2 Pita 1 - AI VOLA TABU

A WASE I. —Sa vakavulici ira ko Petero me kakua ni yali vei ira e dua na ka vinaka; ka me ra gumatua sara me curu ki lomalagi, 1-11. Sa vakarota matua vei ira me ra gumatua sara me ra vakabauti Jisu, 12-21.

¹ OI au ko Saimoni Petero, ai talatala kei nai apositolo i Jisu Karisito, vei ira era rawata na vakabauta talei e vakarauvata kei na neitou e na yalododonu ni noda Kalou ko Jisu Karisito nai Vakabula:

² Me vakalevutaki vei kemudou na loloma kei na vakacegu ni dou sa qai kila na Kalou, kei Jisu na noda Turaga.

³ Ni sa solia mai vei keda ko koya e na nona kaukauwa Vakalou na ka kecega sa yaga e na noda bula kei na lotu talega, ni da kilai koya sa kacivi keda ki na vanua vakaiukuuku kei nai valavala vinaka:

⁴ o koya o qo sa soli kina vei keda na vosa ni yalayala e levu sara ka talei: mo dou rawata kina na ka sa Vakalou, ni dou sa dro tani mai na dukadukali sa tu e vuravura e na vuku ni gadreva ca.

⁵ Ia e na vuku ni ka o qo, dou gumatua vakalevu sara kina, mo dou vakaikuritaka na nomudou vakabauta e nai valavala vinaka; kei nai valavala vinaka e na vuku;

⁶ kei na vuku e nai valavala malua; kei nai valavala malua e na vosota; kei na vosota e na daulotu;

⁷ kei na daulotu e na veilomani vakaveitacini; kei na veilomani vakaveitacini e na yalololoma.

⁸ Ia kevaka sa tu ga na veika o qo e na lomamudou, ka tubu cake me levu, era sa kitaka mo dou kakua ni vucesa se tawa vua e na kila na noda Turaga ko Jisu Karisito.

⁹ Ia ko koya sa sega vua na veika o qo sa mataboko, a sa matabuawa, a sa guilecava ni ka vakasavasavataki tu mai na nonai valavala ca eliu.

¹⁰ Ia koi kemudou na veiwekani, dou gumatua cake kina, mo dou vakataudeitaka sara na nomudou kacivi kei na nomudou digitaki; ni dou na sega sara ni bale, kevaka dou sa kitaka na veika o qo:

¹¹ ni na soli vakayauyau vakakina me rawarawa vei kemudou me curu ki na matanitu tawa mudu ni noda Turaga kei nai Vakabula ko Jisu Karisito.

¹² O koya o qo kaʼu na sega ni guca kina niʼu sa vakasa tiko na lomamudou me nanuma na veika o qo, ia sa dina ya ni dou sa kila, ka sa vakataudeitaki e nai vakavuvuli dina o qo.

¹³ Ia kaʼu sa vakasama, ni sa dodonu, e na veisiga kaʼu sa tiko kina e na vale vakacevaceva o qo, meʼu vakayavalata na lomamudou me nanuma;

¹⁴ niʼu sa kila niʼu sa voleka ni biuta tani na noqu vale vakacevaceva, me vaka ni sa tukuna mai vei au na noda Turaga ko Jisu Karisito.

¹⁵ Ia kaʼu na gumatua mada mo dou nanuma tikoga na veika o qo, niʼu sa mate oti.

¹⁶ Ni keitou a sega ni muria na talanoa sa caka vakavuku, ni keitou a tukuna vei kemudou na nona kaukauwa kei na nona lako mai na noda Turaga ko Jisu Karisito, ia keitou a raica dina ga na nonai valavala vakaturaga.

¹⁷ Ni sa yaco vei koya mai vua na Kalou ko Tamana na vakarokoroko kei na vakadokadokai, ni sa yaco na domo vei koya mai nai ukuuku dina sara vakaoqo, O koya o qo na noqu Gone ni toko, au sa dauvinakata vakalevu.

¹⁸ Ia na domo o qo mai lomalagi keitou sa rogoca, ni keitou a tiko kaya e na ulu-ni-vanua tabu.

¹⁹ A sa tu vei keda talega na vosa sa vakadinadinataki vakalevu cake, a parofisai; ia dou na caka vinaka, kevaka dou sa vakananuma kina, me vaka ki na cina sa serau e na vanua sa butobuto, ka malua me kida mai na mataka, ka cabe mai ki na lomamudou na kalokalo i vola siga;

²⁰ ni dou sa kila taumada na ka o qo, ni sa sega na parofisai e nai Vola, sa tubu mai na kila na kenai balebale;

²¹ ni sa sega ni lako mai na parofisai e na gauna eliu e na veitalia ni tamata: a ra sa vosa ga na tamata yalosavasava ni Kalou me vaka sa kauti ira na Yalo Tabu.