Aisea 33 - AI VOLA TABU

Era sa lewai me cudruvi ko ira na meca ni vavakoso lewe ni soro; 1-14. Era na tiko vinaka ga na yalododonu, 15-24.

¹ ENA ca ko iko sa dauvakacaca, ia ko a sega ni vakacacani; o iko sa dauveivakaisini talega, a ra a sega ni vakaisini iko! ni sa oti na nomu vakacaca, o na qai vakacacani; ni sa oti na nomu veivakaisini, era na qai vakaisini iko.

² I Jiova, mo lomani keimami mai; keimami sa vakararavi vei iko: mo ligadra e na veimataka, ia mo neimami Vakabula e na gauna ni rarawa.

³ Ni sa rogo na ue, era dro na tamata; ni ko sa tu cake mai, era sa veiseyaki na veimatanitu.

⁴ Ia nai toki ni nomudoui valu ena kumuni me vaka ni sa daukumuna na vodre; me vaka na nodra veiciciyaki na vodre ena cicivi vakakina na ka o qori.

⁵ Sa cecere ko Jiova; ni sa tiko maicake: sa vakasinaiti Saioni ko koya e na lewa kei na cakacaka dodonu:

⁶ ia ena vakataudeitaka na nomu gauna ko koya, enai Vakabula kaukauwa, ena vu ni vuku kei na yalomatua; a rerevaki Jiova, o qori na nonai yau.

⁷ Raica, o ira na nodra qaqa era sa kaila etautuba; era sa tagi vakalevu nai talatala ni sautu.

⁸ Sa lala na salatu, sa sega e lakova: sa vakacataka ko koya na vosa ni yalayala, sa beca na Veikoro, sa sega ni kila e dua na tamata.

⁹ Sa tagi na vanua, sa ceguoca; sa madua ko Lipanoni, sa malai yani; sa vaka na lekutu ko Saroni, a sa mimira ko Pasani kei Karimeli.

¹⁰ O qo ga kaʼu na tu cake, sa kaya ko Jiova, o qo ga kaʼu na vakalevulevui; o qo ga kaʼu na vakaceceretaki au.

¹¹ Dou na kunekunetaka na qa ni sila, dou na vakasucuma na vu-ni-sila: a nomudou cegu, me vaka na buka, ena kati kemudou.

¹² Ia na veimataqali, era na vaka na lovo ni lase; me vaka na kau vakavotona sa ta era na kama e na buka.

¹³ Oi kemudou sa tiko vakayawa, dou rogoca na ka kaʼu a cakava; ka kila, koi kemudou sa tiko voleka, na noqu kaukauwa.

¹⁴ Sa rere mai Saioni ko ira nai valavala ca; sa tauvi ninini ko ira na dauveivakaisini. O cei vei keda me tiko rawa e na buka katakata? o cei vei keda me tiko rawa e na buka sa waqa ka tawa mudu?

¹⁵ O koya sa dodonu na nonai lakolako, ka sa vosataka na ka dodonu; o koya sa beca nai yau sa kovei, ka sa bese na ligana ni taura nai voli ni vere, ka sa tabonaka na daligana mai nai rogo ni dra, ka sa vakamocera na matana me kakua ni raica na ca;

¹⁶ o koya o qo ena tiko e na tikina cecere; ena nona vale kaukauwa e cecere nai cobo; ena soli mai na kena kakana, ena tawa di na mena wai.

¹⁷ Ni sa uku cavu na tui, ena raici koya na matamu: ka kunea na vanua sa yawa sara tu.

¹⁸ A lomamu ena qai nanuma na ka veivakarerei, ka kaya, Evei na dauvolavola? evei na dauvakarau ka? evei na dauwilika na vale-cecere?

¹⁹ Na mataqali matadei ko ya ko na tawa kunea tale; na mataqali daudredre ni kilai na nodra vosa, na gusu daukaka, sa tawa macala.

²⁰ Mo vakaraici Saioni, na koro ni noda solevu tabu: a matamu ena kunei Jerusalemi nai tikotiko vinaka, na vale malo ena sega ni kauti tani; a kenai latu ena sega sara ni cavu tale, se cavuka e dua na kena dali.

²¹ Ia maikea ena vakaiukuuku ko Jiova e na vukuda e na yasana ni uciwai, na wai sa rabailevu vaka ka vaka; ena sega ni yaco kina e dua na waqa sa vakaivoce, ena sega talega e dua na waqa vakaturaga me lako voli kina.

²² Io ko Jiova na noda dauveilewai, ko Jiova sa dausolia na noda vunau, ko Jiova na noda tui; o koya ga ena vakabulai keda.

²³ Sa savo walega na nomu dali; era dredre ni duria nai vana; era tawa vakarewa rawa na laca: sa qai votai nai yau levu e tauri; era tokitaka ko ira na lokiloki.

²⁴ Ia na lewe ni koro ena tawa kaya, Kaʼu sa tauvi mate: o ira na tamata era sa tiko kina sa bokoci na nodrai valavala ca.