2 Samuela 17 - AI VOLA TABU

Sa vakabauta ko Episalomi nai vakaro i Usei, 1-14. Sa tukuni vei Tavita, a sa lako-kosova na Joritani, 15-22. Sa kukunataki koya ko Eiitofeli, 23. Sa laʼki Meeneimi ko Tavita, ka levu kina na magiti ka caka vei koya kei ira na nona i tamata, 24-29.

¹ A SA kaya vei Episalomi ko Eiitofeli, Meʼu digitaka mada e tinikarua na udolu na tamata, ia kaʼu na ia, ka cicivi Tavita e na bogi o qo:

² ia kaʼu na yacovi koya ni sa ceguoca ka liga malumalumu, ia kaʼu na vakarerei koya: era na dro na tamata kecega era vata kaya; ia kaʼu na mokuti koya duaduaga na tui:

³ ia kaʼu na kauti ira mai vei iko na tamata kecega: ia na tamata ko sa qara sa vaka ni ra sa lesu kece mai: era na bula tiko na tamata kecega.

⁴ A sa vinaka na vosa ko ya vei Episalomi, kei ira kecega na qase nei Isireli.

⁵ A sa kaya ko Episalomi, Me tei kacivi mada ko Usei talega na Ariki, me da rogoca talega na ka e kaya ko koya.

⁶ A sa lako mai vei Episalomi ko Usei, a sa vosa vua ko Episalomi, ka kaya, Sa vosa vakaoqo ko Eiitofeli: me da kitaka me vaka na nona vosa, se segai? kevaka e segai, mo vosa ko iko.

⁷ A sa kaya ko Usei vei Episalomi, Sa sega ni vinaka nai vakaro sa rotaka ko Eiitofeli e na siga o qo.

⁸ Sa kaya talega ko Usei, Ko sa kilai tamamu kei ira na nona tamata, ni ra sa tamata kaukauwa ko ira, a sa gaga na yalodra, me vaka e dua na pera sa yali na luvena e na were: a sa tamatai valu ko tamamu, ka na sega kina ni moce vata kei ira na tamata.

⁹ Raica, sa vuni ko koya e na dua nai keli, se dua na tikina tani: ia ni na bale ko ira e so ni sa qai ia, o koya sa rogoca na kenai rogo, ena kaya, Raica, sa dua na veimoku vei ira na tamata era muri Episalomi:

¹⁰ ka na waicala sara kina ko koya talega sa qaqa, sa vaka na yalo ni laioni na yalona; ni sa kila ko ira kecega na Isireli ni sa tamata kaukauwa ko tamamu, a ra sa tamata qaqa era vata kaya.

¹¹ O koya o qo kaʼu sa vakarota kina me ra soqoni vata vei iko ko ira kecega na Isireli, mai Tani ka yacovi Pieri-sepa, me vaka na mata ni nuku mai na matasawa na kedra vuqa; ia mo lako e nai valu ko iko.

¹² Ia eda na yacovi koya e na dua na tikina sa na kune maikina ko koya, ia eda na tauci koya me vaka sa tauca na vanua na tegu: ia ena sega ni vo vua e dua vei ira kecega era vata kaya.

¹³ Ia kevaka sa curu ko koya ki na dua na koro, ena qai kauta mai na dali ki na koro ko ya ko ira kecega na Isireli, ia eda na yalataka ki na uciwai, ka kitaka tiko me kakua ni kune maikea e dua na vatu lailai.

¹⁴ A sa kaya ko Episalomi kei ira kecega na Isireli, Sa vinaka na ka sa rotaka ko Usei na Ariki, ka ca na ka sa rotaka ko Eiitofeli. Ni sa lesia ko Jiova me vakawaletaka nai vakaro vinaka i Eiitofeli, ka me vakayacora ko Jiova na ka ca vei Episalomi.

