2 Timoci 2 - AI VOLA TABU

Sa vakarota ko koya vei Timoci na ka e so, 1-15. Sa tukuna e so nai vakavuvuli ca, 16-18; a sa tukuna nai vavakoso lewe ni soro, 19-21. Sa vakavulici koya e nai valavala e kilikili kei koya, 22-26.

¹ O KOYA o qo, na luvequ, mo qai vakaukauwataki iko e na loloma sa tu vei Karisito Jisu.

² Ia na veika ko a rogoca maivei au e na kedra maliwa na lewe vuqa era dauvakadinadina, mo solia vei ira na tamata yalodina, era na rawata me vakavulici ira na tani.

³ O koya o qo mo qai vosota na ca, me vaka na tamatai valu vinaka i Jisu Karisito.

⁴ Sa sega na tamata sa dauia nai valu sa vakaogai koya e na cakacaka ni bula o qo; me vinakati kina vua ka digitaka me tamatai valu.

⁵ Ia ko koya sa gumatua me uasivi, sa sega ni vakaisalataki vakaturaga, kevaka sa sega ni ia me vaka na kenai valavala.

⁶ Nai vakatau-ni-were sa cakacaka, sa taumada e na rawata na vuana.

⁷ Vakananuma na ka kaʼu sa kaya; ia me solia vei iko ko na Turaga na loma e kila rawa na ka kecega.

⁸ Vakananumi koya sa mai na kawa i Tavita, ko Jisu Karisito, o koya sa vakaturi cake mai na mate, me vaka na noqui tukutuku-vinaka:

⁹ o koya kaʼu sa vosota kina na ca, me vaka na tamata caka ca, ia kaʼu sa vesuki kina; ia na vosa ni Kalou sa sega ni vesuki.

¹⁰ 0 koya o qo kaʼu sa vosota kina na ka kecega e na vukudra na digitaki, me ra rawata talega na bula sa yaco vei Karisito Jisu, kei na kalougata tawa mudu.

¹¹ Sa dina na vosa: Kevaka eda sa mate kaya, eda na bula vata talega:

¹² kevaka eda sa vosota na ca, eda na lewa vata kaya: kevaka eda sa cakitaka, ena cakitaki keda talega ko koya:

¹³ kevaka eda sa tawa vakadinata, sa yalodina tikoga ko koya: sa sega ni cakitaki koya rawa vakai koya.

¹⁴ Vakasa na lomadra me ra nanuma na veika o qo, ia mo vakarota e na mata ni Turaga me ra kakua ni veiletitaka na vosa, a ka sa tawa yaga ka sa vakacalai ira era sa rogoca.

¹⁵ Gumatua sara mo vakaraitaki iko mo vinaka e na mata ni Kalou, a tamata daucakacaka sa sega e dua na ka me madua kina, mo wasea vakadodonu nai vakavuvuli dina.

¹⁶ Ia na dautalanoa vakasisila e tawa yaga mo drotaka: ni na tubu cake kina nai valavala sa tawa vakalotu:

¹⁷ ia na nodra vosa ena kakana tiko me vaka na vidikoso ca: sa vakakina ko Imeneo kei Filito;

¹⁸ erau sa cala mai nai vakavuvuli dina; ni rau sa kaya sa oti na tu cake tale mai na mate; a rau sa vukica sara kina na nodra vakabauta e so.

¹⁹ Ia na yavu ni Kalou sa tu dei ga, ia sa vakaoqo na vosa sa volai kina, Sa kilai ira na nona tamata ko na Turaga: ia, Me ra lako tani mai nai valavala ca ko ira yadua era sa cavuta na yaca i Karisito.

²⁰ Ia e na vale levu sa sega ni tu na veibilo sa caka e na koula kei na siliva ga, ko ya talega e na kau kei na qele; ia e so me dokai, e so me tawa dokai.

²¹ Ia kevaka e dua na tamata sa vakasavasavataki koya mai na veika o qo, ena yaco kina me bilo dokai, sa vakasavasavataki, ka yaga sara vua na Turaga, ni sa vakarau tu ki na cakacaka vinaka kecega.

²² Ia mo dro tani mai na gadreva ca vaka-cauravou; ia mo muria na yalododonu, na vakabauta, na loloma, na veivinakati kei ira era sa masuta na Turaga e na yalosavasava.

²³ Ia mo dro tani mai na veileti lialia eda tawa vakatavulici kina, ni ko sa kila era sa vakatekivuna ga na veivala.

²⁴ Ia sa tabu ni veivala nai talatala ni Turaga; ia me yalomalumalumu vei ira kecega na tamata, me vakavuvuli vakavuku, me dauvosota,

²⁵ me vakatavulici ira e na yalomalumalumu era sa dauveivorati; de solia beka vei ira ko na Kalou na veivutuni me ra kila kina na ka dina,

²⁶ ka me ra yadra tale mai nai cori ni tevoro, ni sa vakabobulataki ira ko koya me vaka na veitalia i koya.