Aisea 25 - AI VOLA TABU

Sa ta na vakavinavinaka vei Jiova, e na vuku ni sa cudruvi Papiloni, ka sa vakabulai ira na nona tamata, 1-5. Sa ia na vosa ni yalayala ki na tamata kecega, 6-9. Ena cudruvi ko Moapi, 10-12.

¹ I JIOVA, o iko na noqu Kalou; au na vakalevulevui iko, au na vakavinavinaka ki na yacamu: ni ko sa cakava oti na ka mana; na nomu lewa makawa sa dei ka dina ga.

² Ni ko sa vukica na koro me suva walega; na koro kaukauwa me koro rusa; na nodrai tikotiko vakaturaga na kai tani me kakua ni koro; ena sega sara ni tara tale.

³ O koya o qo era na dokai iko kina na mataqali kaukauwa, ena rerevaki iko na nodra koro na veimatanitu rerevaki.

⁴ Ni ko a nona koro kaukauwa na malumalumu, na nona bai na dravudravua ni sa rarawa; nai vakaruru mai na cava, na yaloyalo mai na katakata, ni sa vaka dina ni sa labata na bai vatu na nodra cagi na daurerevaki.

⁵ Me vaka na katakata e na vanua dravuisiga, ko na vakamalumutaka vakakina na nodra ue na kai tani; io me vaka na katakata e na yaloyalo ni o, ena vakamalu-mutaki vakakina na nodra marau na daurerevaki.

⁶ Ia e na ulu-ni-vanua o qo ena cakava ko Jiova ni lewe vuqa vei ira na veimatanitu kecega, e dua na solevu e na ka e uro, na solevu ni waini makawa, e na ka e uro ka vakautona, e na waini makawa ka makare sara.

⁷ Ia e na ulu-ni-vanua o qo ena vakaotia ko koya na mata ni tutuvi sa puloutaki kina na veimataqali kecega, kei na pulou sa tabonaki kina na veimatanitu kecega.

⁸ Ena vakaotia sara na mate; ia na Turaga ko Jiova ena tavoya na wai ni mata mai na mata kecega; kei na nodra vakalialiai na nona tamata ena kauta tani ko koya mai na dela i vuravura kecega: ni sa tukuna ko Jiova.

⁹ A ra na qai kaya e na siga ko ya, Raica, o qo na noda Kalou, eda a namaki koya, ena vakabulai keda ko koya: o qo ko Jiova, eda a namaki koya; me da reki ka marau ni sa ia na veivakabulai ko koya.

¹⁰ Ni na tiko ga na liga i Jiova e na ulu-ni-vanua o qo, ia ko Moapi ena buturaki sobu e rukuna, me vaka na co sa buturaki sobu e nai sovasova ni benu.

¹¹ Ia ena tevuka yani ko koya na ligana e na kedra maliwa, me vaka na tamata dau-qalo ni sa tevuka na ligana me qalo: ia ena vakamalumalumutaka vata ko koya na nona viavialevu kei na vere ni ligana.

¹² Ia na vale kaukauwa e cecere e na nomu bai vatu, ena talaraka sobu ko koya, ka vakamalumalumutaka, ka biuta sobu ki na qele, io ki na kuvu-ni-soso.