3 Joni 1 - AI VOLA TABU

Sa tukuni Keio ko Joni, kei Tiotirifi, kei Timitirio, 1-14.

¹ OI au na qase vua na daulomani ko Keio, o koya kaʼu sa lomana vakaidina.

² Na lomani, sa dua bau na ka kaʼu sa gadreva vakalevu, mo kalougata ka bula vinaka, me vaka ni sa bula vinaka sara na yalomu.

³ Niʼu sa reki vakalevu, ni ra sa lako mai na veiwekani ka tukuna na dina sa tu vei iko, me vaka ni ko sa daumuria na dina.

⁴ Sa levu na noqu reki e na vuku ni ka e dua bauga o qo, niʼu sa rogoca ni ra sa muria ga na dina ko ira na luvequ.

⁵ Na lomani, ko sa kitaka vakadodonu na ka kecega ko sa kitaka vei ira na veiwekani, vei ira talega na vulagi;

⁶ ko ira era sa tukuna na nomu loloma e na matadra nai vavakoso lewe ni soro; ia kevaka ko sa kauti ira mai e na nodra lako mai me vaka ni sa vinaka vua na Kalou, o na cakava na ka vinaka:

⁷ ni ra a lako yani e na vuku ni yacana, a sa sega e dua na ka era taura maivei ira sa tawa-lotu.

⁸ O koya sa dodonu kina mo da vakacegui ira era sa vakakina, me da veivuke kina e na dina.

⁹ Au a vola vei ira nai vavakoso lewe ni soro: ia ko Tiotirifi, o koya sa vinakata me uasivi cake vei ira, sa sega ni vakacegui keitou.

¹⁰ O koya o qo kaʼu na nanuma kina na nonai valavala sa kitaka ko koya, niʼu na lako yani, ni sa dauvosavakacacataki keitou e na vosa ca: a sa sega ni kitaka walega o qo, sa bese talega ni vakacegui ira na veiwekani, a sa tarovi ira era via kitaka, a sa biuti ira tani e nai vavakoso lewe ni soro.

¹¹ Na lomani, kakua ni muria na ka ca, na ka ga sa vinaka. O koya sa caka vinaka sa luve ni Kalou: ia ko koya sa caka ca sa sega ni raica oti na Kalou.

¹² Sa rogorogo vinaka ko Timitirio maivei ira kecega, mai na dina talega; io, keitou sa tukuna vakakina; ka dou sa kila ni sa dina na neitoui tukutuku.

¹³ Sa vuqa na ka vei au meʼu vola, ia kaʼu na sega ni vola vei iko e na wai ni volavola kei na peni:

¹⁴ ia kaʼu sa nakita me raici iko kusarawa, me daru veivosaki e na matanavotu. Me tu vei iko na vakacegu. Sa loloma yani vei iko ko ira na veiwekani. Me cavu mada na loloma vei ira yadua na veiwekani.