Aisea 42 - AI VOLA TABU

Ai talatala i Jiova ko na Mesaia; sa yalomalua ko koya, a sa gugumatua, 1-4. Ena vakayacora ko Jiova na cakacaka sa lesi koya kina, 5-9. Ai vakaro me ia na vakavinavinaka vua na Kalou e na vuku ni rogorogo vinaka, 10-17. Sa vunauca na tamata e na vuku ni nodra vakatitiqa, 18-25.

¹ RAICI koya na noqui talatala, kaʼu sa tokona; o koya kaʼu a digitaka, ka sa vinakata na vu ni lomaqu; au a solia vua na Yaloqu; ena vakayacora ko koya na lewa dodonu ki na veimatanitu:

² ena sega ni qolou, se kaila, se vakarogotaka na domona e nai saqata ni koro:

³ ena sega ni musuka na gasau sa bibivoro, se bokoca na wa ni cina sa kubou walega; e na ka dina ena vakayacora ga kina na lewa dodonu:

⁴ ena sega ni gu ca se yalolailai, ka malua me na vakataudeitaka na lewa dodonu e vuravura: ia ena waraka na nona vunau na veiyanuyanu.

⁵ Sa vosa vakaoqo na Kalou ko Jiova, o koya ka bulia na lomalagi, ka tevuka; o koya ka dedeka na vuravura, kei na ka sa tubura; o koya sa solia na nodra cegu na tamata e delana, kei na yalodra era sa lako voli kina:

⁶ oi au ko Jiova kaʼu a kacivi iko e na noqu yalododonu, kaʼu na tubera na ligamu, ka maroroi iko, ka soli iko mo veiyalayalati kei ira na tamata, mo nodra rarama na veimatanitu;

⁷ mo basuka na mata sa boko, mo kauti koya mai na vale ni veivesu e sa vesuki, kei ira mai na vale ni veivakabobulataki era sa tiko e na butobuto.

⁸ Oi au ko Jiova; o qori na yacaqu; na vakarokoroko sa dodonu me ia vei au kaʼu na sega ni solia vua e dua tani; se na vakavinavinaka sa dodonu me ia vei au ki na matakau ceuceu.

⁹ Na ka sa tukuni makawa, raica, sa yaco ga, ia kaʼu sa qai tukuna na ka vou: ni sa sega i ni tubu mai, kaʼu sa vakarogotaka vei kemudou.

¹⁰ Dou meketaka vei Jiova na meke vou, na vakavinavinaka vua mai nai yalayala kei vuravura, oi kemudou sa lako sobu ki na wasawasa, kei na ka kecega sa sinai kina; na veiyanuyanu, kei na lewena:

¹¹ na lekutu kei na kena veikoro, me tabalaka na domodra; na veikoro sa tiko kina ko Kitari: o ira sa tiko e na Uluvatu, me ra ia na meke; me ra kaila mai na dela ni veiulu-ni-vanua:

¹² me ra ia na vakavinavinaka vei Jiova, ka vakacaucautaki koya e na veiyanuyanu.

¹³ Ena lako yani me vaka na qaqa ko Jiova; ena vakauqeta na nona cudru me vaka na tamatai valu: ena kaila ko koya, io, ena qoqolou; ena gumatua vei ira na nona meca.

¹⁴ Sa dede na noqu tiko lo; au a tiko ga, kaʼu a dautarovi au: ia o qo, me vaka na alewa sa taratara, kaʼu na qoqolou; kaʼu na vakarusa ka tiloma sara:

¹⁵ kaʼu na vakalalataka na veiulu-ni-vanua kei na veiulu-ni-koro, ka vakamalaitaka kecega na kedra co; kaʼu na vukica na uciwai mo yanuyanu, ka vakadiva na drano;

¹⁶ kaʼu na tuberi ira na mataboko e na sala era sa lecava: kaʼu na kauti ira e nai lakolako era sa tawa kila: kaʼu na cakava na butobuto e matadra me rarama, kei na ka takelo me dodonu. Na ka o qo kaʼu na cakava vei ira, ka sega ni vakalaivi ira.

¹⁷ Era na vakalesui kimuri, era na madua vakalevu sara, ko ira era sa vakararavi ki na matakau ceuceu, era kaya ki na matakau e vakawaicalataki, Oi kemudou na neimami kalou.

¹⁸ Oi kemudou na didivara, dou rogoca! oi kemudou na mataboko, dou yadra, mo dou raica!

¹⁹ Se ko cei beka sa mataboko, se ko koya ga na noqu tamata? ia ko cei sa didivara me vakataki koya na noqui talatala kaʼu sa tala? o cei sa mataboko me vakataki koya sa dodonu, ka mataboko me vakai koya na tamata i Jiova?

²⁰ Sa vuqa na ka ko raica, ka sa sega ni vakasama; sa talai me basuka na daliga, ia ka sa sega ni rogoca ko koya.

²¹ Sa yalovinaka ko Jiova e na vuku ni nona yalododonu; ena vakalevulevuya na vunau, ka vakarokorokotaka.

²² Ia na mataqali o qo era sa kovei ka butakoci; era sa vauci kecega e nai keli, ka vunitaki e na vale ni veivesu: era sa tokitaki, ka sa sega e Vakabula; era sa butakoci, ka sa sega e kaya, Dou vakasuka tale.

²³ O cei vei kemudou ena vakatu daliga ki na ka o qo, me vakarorogo ka rogoca e na gauna sa muri mai?

²⁴ O cei sa soli ira na Jekope me tokitaki, kei ira na Isireli kivei ira na daubutako? o Jiova, o koya eda sai valavala ca vua, se segai? ka ni ra sa bese ni muria na nona sala, a ra sa sega ni vakarorogo ki na nona vunau:

²⁵ a sa sova kina vei ira ko koya na nona cudru katakata, kei nai valu kaukauwa: a sa vakama vakavolivoliti ira, a ra tawa kila ga: a sa kati ira, a ra sa tawa vakasara ki lomadra.