1 Tui 18 - AI VOLA TABUSa talai ka Ilija me tukuna na uca, 1-6; a sa kauti koya ko Opatiya vei Eapi, 7-15. Sa cala ka moku ko ira na parofita lasu, 17-40. Sa soli na uca e na masu i Ilija, 41-46. 1 IA ni sa oti na bogi e vuqa, sa qai yaco mai na vosa i Jiova vei Ilija e na kenai katolu ni yabaki, ka kaya, Mo lako, mo vakatakilai iko vei Eapi; ia kaʼu na vakatauca na uca ki na dela i vuravura. 2 A sa lako ko Ilija, me vakatakilai koya vei Eapi: a sa ka levu na dausiga mai Samaria. 3 A sa kacivi Opatiya ko Eapi, o koya ka lewa na vale: (ia sa rerevaki Jiova vakalevu ko Opatiya; 4 a sa yaco eliu ni sa vakamatei ira tiko na parofita i Jiova ko Isepeli, sa kauta e dua na drau na parofita ko Opatiya, ka vuni ira yalimasagavulu e na qara vatu, ka karoni ira e na madrai kei na wai.) 5 A sa kaya vei Opatiya ko Eapi, Mo lako voli e na vanua, ki na mata ni wai vure kecega, kei na uciwai kecega; de daru na kunea na co me Vakabula na veiose kei na veiasa, me kakua ni yali kece vei keda na manumanu. 6 A rau sa wasea vei rau na vanua, me rau dui lako voli kina: sa lako vakai koya e na dua na sala ko Eapi, a sa lako vakai koya e na dua na sala tani ko Opatiya. 7 Ia ni sa e na sala ko Opatiya, raica, sa tavaki koya ko Ilija; a sa kilai koya, a sa bale vakatobocu, ka kaya, O iko beka na noqu turaga ko Ilija? 8 A sa kaya vua, Oi au: mo laʼki kaya vua na nomu turaga, Raica, ko Ilija. 9 A sa kaya ko koya, A cava na noqui valavala ca, ko sa via solia kina na nomu tamata ki na liga i Eapi, me vakamatei au? 10 me vaka sa bula ko Jiova na nomu Kalou, sa sega e dua na vanua se matanitu sa sega ni talaki kina na noqu turaga me vakasaqarai iko: ia ni ra sa kaya, Sa yali: sa kitaki ira ko koya me ra vosavavakini na matanitu kei na vanua ko ya, ni ra sa sega ni kunei iko: 11 ia o qo, ko sa kaya, Mo laʼki kaya vua na nomu turaga, Raica, ko Ilija. 12 Ia niʼu sa lako tani vei iko, ena kauti iko tani na yalo i Jiova, ia kaʼu sega ni kila se kivei; ia niʼu sa lako ka tukuna vei Eapi, ka sega ni kunei iko ko koya, ena qai vakamatei au: ia koi au na nomu tamata, au sa rerevaki Jiova niʼu sa cauravou, ka yacova na gauna o qo. 13 Sa sega beka ni tukuni vei iko na noqu turaga na ka kaʼu a kitaka ni sa vakamatei ira na parofita i Jiova ko Isepeli, niʼu a vunia e dua na drau na tamata vei ira na parofita i Jiova, ka yalimasagavulu e na qara vatu, ka karoni ira e na madrai kei na wai? 14 Ia o qo, ko sa kaya, Mo laʼki kaya vua na nomu turaga, Raica, ko Ilija; ia ena qai vakamatei au ko koya. 15 A sa kaya ko Ilija, Me vaka sa bula ko Jiova ni lewe vuqa, o koya kaʼu sa tu e matana, au na vakatakilai au vakaidina vua edaidai. 16 A sa laʼki tavaki Eapi ko Opatiya, a sa tukuna vua: a sa laʼki tavaki Ilija ko Eapi. 17 Ia ni sa raici Ilija ko Eapi, sa kaya vua ko Eapi, O iko beka o koya sa vakararawataki ira na Isireli? 18 A sa kaya ko koya, Au sa sega ni vakararawataki ira na Isireli; ko iko ga, kei na mataqali i tamamu, e na vuku ni dou sa laiva na vunau i Jiova, ka ko sa muri ira na Peali: 19 ia o qo, mo talaki, mo vakasoqoni ira kecega na Isireli vei au, ki na ulu-ni-vanua ko Karimeli, kei ira na parofita nei Peali era sa va na drau ka limasagavulu, kei ira na parofita ni kaloualewa ni veikau era sa va na drau, era sa kana tiko mai nai kanakana i Isepeli. 20 A sa talaki ko Eapi vei ira kecega na luve i Isireli, ka vakasoqoni ira vata na parofita ki na ulu-ni-vanua ko Karimeli. 21 A sa toro ko Ilija vei ira kecega na tamata, ka kaya, E bogi vica mada dou na lomalomarua tiko kina? kevaka sa Kalou ko Jiova, dou muri koya: ia kevaka ko Peali, dou muri koya. A sa sega ni cavuta vua e dua na vosa ko ira na tamata. 22 A sa kaya vei ira na tamata ko Ilija, Oi au duaduaga, kaʼu sa vo tiko na parofita i Jiova; ia na parofita i Peali, era sa va na drau ka limasagavulu. 