2 Samuela 10 - AI VOLA TABU

Sa vakaisini nai talatala i Tavita, o koya sa tala ko koya vei Anuni, 1-5. Sa ra cala kei Tavita ko ira na luve i Amoni, kei ira na kai Siria, a sa gumatua vei ira ko Tavita, 6-19.

¹ A SA oti na ka o qo, sa mate na nodra tui na luve i Amoni, a sa mai tui ko Anuni na luvena me kenai sosomi.

² A sa kaya ko Tavita, Au na caka vinaka vei Anuni na luve i Naasi, me vaka ka caka vinaka vei au ko tamana. A sa talai ira na nona tamata ko Tavita me vakalecataki koya kina e na vuku i tamana. A ra sa lako na tamata i Tavita ki na nodra vanua na luve i Amoni.

³ A ra sa kaya na nodra turaga na luve i Amoni vei Anuni na nodra turaga, O sa nanuma beka ni sa vakarokorokotaki tamamu ko Tavita, sa tala kina e so me vakalecataki iko, ne? sa sega beka ni talai ira na nona tamata vei iko ko Tavita me wano-nova na koro, ka raica vakavinaka, ka me vukica?

⁴ A sa tauri ira na tamata i Tavita ko Anuni, ka tasia tabakidua na kumidra, ka vakalekalekataka na nodra veisulu, io ki rubudra sara, ka talai ira yani.

⁵ A sa tukuni vei Tavita, a sa talaki ko koya me tavaki ira, ni ra sa madua vakalevu ko ira na tamata: a sa kaya na tui, Dou tiko mai Jeriko, me tubu mada na kumimudou, dou qai lako tale mai.

⁶ A ra sa raica na luve i Amoni ni ra sa boi ca vei Tavita, a ra sa talaki na luve i Amoni ka vakaivolitaki ira na kai Siria mai Peci-riopi, kei na kai Siria mai Sopa, e rua na oba na tamata sa lako e na yavadra, kei na dua na udolu na tamata mai vua na tui Meeka, kei na udolu vaka-tinikarua na tamata mai Isi-topi.

⁷ A sa rogoca ko Tavita, a sa talai Yoapi, kei nai valu qaqa kecega.

⁸ A ra sa curu yani ko ira na luve i Amoni, ka vakarautaka nai valu mai nai sogo ni matamata-ni-koro: ia era sa tiko vakai ira e na veiwere ko ira na kai Siria mai Sopa, kei Riopi, kei Isi-topi, kei Meeka.

⁹ Ia ni sa raica ko Yoapi ni sa donui koya na mata ni valu mailiu, mai muri talega, sa digia ko koya maivei ira na tamata digitaki kecega nei Isireli, ka vakarautaka me donui ira na kai Siria:

¹⁰ ka soli ira na tamata sa vo vei Episai na tacina, me vakarauta kina me ra donui ira na luve i Amoni.

¹¹ A sa kaya ko koya, Kevaka sa gumatua vei au ko ira na kai Siria, mo qai mai vukei au; ia kevaka sa gumatua vei iko ko ira na luve i Amoni, kaʼu na laʼki vukei iko.

¹² Mo kaukauwa, ia me daru gumatua e na vukudra na noda tamata, kei na veikoro ni noda Kalou; ia me cakava ko Jiova na ka e vinaka vua.

¹³ Ia era sa toro ko Yoapi, kei ira na tamata era sa vata kaya, me kitaka nai valu vei ira na kai Siria: a ra sa dro e matana.

¹⁴ Ia ni ra sa raica ko ira na luve i Amoni ni ra sa dro na kai Siria, era sa qai dro talega e na mata i Episai, a ra sa laʼki curu ki na koro. A sa lesu mai ko Yoapi maivei ira na luve i Amoni, ka lako ki Jerusalemi.

¹⁵ Ia ni ra sa raica na kai Siria ni ra sa moku e na matadra na Isireli, era sa soqo vata.

¹⁶ A sa talaki ko Etareseri, ka kauti ira mai na kai Siria era tiko mai tai kadua ni uciwai; a ra sa lako mai ki Elami; a sa liutaki ira ko Sopaki na turaga ni valu i Etareseri.

¹⁷ A sa tukuni vei Tavita, a sa vakasoqoni ira vata na Isireli kecega ko koya, ka lako yani ki tai kadua ni Joritani, ka yaco ki Elami. A ra sa vakarautaka nai valu vei Tavita ko ira na kai Siria, a ra sa veivala kaya.

¹⁸ A ra sa dro ko ira na kai Siria e matadra na Isireli; a sa vakamatea ko Tavita e vitu na drau na lewe ni nodra veivale-vodoki na kai Siria, kei na tamata sa vodo e na ose e vasagavulu na udolu, a sa mokuti Sopaki na turaga ni nodrai valu, a sa mate maikea ko koya.

¹⁹ Ia ni ra sa raica ko ira na tui kecega era qaravi Etareseri ni ra sa moku e na matadra na Isireli, era sa veisorosorovi kei ira na Isireli, ka qaravi ira. A ra sa rere na kai Siria ni vukei ira tale na luve i Amoni.