Aisea 13 - AI VOLA TABU

Sa vakasoqona vata nonai valu na Kalou, me ia na veicudruvi, 1-5; sa yalataki Papiloni vei ira na kai Metia, 6-16. Ena rusa sara ko Papiloni, 17-22.

¹ AI colacola kei Papiloni, o qori ka raica ko Isaia na luve i Amosi.

² Dou vakaduria na drotini e na ulu-ni-vanua cecere; tabalaka na domo vei ira; yalovaka na liga; me ra curuma na nodra matamata-ni-koro na turaga.

³ Au sa vakaroti ira kaʼu sa vakatabuya, io kaʼu a kacivi ira na noqu qaqa, na liga ni noqu cudru, o ira era marautaka na ka kaʼu na rogo kina.

⁴ A domo ni valu levu e na veiulu-ni-vanua, sa vaka sa lewe vuqa; a domo ni nodra ue na veimatanitu na lewe ni veivanua era sa soqoni vata: o Jiova ni lewe vuqa sa vakasoqoni ira vata na nona mataivalu.

⁵ Era sa lako mai na vanua vakayawa, mai na vu ni lagi, io ko Jiova, kei nai yaragi ni nona cudru, me vakacacana na vanua taucoko.

⁶ Dou qoqolou; ni sa voleka na siga i Jiova; ena yaco me vaka na veivakarusai maivei Koya na Kaukauwa.

⁷ Ena ce kina na liga kecega, ka waicala na yalo ni tamata kecega:

⁸ a ra na sautaninini; na taratara kei na rarawa ena tauvi ira; era na yaluma me vaka na alewa sa taratara; era na dui kidacala vakai ira; ena mata yameyame ni buka na matadra.

⁹ Raica, sa lako mai na siga i Jiova, sa dauveituri-sautaki e na cudru levu kei na cudru waqawaqa, me vakawabokotaka na vanua: ia na kena tamatai valavala ca ena vaqeavutaka.

¹⁰ Ni na sega ni cila mai na kalokalo ni lomalagi kei na kedra veimataqali; ena butobuto na mata-ni-siga ni sa lako cake, kei na vula ena sega ni cila mai na kena rarama.

¹¹ Ia kaʼu na cudruvi vuravura e na vuku ni kena ca, kei na tamata caka cala e na vuku ni nodrai valavala ca; kaʼu na muduka talega na nodra viavialevu na yalolevu, ka vakasivoka na nodra viaviaturaga era daurerevaki.

¹² Kaʼu na cakavi ira na tamata me dredre ka rawarawa na koula dina; io me dredre e lewe dua na tamata ka rawarawa na koula ni Oferi.

¹³ Ia kaʼu na vakayavalataki lomalagi, ko vuravura talega ena tavuki tani mai na kena yasana, e na cudru levu i Jiova ni lewe vuqa, kei na siga ni nona cudru waqawaqa.

¹⁴ Ia ena vaka na teira sa vakasavi, kei na sipi sa sega e vakasoqona; era na dui lesu vei ira na kai nona, ka dui dro ki na dui nona vanua.

¹⁵ O koya yadua sa kune ena lausua; kei koya yadua sa totaki ira ena bale e nai seleiwau.

¹⁶ A nodra gone ena viritaki ki na vatu e na matadra; a nodra veivale ena yanaki, ka yarataki na watidra.

¹⁷ Raica, kaʼu na vakauqeti ira na kai Metia me nodra meca, era na sega ni nanuma na siliva, a ra na tawa marautaka na koula.

¹⁸ A nodra dakai ena viritaki ira na cauravou ki na vatu; na vua ni kete era na tawa lomana; ia vei ira na gone ena tawa loloma na matadra.

¹⁹ Ia ko Papiloni, na nodrai ukuuku na veimatanitu, na nodra ka lagilagi era dokai ira kina na kai Kalitea, ena tautauvata kei Sotoma kei Komora ni sa vukica na Kalou.

²⁰ Ena sega ni tawa tale, ena sega ni tikori tale e na dua nai tabatamata: ena sega ni birika maikea na kai Arapea na nona vale malo; o ira talega nai vakatawa era na sega ni vakadavora maikea na nodra sipi.

²¹ Ia ena koto ga maikea na manumanu ni lekutu; ena sinai na nodra veivale e na ka kudrukudru; ena tiko maikea na luve ni ositereji; ena qito maikea na koti kila:

²² ena tagi na wolifa e na nodra veivale vakaturaga; kei na gata lelevu e na nodra bure vinaka: a sa voleka ni yaco na kena gauna, ia na kena siga ena sega ni vakaberaberataka.