2 Tui 4 - AI VOLA TABU

A ka mana e so ka cakava ko Ilisa.

¹ A SA dua na alewa vei ira na watidra na luvedra na parofita, a sa tagi vei Ilisa, ka kaya, Sa mate na nomu tamata na watiqu; ia ko sa kila ni ka rerevaki Jiova na nomu tamata: a sa lako mai na tamata kaʼu sa sega ni vakaivolitaka vua na noqu ka, mo kauta na luvequ tagane ruarua me rau bobula.

² A sa kaya vua ko Ilisa, A cava meʼu cakava vei iko? tukuna mai vei au, se cava sa tu vei iko mai vale? A sa kaya ko koya, Sa sega ni tu vei au na nomu vada e dua na ka e vale, e dua ga na tavaya waiwai.

³ A sa kaya ko koya, Mo laʼki kerea vei iko na saqa e so maivei ira kecega na kai nomu sa tiko etaudaku, io, e so na saqa lala; me kakua ni lailai:

⁴ ia ni ko sa curu, mo sogota na katuba mo dou sogotubutaki kei rau na luvemu, ka livilivi yani ki na saqa kecega o qori, ia me tu yani ko ya sa sinai.

⁵ A sa lako tani vua ko na alewa, a sa sogota na katuba, me sogotubutaki kei rau na luvena; erau sa kaukau vei koya; a sa livilivi ko koya.

⁶ Ia ni sa sinai na veisaqa, sa kaya vua na luvena ko koya, Mo kauta mai vei au e dua tale na saqa. A sa kaya vua ko koya, Sa sega tale na saqa. A sa cegu na waiwai.

⁷ A sa lako ko koya, ka tukuna vua na tamata ni Kalou; a sa kaya ko koya, Mo lako, mo volitaka na waiwai, ka vakaivolitaka na ka ko sa sega ni vakaivolitaka; dou qai bula kei rau na luvemu e na ka sa vo.

⁸ A sa dua na siga sa lako yani kina ko Ilisa ki Sunemi, a sa tiko maikea e dua na marama vutuniyau; a sa cikevi koya ko koya me kana. Ia e na siga sa lako voli mai kina ko koya, sa daulako vakatikitiki kina me kana.

⁹ A sa kaya na alewa vua na watina, Raica, au sa kila ni sa tamata yalosavasava ni Kalou ko koya sa daulako voli vei kedaru:

¹⁰ me dara cakava mada e dua na tiki-ni-vale lailai ecake, e na dela ni bai, ka kauta kina me nona e dua nai mocemoce ka dua nai kanakana, ka dua nai tikotiko, ka dua nai tutu-ni-cina: ia ena yaco ni sa lako mai vei kedaru, ena curu kina ko koya.

¹¹ Ia sa yaco na siga sa lako kina kikea ko koya, a sa lako ki na tiki-ni-vale ecake, ka koto maikea.

¹² A sa kaya vei Keesi na nona cauravou, Mo kaciva na alewa o qo, na kai Sunemi. A sa kaciva, ka sa mai tu ko koya e matana.

¹³ Sa qai vaka, Mo kaya mada vua na alewa, Raica, ko sa oca vei keirau e na oca kecega o qo: a cava na ka me caka vei iko? e vinaka li mo cavuti vua na tui? se vua na turaga ni valu? A sa kaya ko koya, Au sa tiko e na kedra maliwa na kai noqu.

¹⁴ A sa kaya ko koya, A cava beka me caka vua? A sa kaya ko Keesi, Sa sega vakaidina na luvena, a sa qase mai na watina.

¹⁵ A sa kaya ko koya, Mo tei kacivi koya. A sa kaciva ko koya, ka sa mai tu na alewa e na katuba.

¹⁶ A sa kaya ko koya, E nai tabayabaki vakaoqo, e na yabaki kadua, ena dua na luvemu tagane mo mokota. A sa kaya ko koya, Me kakua, noqu turaga, na tamata ni Kalou; mo kakua ni lasu vei au na nomu vada.

¹⁷ A sa kunekune na alewa, ka vakasucuma na goneatagane e na yabaki kadua, e nai tabayabaki ka kaya kina vua ko Ilisa, me vaka nai valavala ni kunekune.

¹⁸ Ia ni sa tubu me levu na gone, sa lako yani e na dua na siga vei tamana, kivei ira na tamata era tamusuki sila.

¹⁹ A sa kaya vei tamana, Na uluqu, na uluqu! A sa kaya ko koya ki na cauravou, Mo kauti koya vei tinana.

²⁰ A sa tara cake ko koya, ka kauta vei tinana, a sa tenea ko koya, ka sigalevuvaka, a sa qai mate:

²¹ a sa lako cake ko koya, ka vakadavori koya e na nonai mocemoce na tamata ni Kalou, ka sogotubutaki koya, ka lako tani.

²² A sa kaci vua na watina, ka kaya, Mo tala mai vei au e dua vei ira na cauravou, ka dua vei ira na asa, meʼu cici vua na tamata ni Kalou, ka lako tale mai.

²³ A sa kaya ko koya, A cava ko na lako kina vua edaidai? sa sega ni vula vou, se siga ni vakacecegu. A sa kaya ko koya, Ena vinaka ga.

