Aisea 40 - AI VOLA TABU

Sa tukuna ko Isaia nai rogorogo vinaka me na vunautaki, 1, 2. A vunau i Joni na Dauveipapitaiso, 3-8. A nodra vunau nai Apositolo, 9-11. Ni sa kaukauwa sara na Kalou, 12-17, ka sa sega e dua me vakatauvatani kaya, 18-25, sa vakacegui ira kina na tamata era vakararavi vua, 20-31.

¹ DOU vakacegui ira, dou vakacegui ira na noqu tamata, sa kaya na nomudou Kalou.

² Dou vosaveivakacegui ki Jerusalemi, ka tukuna vua, ni sa oti na nona gauna ni oca, ni sa bokoci na nona caka cala; ni sa cudruvi vakarua ko koya e na liga i Jiova e na vuku ni nonai valavala ca kecega.

³ A domo i koya sa kacikaci e loma ni veico, Dou caramaka na sala i Jiova, cakava me dodonu e na vanua dravuisiga na salatu ni noda Kalou:

⁴ ena vakasinaiti na buca kecega, ka vakalolovirataki na ulu-ni-vanua kei na ulu-ni-koro kecega; na tikina sa veve ena caka mo dodonu, kei na tikina sukusukura me logalogavina-ka:

⁵ ena qai vakarairaitaki mai nai ukuuku i Jiova, a ra na raica vata na tamata kecega: ni sa cavuta na gusu i Jiova.

⁶ Sa kaya e dua na domo, Mo kacikaci! A sa kaya ko koya, A cava meʼu sa kacivaka? Sa co na tamata kecega, ka vaka na se ni co na kedrai ukuuku kecega:

⁷ sa daumalai na co, a sa daumira na sena, ni sa uvuca na cegu i Jiova: e dina era sa co na tamata.

⁸ Sa daumalai na co, a sa daumira na sena, ia na vosa ni noda Kalou ena tu dei ka tawa mudu.

⁹ Mo cabeta na ulu-ni-vanua cecere, o iko Saioni, sa kauta mai nai rogorogo vinaka, mo tabalaka vakaukauwa na domomu, o iko Jerusalemi, sa kauta mai nai rogorogo vinaka; mo tabalaka, kakua ni ko rere; kaya ki na veikoro e Juta, Raica na nomudou Kalou!

¹⁰ Raica, na Turaga ko Jiova ena lako vakaukauwa mai, ia na ligana ena ia na lewa e na vukuna: raica, na nonai voli sa tiko ga kaya, kei na ka ni nona cakacaka e matana:

¹¹ ena vakani ira na nona sipi me vaka nai vakatawa; ena kumuni ira na luve ni sipi e na ligana, ka kauti ira voli e na lomaserena; o ira era vaqeqe voli ena tubera vakamalua ko koya.

¹² O cei sa vakarauta na wai e na qeteqete ni ligana, ka cagava na lomalagi, ka kumuna vata e nai vakarau na qele kei vuravura, ka tabea e nai vakarau ni bibi na ulu-ni-vanua, kei na ulu-ni-koro e nai vakatovotovo?

¹³ O cei sa kila rawa na Yalo i Jiova, se ko cei me nonai vakavuvuli me vakavulici koya?

¹⁴ Erau sa bose vata kei cei, se ko cei sa vakavukui koya, ka vakavulici koya e nai valavala ni lewa, ka vakavulica me vuku; ia na sala vuku, ko cei sa vakatakila vua?

¹⁵ Raica, na veimatanitu sa nanumi me vaka na mata ni wai e dua bau mai nai takitaki, ka vaka na kuvu-ni-soso e na bilo i vakarau; raica, na veiyanuyanu sa tomika cake ko koya me vaka sa ka lailai sara.

¹⁶ Ia ko Lipanoni, sa lailai me buka; ka lailai talega na kena manumanu mei soro kama.

¹⁷ A veimatanitu kece sa vaka na ka walega e matana; io, sa nanumi me ka lailai vei koya ka levu na ka sa sega, kei na ka wale sara ga.

¹⁸ Ia dou na qai vakatauvatana na Kalou kei cei? se dou na vakarauvatani koya kei na cava?

¹⁹ Na matakau ceuceu sa cakava e dua na matai, ka dua na matai ni koula e sa botana e na koula, ka sa bulia na kena sinucodo siliva.

²⁰ O koya sa vakadravudravuataki e na cakai soro, sa digitaka na kau sa sega ni vuca rawa; sa qara na kena matai vuku, me vakaduria e dua na matakau ceuceu, ena sega ni yavala.

²¹ Dou a sega beka ni kila? dou a sega ni rogoca? sa sega beka ni tukuni vei kemudou mailiu? dou a sega ni kila mai na gauna sa tauyavutaki kina ko vuravura?

²² Sai koya ga sa tiko maicake ka toka era ko vuravura, ia na lewena era sa vaka na vodre; sai koya ga sa tevuka, me vaka sa gatu, na mata-ni-lagi; ka birika, me vaka sa vale malo, mei tikotiko:

²³ sai koya ga sa vakasivoki ira sara na tui; ia ko ira na dauveilewai kei vuravura sa cakava ko koya me de ni cagi:

²⁴ era sega ni tei dina, era sega ni kaburaki dina, e sa sega ni ti sobu dina ki na qele na tolodra; ka sa uvuci ira walega ko koya, a ra sa malai, ia na covulaca ena kauti ira tani me vaka na qa ni sila.

²⁵ Ia dou na qai vakatauvatani au kei cei, so me keirau vakarauvatani kei cei? sa kaya ko Koya na Yalosavasava.

²⁶ Dou ta cake e na matamudou, ka rai yani; o cei ka bulia na ka o qori? ka sa kauta vakamataivalu mai na kedrai vavakoso? sa kacivi ira kecega e na yacadra, e na vuku ni sa kaukauwa levu, ka daugumatua sara; sa sega e dua sa yali.

²⁷ A cava ko sa vosa kina, na Jekope, ka kaya, na Isireli, Sa tabonaki na noqu sala vei Jiova, ia vei koya na noqu Kalou ena sa takali tani na noqu ka me veilewai kina?

²⁸ Sa sega beka ni kila ko iko? sa sega ni ko rogoca? o koya sa Kalou tawa mudu, o Jiova, o koya ka bulia nai yalayala kei vuravura; ena sega ni malumalumu ko koya, ena sega ni oca; sa sega ni vakadikevi rawa na nona vuku.

²⁹ Sa dausolia vei ira e malumalumu na kaukauwa; ia vei ira sa ra sega ni gumatua rawa ena vakalevutaka na kaukauwa.

³⁰ Io era na malumalumu ka oca ga na cauravou, a ra na bale sara na tamata bula:

³¹ ia ko ira era sa namaki Jiova era na vakaukauwataki tale; era na cabe cake me vaka era vakatabana vakaikeli; era na cici, ka sega ni oca, era na lako tu, ka sega ni malumalumu.