Aisea 23 - AI VOLA TABU

A raivotu e na ka ca me yacovi Teiri, 1-16. Ena vinaka tale, ka qaravi koya na Kalou.

¹ AI colacola kei Teiri. Dou qoqolou, na waqa ni Tarisisi, ni sa vakalalataki; sa sega na vale, sa sega na ka me curu kina: sa tukuni vei ira mai na vanua ko Kitimi.

² Dou tiko lo, na lewe ni yanuyanu; o ira na dauveivoli ni Saitoni, era dausokota na wasawasa, era a vakavutuniyautaki iko;

³ ia na sila ni Siori mai na bati ni wai levu, na kena yabaki na uciwai, o qori ka tubu kina na nonai yau; a sa nodra koro dauveivoli na veimatanitu ko koya.

⁴ Mo madua, Saitoni: ni sa vosa na wasawasa, io na vu ni kena kaukauwa na wasawasa, a sa kaya, Au sa sega ni taratara, au sa sega ni vakasucu, au sa sega ni susuga na cauravou, se vakavulica na gonealewa.

⁵ Ni sa tukuni ki Ijipita, era na qai rarawa e na vuku ni rogorogo kei Teiri.

⁶ Dou lako ki tai kadua ki Tarisisi; dou qoqolou, na lewe ni yanuyanu.

⁷ O qo li na nomudou koro daumarau, o koya ka tubu e na gauna eliu sara? ena kauti koya vakayawa na yavana me tiko vulagi.

⁸ O cei sa lewa o qori me yacovi Teiri na dauveibuli, ka ra turaga na nona dauveivoli, ka daurogo e vuravura ko ira na nona tamata dauveivoli?

⁹ Sa lewa o qori ko Jiova ni lewe vuqa, me vakacacana na qaciqacia lagilagi kecega, me vakaisini ira kecega era daudokai e vuravura.

¹⁰ Mo vuadele e nomu vanua me vaka na uciwai, o iko na gonealewa ni Tarisisi; sa sega tale nai tarovi.

¹¹ Na ligana ka daudodoka yani ko koya ki na wasawasa, ka dauyavalata na veimatanitu: sa vakarota ko Jiova e na vuku i Kenani, me vakarusa na kena veikoro kaukauwa.

¹² A sa kaya, Mo kakua tale ni mamarau, o iko na gonealewa vaqaseni, na luve i Saitoni: tu cake, mani lako yani ki Kitimi; ia ko na sega talega ni vakacegu maikea.

¹³ Raica na nodra vanua na kai Kalitea; na mataqali o qori ka sega ga eliu; ka sa qai tauyavutaka ko Asiria me nodra na kai lekutu: a ra sa tara na kena veivale-cecere, ka vakaduria na kena veivale vakaturaga; sai koya o qo sa vakarusai Teiri.

¹⁴ Dou qoqolou, na waqa ni Tarisisi: ni sa rusa na nomudou koro kaukauwa.

¹⁵ Ia ena yaco e na siga ko ya, ena qai guilecavi ko Teiri ka vitusagavulu na yabaki, me vaka na gauna ni matanitu e dua: ni sa oti na yabaki e vitusagavulu, ena qai yaco ki Teiri me vaka na nona meke na alewa dauyatagane.

¹⁶ Mo taura na api; laʼki volivolita na koro, o iko na dauyatagane ka guilecavi; qiria vakavinaka, vakalevutaka na meke, mo vakananumi kina.

¹⁷ Ia ena yaco ni sa oti na yabaki e vitusagavulu, ena qai talevi Teiri ko Jiova, ena qai lesu tale mai ko koya ki na nonai voli, ka ia na dauyatagane kei na matanitu kecega kei vuravura e na dela ni soso.

¹⁸ Ia na nonai yau kei na nonai voli ena tabu me nei Jiova: ena tawa kumuni vata se maninitaki; ia na nonai yau ena nodra era sa tiko e na mata i Jiova, me ra kana ka mamau, ka vakaisulu e na ka veiqati.