Aisea 3 - AI VOLA TABU

Na ka ca sa tubu e na nodrai valavala ca na lewe ni vanua, 1-12; era na cudruvi na turaga e na vuku ni nodrai valavala kaukamea, 13-15; kei ira talega na alewa e na ruku ni nodra wede-wede. 16-24; ena cudruvi sara ko Jerusalemi, 25, 26.

¹ KAICA, a Turaga, ko Jiova ni lewe vuqa, ni sa qai kauta tani e Jerusalemi kei Juta ko koya na ka kece sara sa tokoni kina, na madrai kecega sa tokoni kina, kei na wai kecega sa tokoni kina,

² na qaqa talega, kei na tamatai valu, na dauveilewai, kei na parofita, kei na vuku, kei na qase,

³ na turaga ni lewe limasagavulu, kei koya sa mata vakaturaga, kei na daulewa, kei na matai vuku, kei na vuku e na vosa.

⁴ Ia kaʼu na lesi ira na gone me nodra turaga, ia na gone lalai ena lewai ira.

⁵ A ra na dui valavala vakaukauwa na tamata yadua vua e dua, kei na tamata yadua vua na kai nona: era na vosalevu na gone vua na qase, kei na kaisi vua na turaga.

⁶ E dua na tamata ena qai taura na tacina e na vale i tamana, ka kaya. Sa tu vei iko nai sulu, mo neitou turaga mada, ia na ca o qo mo tara ga ko iko:

⁷ e na siga ko ya ena vosa sara mai ko koya, ka kaya, Au na ta wai vakabula; ia sa sega e noqu vale na madrai se nai sulu: dou kakua sara ni lesi au me lewai ira na tamata.

⁸ Ni sa rusa ko Jerusalemi, a sa bale ko Juta: e na vuku ni nodra vosa kei na nodrai valavala ni sa ia vei Jiova, me vakararawataka na matana vakaiukuuku.

⁹ Ai rairai ni matadra sa beitaki ira me ca; ia na nodrai valavala ca era sa tukuna me vakai Sotoma, era sa sega ni vunia. Ule na yalodra! ni ra sa sauma vei ira vakai ira e na ca.

¹⁰ Dou kaya vua na yalododonu ena yaco ga vua na vinaka: ni ra na kania na vua ni nodra cakacaka.

¹¹ Ule na tamata ca! ena yaco ga vua na ca: ni sai koya sa caka e na ligana ena caka ga vua.

¹² O ira na noqu tamata, sa gone ko iratou sa vakasaurarataki ira, a sa yalewa ko iratou sa lewai ira. Oi kemudou na noqu tamata, o ira era sa tuberi iko era sa vakasesei iko, ka vakacacana na sala ko sa lako kina.

¹³ Sa tu mai ko Jiova me ia na veileti, sa tu me lewai ira na veimataqali.

¹⁴ Ena ia na veilewai ko Jiova kei iratou na qase ni nona tamata, kei iratou na nodra tui: Ia kemudou, dou a kania oti na veivaini; na ka sa kovei mai vua na dravudravua sa toka ga e na nomudou veivale.

¹⁵ A cava dou sa butuki ira sobu kina na noqu tamata, ka butuqaqia na matadra na dravudravua? sa taroga na Turaga ko Jiova ni lewe vuqa.

¹⁶ A sa kaya ko Jiova, E na vuku ni ra sa viavialevu na gonealewa ni Saioni, ka sa vakalaqalaqarataka na nodrai lakolako, ka sa dauvere na matadra, ka sa lako vaka-mamada, ka qiriqiri tu na yavadra:

¹⁷ o koya ena qisia kina na Turaga na buradeladra na gonealewa ni Saioni me drika, ia ko Jiova ena vakarairaitaka na nodra luvawale.

¹⁸ E na siga ko ya ena luvata tani kina na Turaga nai ukuuku ni nodra vesa, kei nai ukuuku ni uludra, kei na nodra civa,

¹⁹ na sau ni daligadra, kei na qato, kei na pulou,

²⁰ nai tekiteki, kei na sinucodo ni vesa, kei nai vau ni ulu, kei na tavaya ka boi vinaka, kei nai vakatabu ni mate,

²¹ na mama ni qaqalo, kei na mama ni ucu,

²² nai sulu vakaiukuuku, kei nai curucuru, kei nai tutuvi, kei na taga ni lavo,

²³ nai iloilo, kei nai sulu matailalai, kei nai sala, kei na pulou lelevu.

²⁴ Ia ena yaco mei sosomi ni saluaki na ka e bona; kei nai sosomi ni vau vakaiukuuku na dali; kei nai sosomi ni ulu e qaliqali vinaka na ulu drika; kei nai sosomi ni sulu levu nai sulu taqarotu; kei na cilavi siga mei sosomi ni matavinaka.

²⁵ A nomu tagane era na bale e nai seleiwau, kei ira na nomu qaqa, e nai valu.

²⁶ Ena tagi ka yaso na nona matamata-ni-koro; ia ko koya ni sa lala tu ena tiko e na qele.