2 Tui 3 - AI VOLA TABU

Sa tovata ko iratou na tui Isireli, kei na tui Juta, kei na tui Itomi, me vala kei ira na Moapi.

¹ IA sa mai tui vei ira na Isireli mai Samaria ko Yiorami na luve i Eapi, e na kenai katinikawalu ni yabaki i Yiosafati na tui Juta, a sa tui tiko ka yabaki tinikarua.

² A sa caka ca e na mata i Jiova; ia ka sega ni vakataki tamana kei tinana: a sa biuta tani na matakau i Peali ka cakava ko tamana.

³ Ia ka sa kabita ga nai valavala ca i Yaropiami na luve i Nipati, o koya ka vakaivalavalacataki ira na Isireli; sa sega ni lako tani maikina.

⁴ Ia sai taukei ni sipi ko Mesa na tui Moapi, a sa daukauta vua na tui Isireli e oba vakatini na lami, ka oba vakatini na sipi tagane, kei na vutikadra.

⁵ Ia ni sa mate ko Eapi, sa qai bese ni qarava tikc na tui Isireli ko na tui Moapi.

⁶ A sa lako tani mai Samaria e na gauna ko ya ko Yiorami na tui, ka wiliki ira kecega na Isireli.

⁷ A sa lako ko koya ka talaki vei Yiosafati na tui Juta, ka kaya, Sa bese ni qaravi au tiko ko na tui Moapi: ko na lako vata beka kei au me veivala kei ira na Moapi? A sa kaya ko koya, Au na lako cake: edaru sa dua vata ga; sa vakai ira na nomu tamata ko ira na noqu tamata; sa vakai ira na nomu ose ko ira na noqu ose.

⁸ A sa kaya ko koya, A sala cava eda na lako cake kina? A sa kaya ko koya, A sala mai na veikau ni Itomi.

⁹ A sa lako yani na tui Isireli, kei na tui Juta, kei na tui Itomi: a ra sa lako voli e na sala ka bogi vitu: ka sega na wai me medra nai valu, se medra na manumanu ka muri ira.

¹⁰ A sa kaya na tui Isireli, Ule! ni sa kacivi iratou vata ko Jiova na tui e lewe tolu o qo, me soli iratou ki na ligadra na Moapi!

¹¹ A sa kaya ko Yiosafati, Sa sega beka eke e dua na parofita i Jiova, me datou tarogi Jiova kina? A sa vosa e dua vei ira na nona tamata na tui Isireli, a sa kaya, Sa eke ko Ilisa na luve i Safati, o koya ka daulivi wai ki na liga i Ilija.

¹² A sa kaya ko Yiosafati, Sa tiko kaya na vosa i Jiova. A ratou sa lako sobu vua ko na tui Isireli, kei Yiosafati, kei na tui Itomi.

¹³ A sa kaya vua na tui Isireli ko Ilisa, A cava vei kedaru? mo lako yani vei ira na parofita i tamamu, kei ira na parofita i tinamu. A sa kaya na tui Isireli vei koya, Me kakua mada; ni sa kacivi iratou vata ko Jiova na tui e lewe tolu o qo, me soli iratou ki na ligadra na Moapi.

¹⁴ A sa kaya ko Ilisa, Me vaka sa bula ko Jiova ni lewe vuqa, o koya kaʼu sa tu o matana, kevaka kaʼu sa sega ni doka na mata i Yiosafati na tui Juta, au sa sega ni vago-levi iko e na mataqu, se raici iko;

¹⁵ ia o qo, dou kauta mai vei au e dua nai qiriqiri. Ia ni sa kitaki tiko na qiriqiri, sa tu na liga i Jiova vei koya;

¹⁶ a sa kaya ko koya, Sa vosa vakaoqo ko Jiova, Mo kelia nai keli e vuqa e na buca o qo:

¹⁷ ni sa kaya vakaoqo ko Jiova, Dou na sega ni rai ca e dua na cagi, dou na sega talega ni raica na uca; ia ena sinai ga e na wai na buca ko ya, mo dou gunu kina, oi kemudou, kei na nomudou manumanu laukana, kei na nomudou manumanu vakaukau.

¹⁸ Ia sa ka lailai wale o qo e na mata i Jiova: ena soli ira talega na Moapi ko koya ki na ligamudou:

¹⁹ ia dou na mokuta na koro kaukauwa kecega, kei na koro vinaka kecega, ka taya sobu na kau vinaka kecega, ka buluta na mata ni wai kecega, ka vakacacana kecega na tiki ni vanua vinaka e na vatu.

²⁰ Ia e na sabogibogi, ni sa cabori tiko nai madrali laukana, raica, sa lako mai na wai e na sala mai Itomi, a sa sinai e na wai na vanua.

²¹ Ia ni sa rogoca ko ira kecega na Moapi, ni ratou sa lako cake na tui me veivala kei ira, era sa soqo vata ko ira kecega sa vauca rawa nai sulu ni valu, kei ira sa levu cake, a ra sa laʼki tu e nai yalayala.

²² A ra sa sou e na sabogibogi, a sa cilava na wai na mata-ni-siga, a ra sa raica na wai e matadra ko ira na Moapi, a sa damudamu me vaka na dra:

²³ a ra sa kaya, O qori na dra: sa moku vakaidina ko iratou na tui, ia era sa veimoku-mokuti vakai ira: ia o qo, tou ia ki nai toki ni valu, oi keda na Moapi.

²⁴ A ra sa lako ki na nodrai tikotiko ni valu na Isireli, a ra sa tu cake na Isireli ka mokuti ira na Moapi, a ra sa dro e matadra: a ra sa mokuti ira tiko na Moapi, io e na nodra vanua.

²⁵ A ra sa ravabasuka na Veikoro, ka biuta ko ira na tamata yadua na nona vatu ki na tiki ni vanua vinaka kecega, ka vakasinaita; a ra sa buluta kecega na mata ni wai, ka taya sobu kecega na kau vinaka: a sa vo mai Kiri-ereseci na kena vatu walega; ia ka sa lako vakavolivolita ko ira na tamata daurabo, ka mokuta.

²⁶ Ia ni sa raica na tui Moapi ni sa gumatua vua nai valu, sa kauta vua e vitu na drau na tamata era taura nai seleiwau, me laʼki basubasu yani vua na tui Itomi: a ra sa sega ni rawata.

²⁷ Sa qai taura ko koya na luvena tagane, na ulumatua, o koya e taravi koya me tui, a sa vakacabora mei soro kama e na dela ni bai vatu: a sa cudruvi vakalevu ko ira na Isireli: ia era sa lako tani vua, ka lesu ki vanua.