1 Tui 1 - AI VOLA TABU

A WASE I. —Sa qase sara ko Ta cila, 1-4. Sa kailavaki me tui ko Etoniya, a sa lewa ko Tavita me tui ko Solomoni, 5-53.

¹ A SA qase mai ko Tavita na tui, sa vuqa na nona yabaki; a sa ubi e nai tutuvi, a sa sega vua na katakata.

² A sa kaya vua ko ira era sa qaravi koya, Me qarai mada vei iko na noqu turaga na tui e dua na cauravou, sa gonealewa: ia me tu ga e matana na tui, ka me vakaraici iko, ka koto e na lomaseremu; me katakata kina na noqu turaga na tui.

³ A ra sa qara e dua na gonealewa matavinaka e na veiyasana kecega nei Isireli, a ra sa kunei Episaki, e dua na kai Sunemi, a ra sa kauti koya vua na tui.

⁴ A sa matavinaka sara na gonealewa, a sa vakaraica na tui, ka dauqaravi koya: a sa sega ni veikilaki kaya ko na tui.

⁵ Sa qai vakalevulevui koya ko Etoniya na luve i Akici, ka kaya, Au na tui koi au: a sa vakarautaka me nona e so na vale-vodoki, kei na tamata e so era dauvodo lako e na ose, kei na tamata e lewe limasagavulu me ra daucici me liutaki koya.

⁶ A sa sega ni vunauci koya eliu ko tamana e na dua na siga, me kaya, A cava ko sa kitaka vakaoqo kina? A sa matavinaka sara ko koya talega; a sa sucu eliu ko Episalomi, a sa muri ko koya.

⁷ A ratou sa veivosaki ko koya kei Yoapi na luve i Siruya, kei Epiyacari na bete; a rau sa muri Etoniya, ka vukei koya.

⁸ Ia ko Satoki na bete, kei Pinaya na luve i Yioyata, kei Nacani na parofita, kei Simi, kei Rei, kei ira na tamata kaukauwa nei Tavita, era sa sega ni vata kei Etoniya.

⁹ A sa vakamatea ko Etoniya e so na sipi, kei na karavau, kei na manumanu uro, mai na vatu ko Soeleci, a ya sa voleka ki Eni-rokeli, a sa kacivi iratou kecega na tuakana kei na tacina, na luvena na tui, kei ira kecega na kai Juta era nona tamata na tui:

¹⁰ ia ka sa sega ni kacivi Nacani na parofita, kei Pinaya, kei ira na tamata kaukauwa, kei Solomoni na tacina.

¹¹ A sa vosa ko Nacani vei Paci-sepa na tina i Solomoni, ka kaya, O sa sega beka ni rogoca ni sa tui ko Etoniya na luve i Akici, ka sa sega ni kila ko Tavita na noda turaga?

¹² Ia mo lako mai, meʼu tukuna mada vei iko na ka me caka, mo vakabulai iko kina, kei Solomoni na luvemu.

¹³ Mo lako mada vua na tui ko Tavita, ka kaya vua, O a sega li ni vosavavakini, na noqu turaga na tui, vei au na nomu vada, ka kaya, Ena taravi au vakaidina ko Solomoni na luvemu me tui, ka tiko e na noqui tikotiko vakaturaga? ia ka cava e tui kina ko Etoniya?

¹⁴ Raica, ni drau sa vosa tiko maikea kei koya na tui, kaʼu na muri iko talega ka vakadinadinataka na nomu vosa.

¹⁵ A sa curu vua na tui ko Paci-sepa ki na loqi: a sa qase sara na tui; a sa qaravi koya na tui ko Episaki na kai Sunemi.

¹⁶ Asa cuva ko Paci-sepa, ka vakarokoroko vua na tui. A sa kaya na tui, A cava sa yalomu?

¹⁷ A sa kaya vua ko koya, Noqu turaga, ko a vosavavakini vei au na nomu vada e na yaca i Jiova, na nomu Kalou, ka vaka, Ena taravi au vakaidina ko Solomoni na luvemu me tui, ka na tiko e na noqui tikotiko vakaturaga.

¹⁸ Ia o qo, raica, sa tui ko Etoniya; ia o qo, noqu turaga na tui, ko sa sega ni kila:

¹⁹ a sa vakamatea ko koya e vuqa na karavau kei na manumanu uro, kei na sipi, a sa kacivi iratou kecega na luvena na tui, kei Epiyacari na bete, kei Yoapi na turaga ni valu: ia ko Solomoni na nomu tamata, sa sega ni kaciva ko koya.

²⁰ Ia ko iko, noqu turaga na tui, sa vakaraici iko tiko na matadra kecega na Isireli, mo tukuna vei ira se ko cei me tarava na noqu turaga na tui, me tiko e nonai tikotiko vakaturaga.

²¹ Ia de keirau na vaka nai valavala ca kei Solomoni na luvequ, ni sa moce vata kei ira na nona qase ko na noqu turaga na tui.

²² Ka, raica, ni sa vosa tiko ko koya vua na tui, sa curu talega ko Nacani na parofita.

²³ A sa tukuni vua na tui, ka vaka, Raica, ko Nacani na parofita. Ia sa lako ko koya ki na mata ni tui, ka vakacuva na matana ki na qele vua na tui.

²⁴ A sa kaya ko Nacani, Noqu turaga na tui, ko sa bau kaya, Ena taravi au me tui ko Etoniya, ka na tiko e na noqui tikotiko vakaturaga, ne?

²⁵ ni sa lako sobu edaidai ko koya, a sa vakamatea e vuqa na karavau, kei na manumanu uro, kei na sipi, a sa kacivi iratou kecega na luvena na tui, kei iratou na turaga ni valu, kei Epiyacari na bete; ia, raica, era sa kana ka gunu tiko e matana, ka kaya, Me bula ko Etoniya na tui.

