1 Tui 19 - AI VOLA TABU

Sa dro ko Ilija, 1-8. Sa rairai vua mai Orepi ko Jiova, 9-18. Sa kacivi ko Ilisa, 19-21.

¹ A SA tukuna vei Isepeli ko Eapi na ka kecega ka cakava ko Ilija, a ni sa vakamatei ira kecega na parofita e nai seleiwau.

² A sa tala ko Isepeli e dua nai talatala kivei Ilija, ka kaya, Me cakacaka vakakina vei au ko ira na kalou, ka vakaikuritaka, kevaka kaʼu sa sega ni va-karauvatana na nomu bula kei na nona bula e dua vei ira, e na gau-ni-siga vakaoqo e na mataka.

³ Ia ni sa raica ko koya, sa ia ko koya, ka lako yani me bula kina, ka yaco ki Pieri-sepa, na nei Juta, ka laiva maikea na nona cauravou.

⁴ A sa lako yani ko koya ki loma ni veikau, a sa vaka nai lakolako e na siga e dua na kena balavu, ia ni sa yaco kina sa laʼki tiko sobu e na ruku ni dua na kau juniperi: a sa masu me yaco vua na mate; a sa kaya, Sa levu, i Jiova; mo kauta sara yani na yaloqu; niʼu sa sega ni vinaka cake vei ira na noqu qase.

⁵ Ia ni sa davo koto ka moce e na ruku ni dua na kau juniperi, raica, sa qai tarai koya e dua na agilose, a sa kaya vua, Mo duri cake; mo kana.

⁶ A sa rai voli ko koya, ka, raica, sa voleka ki na uluna e dua nai buli madrai sa tavu oti e na qilaiso, ka dua na saqa wai. A sa kana ko koya ka gunu, ka koto sobu tale.

⁷ A sa lako mai vakarua na agilose i Jiova, ka tarai koya, ka kaya, Mo duri cake; mo kana; ni sa balavu vei iko na sala.

⁸ A sa duri cake ko koya, ka kana ka gunu, ka lako e na kaukauwa ni kakana ko ya ka siga vasagavulu ka bogi vasagavulu, ki Orepi na ulu-ni-vanua ni Kalou.

⁹ A sa laʼki curuma e dua na qara vatu maikea, ka moce kina; ka, raica, sa vosa vua ko Jiova, ka kaya vua, O sa tiko vakacava eke, Ilija?

¹⁰ A sa kaya ko koya, Au a yalokatakata vakalevu e na vuku i Jiova na Kalou ni lewe vuqa: ni ra sa laiva na veiyalayalati kei iko ko ira na luve i Isireli; era sa talaraka sobu na nomu veicabocabo-ni-soro, ka vakamatei ira na nomu parofita e nai seleiwau; ia koi au, kaʼu sa vo duaduaga; a ra sa qara na noqu bula, me kauta tani.

¹¹ A sa kaya ko, koya, Mo curu yani, ka laʼki tu e na dela ni ulu-ni-vanua e na mata i Jiova. Ka, raica, sa lako voli ko Jiova, a sa dua na cagi levu ka kaukauwa sa sea na veiulu-ni-vanua, a sa vorolaka na veiuluvatu e na mata i Jiova; sa segai e na cagi ko Jiova: a sa muria na cagi, na tavuki ni vanua; sa segai e na tavuki ni vanua ko Jiova:

¹² a sa muria na tavuki ni vanua, na buka waqa; sa segai e na buka waqa ko Jiova: a sa muria na buka waqa, e dua na domo lailai e vinaka:

¹³ ia ni sa rogoca ko Ilija, sa tabonaka na matana e nonai sulu, ka curu yani, ka laʼki tu e nai curucuru ki na qara vatu: ka, raica, sa yaco vua e dua na rorogo, ka kaya, O sa tiko vakacava eke, Ilija?

¹⁴ A sa kaya ko koya, Au a yalokatakata vakalevu e na vuku i Jiova na Kalou ni lewe vuqa: e na vuku ni ra sa biuta na veiyalayalati kei iko ko ira na luve i Isireli; era sa talaraka sobu na nomu veicabocabo-ni-soro, ka vakamatei ira na nomu parofita e nai seleiwau; ia koi au, kaʼu sa vo duaduaga; a ra sa qara na noqu bula me kauta tani.

¹⁵ A sa kaya vua ko Jiova, Mo lako; mo lesu e na nomui lakolako ki na veikau mai Tamasiko: ia ni ko sa yaco kina, mo lumuti Esaeli me tui Siria:

¹⁶ ka lumuti Yeu na luve i Nimisi me tui Isireli: ka lumuti Ilisa na luve i Safati, na kai Apeli-miola, me parofita na kemui sosomi.

¹⁷ Ia ko koya sa dro bula mai nai seleiwau i Esaeli, ena vakamatea ko Yeu: kei koya sa dro bula mai nai seleiwau i Yeu, ena vakamatea ko Ilisa.

¹⁸ Ia kaʼu sa maroroya e vitu na udolu vei ira na Isireli, na duru kecega sa sega ni tekiduru vei Peali, kei na gusu kecega sa sega ni reguci koya.

¹⁹ A sa lako tani maikea ko koya, a sa kunei Ilisa na luve i Safati, sa taura tiko nai sivi yara, a sa liutaki koya na karavau e ruasagavulu ka va, a sa tu ko koya kei rau na murimuri: a sa lako voli vei koya ko Ilija, ka biuta vua na nonai sulu.

²⁰ A sa laiva na veikaravau ko koya, ka cicimuri Ilija, a sa kaya, Meʼu reguca mada na tamaqu kei na tinaqu, kaʼu na qai muri iko. A sa kaya vua ko koya, Mo lesu tale yani: a cava kaʼu sa kitaka vei iko?

²¹ A sa lesu tani vei koya ko koya, ka kauta e rua na karavau, ka vakamatea, a sa saqata na lewedrau e nai yaya ni karavau, ka solia vei ira na tamata, a ra sa kana. Sa qai tu cake, ka laʼki muri Ilija, ka qaravi koya.