2 Samuela 1 - AI VOLA TABU

A WASE I. —Sa mai tukuna na mate i Saula vei Tavita e dua na Amaleki, ka kauta vei Tavita na nonai sala vakaturaga, 1-10. Sa tagi ko Tavita, ka sa mokuta na Amaleki, e na vuku ni sa i kaya sa vakamatei Saula, 11-16. Sa lelevaki Saula kei Jonacani ko Tavita, 17-27.

¹ IA ni sa mate oti ko Saula, a sa lesu mai ko Tavita ni sa mokuti ira oti na Amaleki, sa tiko ka bogi rua mai Sikilaki ko Tavita:

² ia e nai katolu ni siga, raica, sa lako mai e dua na tamata mai nai tikotiko ni valu nei Saula, a sa kadresu na nonai sulu, a sa tu e na uluna na qele: ia ni sa lako mai vei Tavita, sa bale ki na qele ko koya, ka vakarokoroko.

³ A sa kaya vua ko Tavita, O sa lako maivei? A sa kaya vua ko koya, Au sa dro bula mai na nodrai tikotiko na Isireli.

⁴ A sa kaya vua ko Tavita, A cava na ka sa kitaki? mo tukuna mada mai vei au. A sa kaya ko koya, Era sa dro mai nai valu ko ira na tamata, a sa lewe vuqa vei ira na tamata sa bale ka mate; a sa mate ko Saula talega kei Jonacani na luvena.

⁵ A sa kaya ko Tavita vua na cauravou sa tukuna vua, O sa kila vakaevei ni sa mate tu ko Saula kei Jonacani na luvena?

⁶ A sa kaya ko koya na cauravou sa tukuna vua, Niʼu a lako loa mai na ulu-ni-vanua ko Kilipoa, raica, sa ravita na nona moto ko Saula, ka raica, sa muri koya voleka na vale-vodoki kei ira na tamata sa vodo lako e na veiose:

⁷ ia ni sa rai kimuri ko koya, sa kunei au, a sa kacivi au, kaʼu a kaya, Oi au.

⁸ A sa kaya vei au, O cei ko iko? kaʼu a kaya vua, Sa dua vei ira na Amaleki koi au.

⁹ A sa kaya vei au, Mo tu mada e delaqu, ka vakamatei au: ni sa tauri au na rarawa levu, e na vuku ni sa tikoga e lomaqu na noqu bula.

¹⁰ Ia kaʼu a tu e delana, ka vakamatei koya, niʼu a kila ena sega ni bula rawa ni sa bale oti: ia kaʼu a taura nai sala vakaturaga sa vakaisala kina na uluna, kei na qato sa vaqato kina na ligana, ia kaʼu a kauta mai kike vei iko na noqu turaga.

¹¹ A sa taura na nonai sulu ko Tavita, ka dresulaka; kei ira talega na tamata kece era vata kaya:

¹² a ra sa tagi ka yaso, ka lolo ka yakavi mada, e na vuku i Saula, e na vukuna talega ko Jonacani na luvena, e na vukudra talega na tamata i Jiova, e na vukudra talega na mataqali nei Isireli; e na vuku ni ra a bale e nai seleiwau.

¹³ A sa kaya ko Tavita vua na cauravou sa tukuna vua, O sa lako maivei? A sa kaya ko koya, Sa luve ni dua na kai tani, na Amaleki, koi au.

¹⁴ A sa kaya vua ko Tavita, E vakaevei ni ko a sega ni rere ni dodoka yani na ligamu me vakarusai koya ka lumuta ko Jiova?

¹⁵ A sa kaciva e dua vei ira na cauravou ko Tavita, ka kaya, Mo toro, mo lutuki koya. A sa mokuta vakamatea ko koya.

¹⁶ A sa kaya vua ko Tavita, Sa dodonu na nomu mate; ni sa beitaki iko na gusumu, ni ko sa kaya, Au sa vakamatei koya ka lumuta ko Jiova.

¹⁷ A sa lelevaki Saula, kei Jonacani na luvena, ko Tavita e na lele o qo: (

¹⁸ a sa vakarota me vakatavulici vei ira na luve i Juta ko Na dakai: raica, sa volai e nai vola i Yeseri:)

¹⁹ Sa vuetaki na nodrai ukuuku na Isireli e na nomu veitikina cecere: ule, sa bale ko ira na kaukauwa!

²⁰ Dou kakua ni tukuna mai Kaca, dou kakua ni rogotaka e na veisalatu mai Asikiloni: de ra reki na nodra gonealewa na kai Filisitia, de ra cibi na nodra gonealewa na tawa cili.

²¹ Oi kemudou na ulu-ni-vanua ko Kilipoa, me kakua na tegu, me kakua na uca e tauci kemudou, me kakua na veiwere ni veimadrali; ni sa biu tani maikina na nodrai sasabai na qaqa; nai sasabai i Saula, me vaka sa sega ni lumuti tu e nai wali.

²² Mai na nedra dra era sa moku, mai na nodra uro na qaqa, sa sega ni gole tani na dakai i Jonacani, ka sega ni lesu wale nai seleiwau i Saula.

²³ O Saula kei Jonacani, erau sa lomani ka vinakati ni rau sa bula, ka sega ni tawase ni rau sa mate: erau a kusakusa, ka berabera na ikeli, erau a kaukauwa, ka malumalumu na laioni.

²⁴ Oi kemudou na gonealewa nei Isireli, dou tagicaki Saula, o koya ka vakaisulutaki kemudou e nai sulu damudamu, kei na ka domoni, o koya ka vakaiukuukutaka na nomudoui sulu e na koula.

²⁵ Ule, era sa bale na kaukauwa e na maliwa ni valu! sa vakamatei ko Jonacani e na nomu veitikina cecere!

²⁶ au sa rarawa vakalevu e na vukumu, na wekaqu Jonacani: o sa vinaka sara vei au: sa ka veivakidacalataki na nomu loloma vei au, sa lailai na nodra loloma na alewa.

²⁷ Ule, era sa bale na kaukauwa, ka rusa nai yaragi ni valu.