Aisea 2 - AI VOLA TABU

Sa tukuna ko Isaia ni na yaco mai na lewa ni Mesaia, 2-4; a sa vunauci irana kai Juta me veivutuni ni ra sa daucudruvi e na vuku ni nodrai valavala ca, 5-9. Sa ka rerevaki sara na kaukauwa ni Kalou, 19-22.

¹ A VOSA ka raica ko Isaia na luve i Amosi e navuku i Juta kei Jerusalemi.

² Ia ena yaco e na gauna maimuri, ena vakataudeitaki na ulu-ni-vanua ni vale i Jiova me sivia na veiulu-ni-vanua, ena vueti me cecere ka lolovira na veiulu-ni-koro; a ra na drodro kina na veimatanitu kecega.

³ A ra na lako na veimataqali e vuqa, ka kaya, Me da mai laʼki cabe cake ki na ulu-ni-vanua i Jiova, ki na vale ni Kalou i Jekope; ena vakavulica vei keda; na nonai valavala, ia eda na muria na nona sala: ni na lako yani mai Saioni na vunau, kei na vosa i Jiova mai Jerusalemi.

⁴ Ia ena ia na veilewai e na vuku ni veimatanitu, kei na veivunauci e na vuku ni veimataqali e vuqa: a ra na tukitukia na nodrai seleiwau mei sivi ni siviyara, kei ka nodra moto mei sele ni samaki: ena sega ni lavei seleiwau na matanitu ki na matanitu, a ra na sega ni vulica tale nai valu.

⁵ Na mataqali i Jekope, me da mai laʼki muria na rarama i Jiova.

⁶ Ka ni ko a biuti ira na nomu tamata na mataqali i Jekope, e na vuku ni sa tawa na nodra vanua e na kai natuicake, a sa daucaka mana lasu me vakataki ira na kai Filisitia, ia vei ira na luve ni kai tani era sa vutu ni tamata kina.

⁷ Ia na nodra vanua sa vutu ni siliva kei na koula, a sa sega ni wili rawa na nodrai yau; a sa vutu ni ose na nodra vanua, a sa sega ni wili rawa na nodra vale-vodoki:

⁸ a sa vutu ni matakau na nodra vanua; era sa cuva ki na cakacaka ni ligadra, ki na ka sa cakava nai qaqalo ni ligadra:

⁹ a sa cuva kina na tamata wale, a sa vakamalumalumutaki koya na tamata turaga: ia mo kakua ni vosoti ira.

¹⁰ Mo curuma na qara vatu, ka vuni iko e na qele mai na ka rerevaki i Jiova, kei nai ukuuku ni nona ka vakaturaga.

¹¹ Na mata qaciqacia ni tamata ena vakamalumalumutaki, kei na nodra viavialevu na tamata ena vakacuva sobu, ia ena cecere duaduaga ko Jiova e na siga ko ya.

¹² Ia na siga i Jiova ni lewe vuqa ena tauca na ka kecega sa viavialevu ka cecere, kei na ka kecega sa laveti cake; ia ena vakamalumalumutaki:

¹³ ena tauca kece talega na sitari ni Lipanoni, sa cecere ka laveti cake, kei na oki kecega ni Pasani,

¹⁴ kei na ulu-ni-vanua cecere kecega, kei na ulu-ni-koro kecega sa laveti cake,

¹⁵ kei na vale-cecere kecega, kei na bai ni valu kecega,

¹⁶ kei na waqa kecega ni Tarisisi, kei nai yaya kecega e daudomoni.

¹⁷ Ia ena vakacuva sobu na qaciqacia ni tamata, ka vakamalumalumutaki na viavialevu ni tamata: ia ko Jiova duaduaga ena cecere e na siga ko ya.

¹⁸ Ia na matakau ena vakaotia sara.

¹⁹ A ra na curu na tamata ki na qara vatu, kei na qara ni qele, e na vuku ni ka rerevaki i Jiova, kei nai ukuuku ni nona ka vakaturaga, ni sa qai tu cake ko koya me vakayavalati vuravura.

²⁰ E na siga ko ya ena biuta tani na tamata na nona matakau siliva, kei na nona matakau koula, a ya ka cakava me soro kina ko koya, ki na kalavo kei na beka;

²¹ me laʼki curu ki na qara vatu, kei na gusu ni uluvatu, e na vuku ni ka rerevaki i Jiova, kei nai ukuuku ni nona ka vakaturaga, ni sa qai tu cake ko koya me vakayavalati vuravura.

²² Dou vakacegu mai vua na tamata, sa tiko e na qara ni ucuna na nona cegu: ni sa yaga ki na cava ko koya?