Aisea 5 - AI VOLA TABU

A loloma ni Kalou ki na nona tamata, kei na nodra tawa loloma vua, 1-7; era sa cudruvi e na vuku ni nodra domonikoco, 8-10; kei na nodra gadreva ca, 11, 12; kei na nodra tawa kila na Kalou, 13-17; e so tale na ka era ca kina, 18-23; kei na nodra biuta na vunau ni Kalou, 24, 25: ai valavala ni nodra cudruvi, 26-30.

¹ AU na meketaka mada vua na wekaqu na meke nei koya na wekaqu e na vuku ni nona veivaini. E dua na veivaini nei koya na wekaqu, ka no mai na dua na ulu-ni-vanua qele bula:

² a sa viribaita, ka biuta tani na kena vatu, ka tea kina na vaini vinaka sara, a sa tara na vale-cecere e lomana, a sa kelia kina nai keli-ni-waini: a sa qai namaka me vuataka na vuana, a sa vuataka na vua ca.

³ Ia koi kemudou na kai Jerusalemi, kei na tamata ni Juta, dou lewai keirau mada kei na noqu veivaini.

⁴ A cava tale me caka ki na noqu veivaini, kaʼu a sega ni cakava kina? ia e na vuku ni cava, niʼu a namaka me vuataka na vua ni vaini, sa vuataka kina na vua ni vaini ca?

⁵ Ia o qo; kaʼu na tukuna mada vei kemudou na ka kaʼu na cakava ki na noqu veivaini: au na kauta tani na kena bai kau, ena qai laukana; au na basuraka sobu na kena bai vatu, ena qai buturaki:

⁶ au na cakava me lekutu: ena sega ni samaki se wereci; ena tubura ga na kau vakavotona kei na soni: ia kaʼu na sautaka na o me kakua ni tau kina na uca,

⁷ Ia na veivaini i Jiova ni lewe vuqa na mataqali i Isireli, kei ira na tamata ni Juta era sa nonai teitei daudomoni: a sa namaka na caka dodonu, ka, raica! na veivakamatei; kei nai valavala dodonu, ka, raica! na qoqolou.

⁸ Era na ca era dauvakautura na vale ki na vale, ka dau vakayacora na were ki na were, me kakua na yasana e vo, ia dou sa qai tiko duadua vakai kemudou ga e na loma ni vanua!

⁹ Sa kaya tiko e na daligaqu ko Jiova ni lewe vuqa, E dina ena lala mai na vale e vuqa, na vale lelevu ka vinaka, me sega na lewena.

¹⁰ Io, na were ni vaini sa ekera tini ena dua kina na paca waini na vuana, kei na omeri sila e dua ena dua kina na efa na vuana.

¹¹ Era na ca era souta na yaqona e na mataka caca; ka ia tiko kei na bogi, me ra mateni e na waini!

¹² Ia na api, kei na vaioli, na lali, kei na bitunivakatagi, kei na waini, sa ka ni nodra solevu: ia na cakacaka i Jiova era sa sega ni nanuma, kei na ka sa cakava na ligana era sa sega ni vakaraica.

¹³ O koya o qo era sa kauti tani kina na noqu tamata, ni sa sega na nodra vuku: ia na nodra ka rogo, era sa viakana; kei na nodra lewe vuqa, era sa mamaca e na viagunu.

¹⁴ O koya o qo sa vakalevutaki koya kina ko bulubulu, a sa dalaga vakalevu sara na gusuna: a sa lako sobu kina na kena ka rogo, kei na kena rorogo, kei na kena lewe vuqa, kei koya sa marautaki koya.

¹⁵ A sa vakamalumalumutaki na tamata wale, ka vakasivoki na tamata turaga, a matadra talega na viavialevu sa biuti sobu:

¹⁶ ia ko Jiova ni lewe vuqa sa vakalevui e na lewa dodonu, a sa vakarokorokotaki na Kalou yalosavasava e nai valavala dodonu.

¹⁷ Ena qai kana voli na lami me vaka na kedrai valavala, ia na nodra vanua lala na vutuniyau ena kania ko ira na kai tani.

¹⁸ Era na ca era yarataka mai na ka tawa dodonu e na dali ni ka lasu, kai valavala ca me vaka e na dali kaukauwa:

¹⁹ o ira era kaya, Me tei kusarawa ko koya, me vakusakusataka na nona cakacaka me da raica: ia na ka sa bosea ko koya na Yalosavasava nei Isireli, me toro mada mai ka yaco, me da kila!

²⁰ Era na ca era vakatoka na ca me vinaka, kei na vinaka me ca; era kaya e rarama na butobuto, ka butobuto na rarama; era kaya sa kamikamica na ka gaga, ka gaga na ka e kamikamica!

²¹ Era na ca era namumi ira me vuku, ka vakasami ira me yaloqase!

²² Era na ca era qaqa ni gunu waini, kei ira era tamata kaukauwa ni caka yaqona:

²³ era vakadonui koya sa cala me nodra kina nai yau, ia na nona ka dodonu na tamata dodonu era sa kauta tani vua!

²⁴ Ia me vaka sa katia na vu-ni-sila na yameyame ni buka, a sa yavu saraʼni na co sa caudre, ena vuca sara vakakina na wakadra, ia na sedra ena vuka cake me vaka na kuvu-ni-soso: e na vuku ni ra sa biuta tani na vunau i Jiova ni lewe vuqa, ka beca na vosa i Koya na Yalosavasava nei Isireli.

²⁵ O koya o qo sa waqa kina na cudru i Jiova vei ira na nona tamata, a sa dodoka yani na ligana vei ira, ka yaviti ira: a sa sautaninini na ulu-ni-vanua, ia na yagodra sa mate sa vaka nai soqosoqo e loma ni saqata ni koro. E na ka kece o qo sa sega ga ni lesu tani kina na nona cudru, ka sa laveti tu ga na ligana.

²⁶ Ia ena vakaduria ko koya na rogele vei ira na veimatanitu vakayawa, ka kaluvi ira mai nai yalayala kei vuravura: ka, raica, ena vakusakusa ka vakatotolo na nodra lako mai:

²⁷ sa sega vei ira sa malumalumu se tidara; sa sega ena sosovu se moce; ia nai vau ni tolodra ena sega ni tasere, kei na wa ni nodrai vava ena sega ni sereki:

²⁸ sa vagatai na nodra gasau, a sa lokati tu na nodra dakai kecega, a ququ ni nodra ose sa nanumi ni sa vaka na qiwa, kei na nodra vale-vodoki ni sa vaka na covulaca:

²⁹ era na tagi me vaka na laioni, era na tagi me vaka na laioni cauravou: io era na kudru, ka cova na kedra, ka kauta, ka sega e Vakabula.

³⁰ A ra na kudruti ira e na siga ko yame vaka na kudrukudru ni Wasawasa: ia ni sa rai ki vanua, raica, sa butobuto sa ka rarawa! a sa tabonaki na rarama e na kena o.