2 Pita 3 - AI VOLA TABU

Sa tukuna ko koya ni na yaco ga na siga ni lewa; ena oti talega ko vuravura kei lomalagi, 1-10. Sa tukuna nai valavala e kilikili kei ira ni ra sa qai kila na veika o qo, 11-18.

¹ AI karua ni vola o qo, oi kemudou sa lomani, au sa qai vola vei kemudou; au sa vakayavalata kina na yalomudou e savasava mo dou nanuma kina:

² mo dou vakananuma na vosa era sa vosataka eliu na parofita yalosavasava, kei na neitou vunau nai apositolo ni Turaga nai Vakabula:

³ ni dou sa kila mada o qo, ni na lako mai e na gauna emuri sara e so na dauveivakasewasewani, era na dauvakadamuri muria na nodra gadreva ca,

⁴ ka kaya, Evei na vosa ni yalayala ni na lako tale mai ko koya? ni ra sa moce ga na qase, a sa tu dei tiko vakakina na ka kecega me vaka ni ka buli e nai vakatekivu.

⁵ Ia na ka o qo era sa vinakata me ra lecava, ni sa vosa ni Kalou ka tu kina na lomalagi eliu, kei na vuravura sa wase mai na wai, a sa tu e na vuku ni wai;

⁶ a sa vakarusai kina na vuravura sa tu e na gauna ko ya, ni sa waluvu:

⁷ ia na lomalagi kei na vuravura sa tu edaidai, sa maroroi ga e na vosa talega ko ya, sa maroroi ki na bukawaqa me yaco mada na siga ni lewa kei na veivakarusai ni tamata tawa-lotu.

⁸ Ia koi kemudou sa lomani, e dua na ka o qo mo dou kakua ni lecava, ni sa tautauvata vua na Turaga e dua na siga kei na yabaki e dua na udolu, kei na yabaki e dua na udolu kei na siga e dua.

⁹ Sa sega ni berabera na Turaga e na nona vosa ni yalayala, me vaka sa vakasama na tamata e so ni sa berabera: a sa vosoti keda vakadede, ni sa sega ni vinakata me rusa e dua, me yacova ga na veivutuni ko ira kecega na tamata.

¹⁰ Ia na siga ni Turaga ena lako ga mai me vaka na daubutako e na bogi, ena lako tani kina ko lomalagi e na rorogo tatamosamosa, ena waicala talega na veivu ni ka ni sa vakamai, ena visai talega ko vuravura kei na cakacaka sa tu kina.

¹¹ Ia ni na takali yani na ka kecega o qo, a cava nai valavala sa kilikili kei kemudou, e nai valavala savasava kei na daulotu,

¹² ni dou sa dauvakaraica ka dauku-sarawa yani ki na kena lako mai na siga ni Kalou, ena takali kina ko lomalagi ni sa visa, ena waicala talega na veivu ni ka ni sa vakamai?

¹³ Ia koi keda, me vaka na nona vosa ni yalayala, eda sa namaka na lomalagi vou kei na vuravura vou, sa tiko kina nai valavala dodonu.

¹⁴ O koya o qo, kemudou sa lomani, ni dou sa namaka na veika vakaoqo, dou gumatua kina me kunei kemudou ko koya e na vakacegu, ni dou sa tawa tauvi-duka, ka tawa cala.

¹⁵ Ia dou vakasama na vosota dede ni noda Turaga na ka me da bula kina; me vaka sa vola talega vei kemudou na wekada lomani ko Paula me vaka na vuku sa soli vua;

¹⁶ me vaka talega e na nonai vola kecega, ni sa tukuna na veika o qo; a sa tu kina na ka e so e dredre mo kilai, ia ko ira era sa tawa vuku ka tawa lomadei, era sa kauta vakatani, sa vaka talega nai Vola kece, me ra rusa kina.

¹⁷ Ia koi kemudou sa lomani, ni dou sa kila eliu, dou vakaraici kemudou talega, de dou kau vakatani e na nodra dauveivakacalai na tamatai valavala ca, dou na qai bale kina mai na nomudou tu dei.

¹⁸ Ia dou tubu cake e na loloma, kei na kila na noda Turaga ko Jisu Karisito nai Vakabula. Me ia vua na vakarokoroko e ua gauna o qo ka tawa mudu. Emeni.