Aisea 1 - AI VOLA TABU

A WASE I. —O Isaia na parofita, 1, sa vunauci ira na Juta e na nodra talaidredre, 2, 3; ka tagicaka na nodra daucudruvi, 4-9; a sa vakarota vei ira me veivutuni, 10-17, me bokoci kina na nodrai valavala ca, 18-20, me ra sautu; ni na cudruvi ga ko ira sa tawa veivutuni, 21-31.

¹ A RAIVOTU i Isaia na luve i Amosi, a ya ka raica e na vuku ni Juta kei Jerusalemi e na nodratou gauna ko Usiya, kei Yocami, kei Aasi, kei Isikiya, na tui Juta.

² DOU rogoca, na lomalagi, ka vakatu daliga, na vuravura, ni sa kaya mai ko Jiova, Kaʼu a susuga ka vakalevulevui ira na luvequ, io ko ira, era sa vuki tani vei au.

³ Sa kila na kenai taukei na karavau, kei na asa na bai ni nona turaga: ia ko ira na Isireli, era sa sega ni kilai au; o ira na noqu tamata, era sa sega ni nanumi au.

⁴ Ule na matanitu dauca, na mataqali sa bitaki e na caka cala, na kawai valavala ca, na gone dauvakacaca: era sa biuti Jiova, era sa vakacudrui Koya na Yalosavasava nei Isireli, era sa vuki tani tale.

⁵ Me kemudou yaviti tale e na tikina cava, mo dou sa kuria kina na dauvuki? sa mate taucoko na ulumu, a sa malumalumu taucoko na lomamu:

⁶ mai na qeteqete ni yavamu ka cavaraki ki na ulumu sa sega kina na tikimu e bula; sa vue ga, a sa dabuiloa, a sa qai mavoa tale: sa sega ni bobo, se viviraki, se lumuti e nai lumu.

⁷ A nomudou vanua, sa lala; a nomudou veikoro, sa kama e na buka: a nomudou veiwere, o ira na kai tani era sa kania e na matamudou, a sa lala didi me vaka ni sa dauvukica ko ira na kai tani.

⁸ A sa biu tu na gonealewa ni Saioni me vaka na vale bola e na veivainivaini, me vaka nai cili e na loga ni meloni, me vaka na koro sa kabai.

⁹ Kevaka sa sega ni vakavoca ko Jiova ni lewe vuqa na keda vo lailai sara, eda sa qai vakai Sotoma, eda sa qai vakataki Komora.

¹⁰ Dou rogoca na vosa i Jiova, oi kemudou na daulewai Sotoma; dou vakani daliga ki na vunau ni noda Kalou, oi kemudou na kai Komora.

¹¹ A cava na kena yaga vei au na nomudoui soro e vuqa? sa kaya ko Jiova: au sa mamau e na sipi tagane ei soro kama, kei na uro ni manumanu uro: ia na dra ni karavau, kei na lami, kei na koti tagane, kaʼu sa sega ni vinakata.

¹² Ni dou sa mai rairai e mataqu, o cei sa taroga vei kemudou, me butubutuka na noqu lomanibai?

¹³ Dou kakua ni kauta tale mai nai cabocabo wale: nai madrali boi vinaka na ka vakasisila vei au; na vula vou talega kei na siga tabu, na kaci me soqoni levu mai: kaʼu sa sega ni vosota rawa nai valavala ca kei na solevu tabu.

¹⁴ Ia na nomudou vula vou kei na nomudou solevu tabu sa cata na yaloqu: au sa bitaki kina; au sa oca ni colata.

¹⁵ Ia ni dou sa dodoka mai na ligamudou, kaʼu na tabonaka na mataqu maivei kemudou: io, ni dou sa vakalevutaka na masumasu, kaʼu na sega ni rogoca: a ligamudou sa sinai e na dra.

¹⁶ Dou vui kemudou, vakasavasavataki kemudou; kauta tani e mataqu na nomudoui valavala ca; dou cegu ni caka ca;

¹⁷ vulica na caka vinaka; qara na lewa dodonu, vukei koya sa vakasaurarataki, dou ia na veilewai e na vukuna na luveniyali, kei na dautataro e na vukuna na alewa dawai.

¹⁸ Dou mada mai, me tou veivosaki vata, sa kaya ko Jiova; ke sa vaka sa damudamu na nomudoui valavala ca, ke na vulavula me vaka na uca-vulavula; ke sa kulakula me dravaka, ke na vaka na vutika ni sipi.

¹⁹ Kevaka dou vakadinata ka vakarorogo, dou na kania na veta ni ka ni vanua:

²⁰ ia kevaka dou sa beca ka talaidredre, ena kani kemudou nai seleiwau: ni sa tukuna na gusu i Jiova.

²¹ Na kena vuki me dauyatagane na koro ka daudina! a sinai tu eliu e na lewa dodonu; a ka dodonu ga ka dautiko kina; ia edaidai na daulaba ga.

²² A nomu siliva sa vuki me de ni kaukamea, na memu waini sa waicala:

²³ a nomu turaga era sa dautalaidredre, a ra sa nodrai tokani na daubutako: era dui dauvinakata nai solisoli, ka dangu me vakaivoli: vua na luveniyali era sa sega ni ia na veilewai dodonu, kei na ka ni alewa dawai me lewai kina sa sega ni yaco kivei ira.

²⁴ O koya sa kaya kina na Turaga, ko Jiova ni lewe vuqa, o Koya na Kaukauwa nei Isireli, Io, kaʼu na vakacegui au maivei ira na noqu meca, ka saumi au vei ira era cati au:

²⁵ ia kaʼu na tarai iko, ka sava tani laivi na nomu de ni kaukamea, ka kauta tani kecega na nomu ca:

²⁶ kaʼu na vakatikori ira tale na nomu dauveilewai me vaka eliu, kei ira na nomu daubose me vaka e nai vakatekivu: ka oti, ko na qai vakatokai, Na koro daucaka dodonu, na koro daudina.

²⁷ Ena; vakabulai ko ira na Saioni e na lewa dodonu; kei ira na lesu tale mai, e nai valavala dodonu.

²⁸ Ia na nodra rusa na dautalaidredre kei ira nai valavala ca ena yaco vata ga, ia ko ira era sa biuti Jiova era na kawayali.

²⁹ Ni ra na maduataka na oki dou sa daudomona, dou na taqaya talega e na vuku ni veiwere dou sa digitaka.

³⁰ Ni dou na vaka na oki sa malai na drauna, kei na were sa sega kina na wai.

³¹ Ia ko koya sa kaukauwa ena vaka na wa ni cina, kei na nona cakacaka me vaka na lidi ni buka, a rau na kama vata ruarua, ka sega e dua me bokoca.