2 Timoci 4 - AI VOLA TABU

Sa vakarota tale vua na ka e so, 1-5. Sa tukuna ni sa voleka ni mate, a sa sega ni rere, 6-8. Sa tukuni Alekisadro, kei ira tale e so, a sa qai tinia na nonai vola, 9-22.

¹ IA kaʼu sa vakarota, e na mata ni Kalou, kei na Turaga ko Jisu Karisito, o koya ena lewai ira na bula kei ira na mate e na nona rairai mai kei na nona matanitu;

² mo vunautaka na Vosa; gumatua e na gauna vinaka, e na gauna ca; mo tukuna na ca, mo vunauci ira sa cala, mo dauvakarota tiko e nai vakavuvuli ka vosota vakalevu sara.

³ Ni na yaco na gauna era na tawa vosota kina nai vakavuvuli dodonu; ia ena vaka na nodra gadreva ga, era na vakalewevuqataki ira kina na nodrai vakavuvuli, ni sa qasikanunu na daligadra;

⁴ a ra na saumaka tani na daligadra mai na ka dina, ka lesu ki nai tukutuku wale.

⁵ Ia ko iko, mo yalomatua e na ka kecega, mo vosota na ka rarawa, mo kitaka na cakacaka ni vakavuvuli, vakayacora sara na ka ko sa lesi kina moi talatala.

⁶ Niʼu sa vakarau tu me liviraki, a sa voleka na noqu siga ni lako tani yani.

⁷ Au sa vala oti e nai valu vinaka, au sa ciciva oti na cere, au sa taura matua oti na vakabauta:

⁸ emuri, sa maroroi me noqu nai sala vakaturaga ni valavala dodonu, o koya ena solia mai vei au na Turaga, o koya na dauveilewai dodonu, e na siga ko ya; ia ena sega vei au duaduaga, vei ira kece talega era sa vinakata na nona rairai mai.

⁹ Gumatua mo lako vakasauri mai vei au:

¹⁰ ni ka biuti au ko Tima, ni ka lomani vuravura o qo, ka sa lako ki Cesalonika; ko Kirisiki ki Kalatia, o Taito ki Talimetia.

¹¹ Sa tiko vei au ko Luke duaduaga. Kauti Marika mo drau lako vata kaya mai: ni sa yaga vei au ko koya e na cakacaka.

¹² Au sa talai Tikiko ki Efeso.

¹³ Ai tutuvi kaʼu a laiva mai Tiroa vei Karipo, ni ko na lako mai, mo kauta mai, kei nai vola, ia mo nanuma sara nai vola kuli-ni-sipi.

¹⁴ Sa levu na ka ca ka kitaka vei au ko Alekisadro na matai ni parasa; me sauma ko na Turaga vei koya me vaka na nona cakacaka:

¹⁵ mo vakaraica talega ko iko; ni sa qatia vakalevu na neitou vosa ko koya.

¹⁶ Niʼu a tukuni au mada eliu, sa sega e dua na tamata keirau sa tu vata kaya, a sa biuti au ko ira kecega: me kakua ni wiliki vei ira.

¹⁷ Ia ka sa tu vata kei au ko na Turaga, a sa vakaukauwataki au; me kilai sara e na vukuqu na ka sa vunautaki, me ra rogoca talega na veimatanitu kecega; ia kaʼu a vakabulai mai na gusu ni laioni.

¹⁸ Ia ena vakabulai au ko na Turaga mai na ka ca kecega, ena vakayacori au talega ki na nona matanitu vakalomalagi: me ia vua na vakarokoroko ka tawa mudu. Emeni.

¹⁹ Me cavu mada na loloma vei Pirisila kei Akuila, vei ira talega na lewe-ni-vale i Onisiforo.

²⁰ Sa tiko mai Korinica ko Erasito: ia kaʼu sa laivi Tirofimo mai Milito ni sa tauvi-mate.

²¹ Gumatua mo taumadaka na vula-i-lili-wa e na nomu lako mai. Sa loloma yani vei iko ko Upulo, kei Putena, kei Leino, kei Kilotia, kei ira kecega na veiwekani.

²² Me tiko kei na yalomu na Turaga ko Jisu Karisito. Me nomudou na loloma. Emeni.