¹⁵ A sa kaya ko Usei kivei rau na bete, ko Satoki kei Epiyacari, Sa vakaoqo nai vakaro i Eiitofeli vei Episalomi kei ira na qase ni Isireli; a sa vakaoqo na noqui vakaro:

¹⁶ ia drau talaki kusarawa mada, ka tukuna vei Tavita, ka kaya, Mo kakua ni moce e na bogi edaidai e na buca ni veikau, mo lako vakasauri ki tai kadua; de sa tilomi na tui kei ira na tamata kecega era vata kaya.

¹⁷ Ia erau a tiko ko Jonacani kei Eiimaasi mai Eni-rokeli; a sa lako e dua na vada ka tukuna vei rau; ni sa tabu me rau raici ni rau sa curuma na koro; a rau a laʼki tukuna vei Tavita na tui.

¹⁸ A sa raici rau e dua na cauravou, ka tukuna vei Episalomi; ia erau sa lako vakusakusa, ka laʼki curu ki na nona vale e dua na tamata mai Peurimi, a sa dua nai keli-wai e nona loma ni bai; a rau a lako sobu kina.

¹⁹ A sa ia na alewa, ka tevuka nai ubi ki na draka ni keli-wai, ka kaburaka e delana na sila sa varo oti; a sa sega ni kilai kina na ka ko ya.

²⁰ A ra sa lako mai vei koya na alewa ki vale ko ira na tamata nei Episalomi, a ra sa kaya, Sa evei ko Eiimaasi kei Jonacani? A sa kaya na alewa vei ira, Erau sa lako-kosova na uciwai. Ia ni ra sa qara, ka sega ni kunea, era sa lesu tale ki Jerusalemi.

²¹ Ia ni ra sa lako yani, erau sa lako cake mai nai keli-wai, ka laʼki tukuna vei Tavita na tui, a rau sa kaya vei Tavita, Dou ia, ka lako vakasauri ki tai kadua ni wai; ni sa vakaoqori na ka ka vakarota ko Eiitofeli me caka vei kemudou.

²² A sa ia ko Tavita kei ira kece na tamata era vata kaya, a ra sa lako-kosova na Joritani; ia ni sa kida na rarama e na sabogibogi sa sega ni vo e dua sa sega ni lako-kosova oti na Joritani.

²³ Ia ko Eiitofeli, ni sa raica ni sa sega ni kitaki na ka sa rotaka ko koya, sa vauca ki na asa na vodovodo, a sa tu cake, ka lako yani ki na nona vale, ki na nona koro, ka vakaro e na vuku ni nona vale, ka laʼki kukunataki koya, a sa mate, ka sa bulu e nai bulubulu nei tamana.

²⁴ A SA yaco ki Meeneimi ko Tavita. A sa lako-kosova na Joritani ko Episalomi, o koya kei ira talega na tamata Isireli era sa vata kaya.

²⁵ A sa lesi Amasa ko Episalomi mo turaga ni valu mei sosomi kei Yoapi: ko Amasa ko ya na luvena e dua na tamata, na yacana ko Yicera e dua na luve i Isireli, o koya ka curu vua na luve i Naasi ko Epikaili, na taci i Siruya na tina i Yoapi.

²⁶ A sa tiko ko ira na Isireli kei Episalomi e na vanua ko Kiliati.

²⁷ Ia ni sa yaco ko Tavita ki Meeneimi, ko Sopi na luve i Naasi mai Rapa sa nodra na luve i Amoni, kei Mekiri na luve i Amieli mai Lo-tipari, kei Parisilai na kai Kiliati mai Rokilimi,

²⁸ eratou sa kauta e so i nai mocemoce, ka so na bilo, ka so na bilo qele; na witi talega, kei na parile; kei na madrai droka, kei na sila sa tavu, ka so na pini, kei na ka sa tavu,

²⁹ kei na oni, kei na uro ni wai-ni-sucu, ka so na sipi, kei na ka sa qaqi mai na wai-ni-sucu ni karavau, me kei Tavita, ka me kedra na tamata era vata kaya; ni ratou sa kaya, Era sa viakana na tamata, a ra sa malumalumu, ka viagunu mai na veikau.