Aisea 61 - AI VOLA TABU

A nona cakacaka ua Mesaia, 1-3. Era na Uli lewe vuqa mai na nonai vavakoso lewe ni soro, a ra na vakalougatataki, 4-9. Sa reki vakalevu ko koya e na vuku ni ka dina ka dodonu ena tubu mai e vuravura, 10, 11.

¹ SA tu vei au na Yalo ni Turaga ko Jiova, e na vuku ni sa lumuti au ko Jiova, meʼu vunautaka nai rogorogo vinaka vei ira sa yalomalumalumu; sa talai au mai meʼu vakabulai ira sa kavoro na yalodra; meʼu vunautaka na veisereki vei ira na bobula, kei na rai tale vei ira era sa mataboko;

² meʼu vunautaka na yabaki vinaka i Jiova; kei na siga ni veisaumi nei koya na noda Kalou; me vakacegui ira kecega era sa tagi;

³ me vakaisulutaki ira era tagi e Saioni, me solia vei ira nai sala vakaiukuuku mei sosomi ni dravusa; na waiwai ni reki mei sosomi ni tagi; nai sulu ni vakavinavinaka mei sosomi ni lomabibi; a ra na vakatokai na kau vuai valavala dodonu, ka tea ko Jiova, me vakarokorokotaki kina ko koya.

⁴ A ra na tara tale na Veikoro sa rusa makawa; a ra na vakaduria tale na ka sa vakacacani eliu; a ra na vakavouya na Veikoro sa lala tu, na veiyasana ka ca e nai tabatamata e vuqa.

⁵ A ra na tu na kai tani me vakania na nomudou sipi; ia na luvedra na vulagi era na cakava na nomudou were, ka samaka na nomudou vaini.

⁶ Ia koi kemudou, dou na vakatokai na bete i Jiova, dou na vakayacani nai talatala ni noda Kalou: na nodrai yau na veimatanitu dou na kania, o na nodrai ukuuku talega dou na vakaisausaumi kina.

⁷ Mei sosomi ni nomudou madua ena rua na nomudoui votavota, a mei sosomi ni taqaya era na marautaka na nodrai votavota: ia e na nodra vanua dina era na taukena nai votavota e rua, ena nodra kina na marau tawa mudu.

⁸ Ni sai au ko Jiova kaʼu sa vinakata na lewa dodonu; kaʼu sa cata na ka sa kauti tani tawa dodonu; kaʼu na solia dina na nodrai voli, ia na veiyalayalati tawa mudu kaʼu na cakava kei ira.

⁹ Ena qai kilai e na veimatanitu na nodra kawa, kei na luvedra e na kedra maliwa na veimataqali: o ira kece era raica ira era na kilai ira, ni ra sa kawa sa vakalougatataka ko Jiova.

¹⁰ Au na rekivakaidinataki Jiova; a yaloqu ena rekitaki koya na noqu Kalou: ni sa vakasulumi au e nai sulu ni bula; e nai tutuvi ni yalododonu sa vakaitutuvi-taki au, mo vaka na watina tagane sa vakaisalataki koya e nai sala vakabete, ka vaka na watina alewa sa vakaiukuukutaki koya e na nona ka talei.

¹¹ Ni sa vaka na qele sa tubura na kena buroro, ka vaka na vere sa tubura na kenai teitei; ena vakakina na Turaga ko Jiova, ena vakatubura nai valavala dodonu kei na vakavinavinaka, e na matadra na veimatanitu kecega.