na lewa ni Kalou, 9-16; o ira era sa rerevaki koya era na vakacegui, 17, 18; Ena vakararawataki ko ira sa vakararavi ki na kalou lasu, 19-22.

¹ A SA kaya vei au ko Jiova, Mo kauta vei iko e dua na rara ni volavola levu, ka vola vakamacala kina E na vuku i Measalalasipasi [Kusarawa ki nai toki ni valu! kusa ki nai yau!].

² Ia kaʼu a kauta vei au e rua na tamata dina me rau vakadinadinataka, ko Uriya na bete, kei Sikariya na luve i Yiperekiya.

³ Ia kaʼu a lako vua na parofita alewa; a sa kunekune mai ko koya, a sa vakasucuma na goneatagane. A sa kaya vei au ko Jiova, Mo vakatoka na yacana ko Measalalasipasi.

⁴ Ka ni na sa tawa vuku na gone me kaci, Tamaqu, kei tinaqu, ena kauti tani nai yau mai Tamasiko, kei nai toki ni valu mai Samaria kivei tui Asiria.

⁵ A sa vosa tale vei au ko Jiova, ka kaya,

⁶ E na vuku ni sa beca ko ira na tamata o qo na wai ni Siloa sa drodro malua, ka ra marautaki Risina kei koya na luve i Rimaliya;

⁷ raica, sa qai ia kina na Turaga me kauta cake mai vei ira na wai ni uciwai, sa kaukauwa ka levu, io na tui Asiria, kei na nona kaukauwa vakaturaga kecega: ia na uciwai o qo ena tubu cake e na kena dreke-ni-wai kecega, ka vuabale e na batina kecega:

⁸ ena dave voli mai ki Juta; ena luvu ka ua voli mai; ena cavaraki ki na domo; ia ni sa vakate tabana ena ubi kece sara kina na nomu vanua, Imanueli.

⁹ Dou soqoni vata vakaivalu, na veimataqali, ia dou na musuki ga; dou rogoca, na lewe ni veivanua vakayawa: dou vauci kemudou, dou na musuki ga; dou vauci kemudou, ia dou na musuki ga.

¹⁰ Dou ia na bose, ena vukici ga; dou tukuna na vosa, ena sega ga ni yaco: ni sa tiko kei keimami na Kalou.

¹¹ Ni sa vosa vakaoqo vei au ko Jiova me vakaukauwa, ka vakasalataki au meʼu kakua ni lako e nodra sala na tamata o qo, ka sa kaya,

¹² Dou kakua ni cavuta me vere na ka kece era sa cavuta na tamata o qo me vere; dou kakua talega ni rerevaka na ka era rerevaka, se kidroa.

¹³ Ia ko Jiova ni lewe vuqa, dou vakarokorokotaki koya ga; me sai koya ga dou sa rerevaka, me sai koya ga dou sa kidroa kina.

¹⁴ Ia ena yaco ko koya me vale tabu; kei na vatu era na tarabe kina, kei na vatu era na bale kina na mataqali ruarua nei Isireli; enai cori talega ka tudai kivei ira na kai Jerusalemi.

¹⁵ Ia ena tarabe kina na lewe vuqa, era na bale, ka ramusu, ka coriti, ka tauri.

¹⁶ Mo viviga nai vola ni tukutuku, dregata na vunau me nodra na noqu tisaipeli.

¹⁷ Ia kaʼu na waraki Jiova, o koya sa tabonaka na matana mai na mataqali i Jekope, kaʼu na namaki koya.

¹⁸ Kaica, oi au kei ira na gone sa solia mai vei au ko Jiova, e keitou sa soli mei vakatakilakila kei na ka e veivakidacalataki vei ira na Isireli maivei Jiova ni lewe vuqa, o koya sa tiko mai na ulu-ni-vanua ko Saioni.

¹⁹ Ia ni ra na kaya vei kemudou, Dou laʼki tarogi ira sa curumi, kei ira na rairai era sa kaci ka kudru: me ra kakua li ni tarogi koya na nodra Kalou na tamata? me ra lako li vei ira na mate e na vukudra na bula?

²⁰ io ki na vunau ga kei nai tukutuku: kevaka era sa vosa ka sega ni vaka na vosa o qo, sai ira ga sa sega vei ira na rarama ni mataka.

²¹ A ra na lako voli yani, ka vakararawataki ka viakana: ia ena yaco, ni ra sa viakana, era na cudruvi ira vakai ira, ka rukaki rau na nodra tui kei na nodra Kalou, a ra na rai kicake,

²² a ra na rai ki vuravura talega; ka kunea na ka rarawa kei na butobuto, na butobuto kei na yaluma; a ra na vakasavi tani ki na butobuto.