Aisea 57 - AI VOLA TABU

Era sa mate na yalododonu, me ra vakacegu kina, 1, 2. Sa ka vakasisila na nodrai valavala era sa qarava na kalou lasu, era na cudruvi ga, 3-13. O ira sa veivutuni dina era na vakabulai, 14-21.

¹ SA yali na tamata yalododonu, a sa sega e dua sa vakasara ki lomana; ia na tamata yalololoma era sa kauti tani, ka sa sega e dua sa vakananuma ni sa mai na mata ni ca sa kauti tani kina na yalododonu.

² Ena curuma nai vakavakacegu ko koya; era na vakacegu no e na nodrai davodavo, o ira yadua sa lako vakadodonu.

³ Ia koi kemudou, dou toro mai kike, na luvena na alewa daucaka mana lasu, na kawa ni dauyalewa kei na dauyatagane.

⁴ Sa vei cei dou sa ia kina na veivakalialiai? Sa vei cei dou sa vakabegusu, ka dara yame kina? dou sa sega li ni gone dautalaidredre, na kawa daulasu?

⁵ e kemudou sa waqa tu ki na matakau e na ruku ni kau bulabula kecega, ka sa vakamatei ira na gone e na wai drodro e na ruku ni uluvatu.

⁶ E na vatu yagoyago-vinaka ni wai drodro ko sa votai kina; sa ko ya, sa ko ya ga, na nomui votavota: ia ki na ka ko ya ko sa sova kina nai sevu, ka vakacabora nai madrali. Meʼu tawa cudruvaka li na ka o qo?

⁷ E dela ni ulu-ni-vanua cecere ka rewaicake ko sa cakava na nomui mocemoce, ia kikea ko sa cabe cake kina me cabora nai soro:

⁸ ia mai daku ni katuba kei na duru ni katuba ko sa vakaduria kina na nomui vakanananu; ni ko sa biuti au ka sa laʼki vakaraitaki iko vua e dua tani, ka sa cabe cake kina; ko sa vakalevutaka na nomui mocemoce, ka ia na veiyalayalati kei ira; ko sa vinakata na nodrai mocemoce, ko sa vakarautaka na kenai tutu.

⁹ Ia ko a lako vua na tui ka lumuti tu, ka sa vakalevutaka na nomui lumu; ka sa talai ira na nomui talatala ki na vanua vakayawa, ka sa vakaisini iko sobu ki etesi.

¹⁰ O sa oca e na nomu daulako, ia ko sa sega ni kaya, Au sa oca walega: ko sa kunea na kaukauwa ni ligamu; o koya o qo ko sa sega ni yalolailai kina.

¹¹ O cei ko a domobula kina, ka rerevaka, mo sa lasu kina? ia koi au ko sa sega ni nanuma, ko sa sega ni vakasara ki lomamu. E na vuku niʼu a galu, io mailiu sara, sai koya beka ga ko sa sega ni rerevaki au kina, ne?

¹² Au na vakatakila na nomu yalododonu, kei na nomu cakacaka, ia na ka o qori ena tawa yaga ga vei iko.

¹³ Ni ko sa tagi, me ra qai vakabulai iko na nomui soqosoqo: ena kauti ira kece tani ga na cagi: ia na mu-dremudre ena kauti ira tani: ia ko koya sa vakararavi vei au ena rawata na vanua, ka taukena na noqu ulu-ni-vanua tabu;

¹⁴ ena qai kaya ko Koya, Dou vakacerea, dou vakacerea, caramaka na sala; kauta tani mai na nodra sala na ka era tarabe kina na noqu tamata.

¹⁵ Ni sa vosa vakaoqo ko Koya sa cecere ka levu, ka sa tikora na gauna tawa mudu, o Koya ko Yalosavasava na yacana; Au sa tiko e na yasana cecere ka tabu, kei koya talega sa ramusu ka malumalumu na yalona, me vakabula na yalo i koya sa yalomalumalumu, ka Vakabula na lomadra sa bibivoro.

¹⁶ Ni na sega ni tawa mudu na noqu ia na veileti, ena sega tale ni ia tikoga na noqu cudru: ni na qai ceguoca ga mai mataqu na yalo, ia na yalo ni tamata kaʼu sa cakava.

¹⁷ E na vuku ni nona caka cala ni sa daukocokoco kaʼu sa cudru kina, kaʼu na yaviti koya; kaʼu sa vunitaki au, kaʼu na cudru ga kina; ni sa gumatua ko koya ni lesu tani ki na sala sa lomana kina.

¹⁸ A nonai valavala kaʼu a raica, ia kaʼu na vakabulai koya; kaʼu na tuberi koya, ka vakasuka na vakacegu vua, vei ira talega na kai nona era sa tagi:

¹⁹ kaʼu sa vakatubura na vua ni tebenigusu; na veivinakati tale, na veivinakati tale kei koya sa yawa, kei koya talega sa voleka, sa kaya ko Jiova; ia kaʼu sa vakabulai koya ga.

²⁰ Ia ko ira na tamata ca era sa vaka ua wasa cudrucudru, ni sa tawa cegu rawa; na kena wai sa nana tiko mai na qele kei na lolobo:

²¹ sa sega na veivinakati tale, sa kaya na noqu Kalou, kei ira na tamatai valavala ca.