23 Ia me ra solia vei keitou e rua na karavau; me ra qai digitaka vei ira na karavau e dua, a me tamusuka mada ka vakotora e na dela ni buka, ia me kakua ni viri kina na buka waqa; ia kaʼu na kitaka na karavau kadua, ka vakotora e na dela ni buka, ia kaʼu na sega ni viria kina na buka waqa: 24 ia dou masu ki na yaca ni nomudou veikalou, ia kaʼu na masu ki na yaca i Jiova; ia na kalou sa vosa mai e na buka waqa, me Kalou ga ko koya. A ra sa vosa kecega na tamata, ka kaya, Sa vinaka na vosa. 25 A sa kaya ko Ilija vei ira na parofita i Peali, Dou digitaka vei kemudou na karavau e dua, ka kitaka mada eliu; ni dou sa lewe vuqa; dou qai masu ki na yaca ni nomudou veikalou, ia dou kakua ni viritaka kina na buka waqa. 26 A ra sa kauta na karavau sa soli vei ira, a ra sa kitaka, a ra sa qai masu ki na yaca i Peali e na mataka, ka kitaka me siga levu, a ra sa kaya, I Peali, mo rogoci keitou mai. A sa sega na domo, se dua e vosa mai. A ra sa rikata nai cabocabo sa cakavi. 27 Ia ni sa siga levu, sa qai vakalialiai ira ko Ilija, ka kaya, Dou kaci vakadomoilevu; ni sa kalou ko koya: sa vakanananu tiko, se sa tiko tani, se sa dua na nonai lakolako; sa moce beka, ka yaga me vakayadrati. 28 A ra sa kaci vakadomoilevu, ka tavai ira e na veiseleiwau kei na veisele, me vaka na nodrai valavala, a sa dave mai vei ira na dra. 29 A sa yaco, ni sa oti na siga levu, era sa kitaka tiko na parofisai ka yacova na gau-ni-siga sa daucabo kina nai soro; a sa sega na domo, se dua me vosa, se dua e rogoca. 30 A sa kaya ko Ilija vei ira kecega na tamata, Dou toro mai vei au. A ra sa laʼki toro vua na tamata kecega: a sa cakava ko koya me vinaka tale nai cabocabo-ni-soro i Jiova, a ya sa kabasu. 31 A sa kauta ko Ilija na vatu e tinikarua, me vaka nai wiliwili ni nodra veiyavusa na luve i Jekope, o koya ka yaco vua na vosa i Jiova, ka kaya, Ena vakatokai na yacamu ko Isireli; 32 a sa cakava ko koya nai cabocabo-ni-soro e na yaca i Jiova e na veivatu ko ya: a sa kelia e dua nai keli me volita nai cabocabo-ni-soro, a ya sa rauta e lima na kaloni ni sila. 33 A sa virikotora na buka, ka ta-musumusuka na karavau, ka vakotora e dela ni buka, 34 a sa kaya, Dou vakasinaita e va na saqa e na wai, ka sovara ki nai soro kama, kei na buka. A sa kaya, Dou vakaruataka: a ra sa vakaruataka. A sa kaya ko koya, Dou vakatolutaka: a ra sa vakatolutaka. 35 A sa dave vakavolivolita nai cabocabo-ni-soro na wai; a sa vakasinaiti talega nai keli e na wai. 36 Ia e na gau-ni-siga sa daucabori kina nai soro, sa toro kina ko Ilija na parofita, ka kaya, I Jiova na Kalou i Eparaama, ko Aisake, kei Isireli, me kilai mada edaidai ni ko sa Kalou e Isireli, niʼu sa nomu tamata talega koi au, ka sa nomu vosa kaʼu sa cakava kina na ka kecega o qo: 37 mo rogoci au, i Jiova, mo rogoci au; me ra kila na tamata o qo ni sa Kalou ko iko, Jiova, ia mo saumaka tale na yalodra. 38 Sa qai lutu sobu mai na buka waqa i Jiova, ka kania nai soro kama, kei na buka, kei na vatu, kei na kuvu-ni-qele, ka dramica na wai e nai keli. 39 Ia ni ra sa raica na tamata kecega, era sa bale vakatobocu; a ra sa kaya, Ko Jiova ga na Kalou; ko Jiova ga na Kalou. 40 A sa kaya vei ira ko Ilija, Dou tauri ira na parofita i Peali, me kakua ni dro bula e dua vei ira. A ra sa tauri ira; a sa kauti ira sobu ko Ilija ki na uciwai ko Kisoni, ka vakamatei ira maikea. 41 A sa kaya vei Eapi ko Ilija, Mo lako cake; mo kana ka gunu; ni sa dua na domo ni uca levu. 42 A sa lako cake ko Eapi me kana ka gunu: a sa lako cake ki na dela i Karimeli ko Ilija; a sa bale ki na qele, ka vakacuva na matana ki na tadrua ni duruna, 43 a sa kaya ki na nona cauravou, Mo lako cake mada, mo rai kivaka ki na Wasawasa. A sa lako cake ko koya, ka rai voli, a sa kaya, Sa sega na ka. A sa kaya ko koya, Mo lako tale ka vakavitu. 44 Ia e na kenai kavitu, sa kaya ko koya, Raica, sa lako cake e dua na o lailai mai na Wasawasa, a ya sa tauvata kei na liga ni tamata. A sa kaya ko koya, Mo lako cake, mo kaya vei Eapi, Mo cokonaka na nomu vale-vodoki, ka lako sobu, de tarovi iko na uca. 45 A sa loaloa mai na mata ni lomalagi, e na veiyasana kecega, e na o kei na cagi, a sa tau na uca levu. A sa vodo lako ko Eapi, ka lako ki Isirieli. 46 A sa tiko kei Ilija na liga i Jiova; a sa vauca ko koya na tolona, ka cici ka liutaki Eapi ki nai bili mai Isirieli. |
First full Bible in the Fijian language © British and Foreign Bible Society, 1864.
British & Foreign Bible Society