2 Samuela 6 - AI VOLA TABU

Sa kauta mai na kato ni Kalou ko Tavita, 1-5. Sa mate ko Usa, a sa kau kina na kato ki na vale i Opeti-itomi, a sa kalougata kina ko Opeti-itomi, 6-11. Sa qai laʼki kauta mai na kato ki Saioni ko Tavita, a sa meke lako ni sa liutaka, a sa beci koya ko Mikali, 12-23.

¹ A SA vakasoqoni ira vata tale ko Tavita na tamata digitaki kecega, e tolu na oba, maivei ira na Isireli.

² A sa ia ko Tavita, kei ira kecega na tamata era sa vata kaya, ka lako yani mai Peali a nei Juta, ka me kauta cake maikea na kato ni Kalou, a ya sa vakayacani e na yaca i Jiova ni lewe vuqa, o koya sa tiko e na tadrua ni jerupi.

³ A ra sa vakavodoka na kato ni Kalou ki na dua na vale-vakayavana vou, a ra sa kauta mai na vale i Epinatapi mai Kipia: a sa vakalalataka na vale-vakayavana vou ko Usa kei Ei io, oi rau na luve i Epinatapi.

⁴ A ra sa kauta mai na vale i Epinatapi mai Kipia, a ra sa lako kaya na kato ni Kalou; a sa liutaka na kato ko Eiio.

⁵ Ia era sa qiriqiri e na mata i Jiova ko Tavita, kei ira kecega na mataqali i Isireli, e na ka ni meke kecega sa caka e na kau paini, io e na veiapi kei na veiqiriqiri, kei na veilali, kei na veika tani ni meke.

⁶ Ia ni ra sa yaco ki na rara ni samu sila nei Nakoni, sa dodo ko Usa ki na kato ni Kalou, ka taura; ni ra sa talaidredre na karavau.

⁷ A sa waqa mai na cudru i Jiova vei Usa; a sa yaviti koya maikea ko na Kalou e na vuku ni cala; a sa mate maikea ko koya ka voleka ki na kato ni Kalou.

⁸ A sa rarawa ko Tavita, e na vuku ni sa yaviti Usa ko Jiova: a sa vakayacana na tikina ko ya, ko Peresi-usa, ka yacova na siga o qo.

⁹ A sa rere vei Jiova ko Tavita e na siga ko ya, ka kaya, Ena kauti vakacava mai vei au na kato i Jiova?

¹⁰ A sa sega ni via kauta vua ko Tavita na kato i Jiova ki na koro i Tavita: a sa kauta vakatikitiki ko Tavita ki na vale i Opeti-itomi na kai Kaca.

¹¹ A sa tiko na kato i Jiova e na vale i Opeti-itomi na kai Kaca ka vula tolu: a sa vakalougatataki Opeti-itomi ko Jiova, kei iratou kecega na nona lewe-ni-vale.

¹² A sa tukuni vei Tavita na tui, ka vaka, Sa vakalougatataka ko Jiova na vale i Opeti-itomi, kei na nona ka kecega, e na vuku ni kato ni Kalou. A sa lako ko Tavita, ka kauta cake na kato ni Kalou mai na vale i Opeti-itomi ki na koro i Tavita e na marau.

¹³ Ia ni ra sa lako ka cavuta oti vakaono na yavadra ko ira ka colata na kato i Jiova, sa cabora e so na karavau ka so na manumanu uro ko koya.

¹⁴ A sa meke ko Tavita e na mata i Jiova e nona kaukauwa kecega; a sa vauci ko Tavita e na efoti malo.

¹⁵ A sa kauta cake na kato i Jiova ko Tavita, kei na mataqali taucoko i Isireli, e na kaila kei na domo ni davui.

¹⁶ Ia ni sa yaco ki na koro i Tavita na kato i Jiova, sa vakararai ko Mikali na luve i Saula mai na katuba, ka kunei Tavita na tui ni sa ladelade ka meke tiko e na matai Jiova; a sa beci koya e na lomana.

¹⁷ A ra sa kauta na kato i Jiova, ka tauca e nona tikina, e lomani vale gatu ka birika ko Tavita me tu kina: a sa cabora ko Tavita e so nai soro kama ka so nai soro e na veivinakati e na mata i Jiova.

¹⁸ Ia ni sa cabora oti ko Tavita na veisoro kama kei na veisoro e na veivinakati, sa vosavakalougatataki ira na tamata ko koya, e na yaca i Jiova ni lewe vuqa.

¹⁹ A sa vota vei ira kecega na tamata, io vei ira na lewe vuqa kecega na Isireli, na tagane kei ira talega na alewa, ki na tamata yadua e dua nai buli madrai, kei na tiki ni lewe ni manumanu, kei na dua na tavaya waini. A ra sa lako yani na lewe vuqa, na tamata yadua ki na nona vale.

²⁰ A sa lesu ko Tavita me vosavakalougatataki ira na nona lewe-ni-vale. A sa curu yani ko Mikali me tavaki Tavita, a sa kaya, Sa lagilagi na tui Isireli edaidai, ne! o koya ka luvata na nonai sulu e na matadra na nodra vada na nona tamata, me vaka sa luvata votu na nonai sulu e dua vei ira na tamata lialia.

²¹ A sa kaya vei Mikali ko Tavita, E na mata ga i Jiova, o koya ka digitaki au, ka biuti tamamu, kei na nona lewe-ni-vale kecega, ka vakarota vei au meʼu turaga vei ira na tamata i Jiova, io vei ira na Isireli: o koya o qo kaʼu a rereki kina e na mata i Jiova:

²² ia kaʼu na vakaisini au vakalevu cake, ka malumalumu sara e na mataqu: ia ko ira na vada ko sa vosataka, kaʼu na vakarokorokotaki ga vei ira.

²³ A sa sega kina na luve i Mikali na luve i Saula, ka yacova na siga sa mate kina.