²⁴ Sa vauca talega na vodovodo ki na asa, a sa kaya ki na nona cauravou, Mo vakauta, ka lako yani: mo kakua ni vaka-beraberataka na vakauta e na vukuqu, kevaka kaʼu sa sega ni kaya vei iko.

²⁵ A sa lako yani ko koya, ka yaco vua na tamata ni Kalou mai na ulu-ni-vanua ko Karimeli. Ia ni sa kunei koya ko na tamata ni Kalou, ni sa tiko vakayawa, sa kaya ko koya vei Keesi na nona cauravou, Raica, ko ya na alewa, na kai Sunemi:

²⁶ mo cici mada, mo tavaki koya, ka kaya vua, O sa bau vinaka? sa bau vinaka na watimu? sa bau vinaka na gone? A sa kaya ko koya, Sa vinaka.

²⁷ Ia ni sa lako vua na tamata ni Kalou ko na alewa ki na ulu-ni-vanua, sa taura na yavana. A sa toro ko Keesi, me biliga tani. A sa kaya na tamata ni Kalou, Mo laiva ga; ni sa rarawa na yalona, a sa vunia vei au ko Jiova, ka sega ni tukuna vei au.

²⁸ A sa kaya na alewa, Au a kerea li na gone vei iko na noqu turaga? au sa sega beka ni kaya, Mo kakua ni vakaisini au?

²⁹ Sa qai kaya ko koya vei Keesi, Mo vauca na to-loma, ka kauta na noqui titoko e ligamu, ka lako yani: kevaka drau na sota kaya e dua na tamata, mo kakua ni veikidavaki kaya; ia kevaka sa veikidavaki kei iko, mo kakua ni vosa vua: ia mo vakotora na noqui titoko e na mata ni gone.

³⁰ A sa kaya na tina ni gone, Me vaka sa bula ko Jiova, ka sa bula na yalomu, kaʼu na sega ni lako tani vei iko. A sa tu cake ko koya, ka muri koya.

³¹ A sa lako yani ko Keesi, ka liutaki iratou, ka vakotora nai titoko e na mata ni gone; a sa sega na domo, se rogo rawa. A sa lesu tale me tavaki koya, a sa tukuna vua, ka kaya, Sa sega ni yadra na gone.

³² A sa yaco ki na vale ko Ilisa, ka raica, sa mate tu na gone, ka sa koto e nai mocemoce i koya.

³³ Sa curu kina ko koya, ka sogotubutaki rau e na katuba, a sa vakamamasu vei Jiova.

³⁴ A sa lako cake, ka kotora na gone, a sa tokara na gusuna ki na gusu i koya, kei na matana ki na mata i koya, kei na qeteqete ni ligana ki na qeteqete ni liga i koya: a sa cuva e delana; a sa katakata mai na lewena na gone.

³⁵ A sa lesu, ka veilakoyaki e loma ni vale; a sa lako cake, ka cuva e delana: a sa suru vakavitu na gone, a sa yadra na matana na gone.

³⁶ A sa kacivi Keesi ko koya, ka kaya, Mo kaciva na alewa o qo, na kai Sunemi. A sa kaciva. Ia ni sa curu vua, sa kaya ko koya, Mo tara cake na luvemu.

³⁷ A sa lako ko koya, ka bale ki na yavana, ka cuva ki na qele, ka tara cake na luvena, ka curu yani.

³⁸ A sa lesu tale ki Kilikali ko Ilisa: a sa dausiga na vanua; a sa tiko e matana ko ira na luvedra na parofita: a sa kaya ko koya vua na nona cauravou, Me riri toka na kuro levu, ka saqata na rourou me kedra na luvedra na parofita.

³⁹ A sa lako yani e dua ki na veiwere, me vetia na rourou, a sa kunea e dua na wa sa tubu wale, ka vetia maikina e so na timo ni veikau, ka vakasinaita kina na nonai sulu, a sa lako mai ka roverovea ki loma ni kuro ni rourou: ni ra sa sega ni kila.

⁴⁰ A ra sa sovasova yani, me ra kania ko ira na tamata. Ia ni ra sa kania tiko na rourou, era sa qoqolou, ka kaya, Ule, na tamata ni Kalou, sa tiko e na kuro na mate. A ra sa sega ni kania rawa.

⁴¹ A sa kaya ko koya, Dou kauta mai na madrai droka. A sa viria ko koya ki loma ni kuro; a sa kaya ko koya, Dou sovasova yani vei ira na tamata, me ra kania. A sa qai sega na ka ca e na kuro.

⁴² A sa lako mai e dua na tamata mai Peali-salisa, a sa kauta mai vei koya na tamata ni Kalou na madrai ei sevu, e ruasagavulu nai buli madrai parile, kei na sola ni sila kei na qana. A sa kaya ko koya, Solia vei ira na tamata, me ra kania.

⁴³ A sa kaya na tamata sa qaravi koya, Sa vakaevei, meʼu tauca li na ka o qo e matadra na tamata e lewe drau? A sa kaya ko koya, Mo tauca ga vei ira na tamata me ra kana: ni sa vosa vakaoqo ko Jiova, Era na kana, ka vakacauna.

⁴⁴ A sa tauca ko koya e matadra, a ra sa kana, ka vakacauna, me vaka na vosa i Jiova.