²⁶ Ia koi au, na nomu tamata, kei Satoki na bete, kei Pinaya na luve i Yioyata, kei na nomu tamata ko Solomoni, sa sega ni kaciva ko koya.

²⁷ Sa cakava beka na ka o qo na noqu turaga na tui, ka ko sa sega ni vakatakila vei au na nomu tamata, se ko cei ena tarava na noqu turaga na tui me tiko e na nonai tikotiko vakaturaga?

²⁸ A sa vosa na tui ko Tavita, ka kaya, Dou kacivi Paci-sepa mai vei au. A sa lako mai ko koya ki na mata ni tui, a sa tu e na mata ni tui.

²⁹ A sa vosavavakini na tui, ka kaya, Me vaka na kena dina ni sa bula ko Jiova, o koya ka vakabulai au mai na ka rarawa kecega,

³⁰ me vaka kaʼu a vosavavakini vei iko e na yaca i Jiova na Kalou nei Isireli, ka kaya, Ena taravi au vakaidina na luvemu ko Solomoni me tui, ka na tiko e na noqui tikotiko vakaturaga me kequi sosomi; kaʼu na kitaka vakaidina me vakakina e na siga o qo.

³¹ A sa vakacuva ko Paci-sepa na matana ki na qele, ka vakarokoroko vua na tui, ka kaya, Me bula ga ka tawa mudu na noqu turaga ko Tavita na tui.

³² A sa kaya ko Tavita na tui, Dou kaciva mai vei au na bete ko Satoki, kei Nacani na parofita, kei Pinaya na luve i Yioyata. A ratou sa lako mai ki na matana na tui.

³³ A sa kaya na tui vei iratou, Dou kauti ira era sa qarava na nomudou turaga, ka vakavodoki Solomoni na luvequ ki na noqu asa, ka kauti koya sobu ki Kioni:

³⁴ ia me lumuti koya maikea ko Satoki na bete kei Nacani na parofita, me nodra tui na Isireli: ia dou uvuca na davui, ka kaya, Me bula na tui ko Solomoni.

³⁵ Dou na qai muri koya cake mai me mai tiko ko koya e na noqui tikotiko vakaturaga; ni na tui ko koya me kequi sosomi: ia kaʼu a lesi koya me lewai ira na Isireli kei ira na Juta.

³⁶ A sa vosa vua na tui ko Pinaya na luve i Yioyata, ka kaya, Emeni: me kaya vakakina ko Jiova na nona Kalou na noqu turaga na tui:

³⁷ me vaka ka tiko ko Jiova kei na noqu turaga na tui, me tiko vakakina ko koya kei Solomoni, ka cakava me uasivi cake na nonai tikotiko vakaturaga e na nonai tikotiko vakaturaga na noqu turaga ko Tavita na tui.

³⁸ A ra sa lako sobu ko Satoki na bete, kei Nacani na parofita, kei Pinaya na luve i Yioyata, kei ira na Kireci, kei ira na Pileci, a ra sa vakavodoki Solomoni ki na asa i Tavita na tui, ka kauti koya ki Kioni.

³⁹ A sa kauta ko Satoki na bete na tavaya waiwai mai na Vale gatu, ka lumuti Solomoni. A ra sa Uvuca na davui; a ra sa kaya kecega na tamata, Me bula na tui ko Solomoni.

⁴⁰ A ra sa muri koya cake na tamata kecega, a sa uvuca na bitu-ni-vakatagi ko ira na tamata, ka reki e na rereki levu, a sa kavida na vanua e domodra.

⁴¹ A sa rogoca ko Etoniya kei ira kece era sa kacivi mo tiko kaya, ni ra sa kana oti. Ia ni sa rogoca ko Yoapi na domo ni davui, sa kaya, Mei cavai na ue sa rogo e na koro?

⁴² Ni sa vosa tiko ko koya, raica, sa lako mai ko Jonacani na luve i Epiyacari na bete: a sa kaya ko Etoniya, Mo curu mai; ni sa tamata qaqa ko iko, a sa kauta mai nai rogo vinaka.

⁴³ A sa vosa vei Etoniya ko Jonacani, ka kaya, Sa cakavi Solomoni vakaidina me tui ko Tavita na noda turaga na tui:

⁴⁴ a sa tala kaya ko na tui na bete ko Satoki, kei Nacani na parofita, kei Pinaya na luve i Yioyata, kei ira na Kireci, kei ira na Pileci, a ra sa vakavodoki koya ki na nona asa na tui:

⁴⁵ a rau sa lumuti koya mai Kioni me tui, koi rau ko Satoki na bete kei Nacani na parofita: a ra sa lako cake maikea ka reki lako, a sa ue kina na koro: o qo na rorogo dou a rogoca:

⁴⁶ a sa tiko talega ko Solomoni e nai tikotiko ni matanitu:

⁴⁷ a ra sa lako tale na tamata sa dauqarava na tui, me vosavakalougatataka na noda turaga ko Tavita na tui, a ra sa kaya, Me cakava ko na nomu Kalou na yaca i Solomoni me vinaka cake e na yacamu, ka cakava me uasivi cake na nonai tikotiko vakaturaga e na nomui tikotiko vakaturaga: a sa cuva ko koya na tui e nonai mocemoce:

⁴⁸ a sa kaya vakaoqo talega na tui, Me vakavinavinakataki ko Jiova na Kalou nei Isireli, o koya sa solia e dua edaidai me tiko e na noqui tikotiko vakaturaga, ni sa raica tiko na mataqu.

⁴⁹ A ra sa rere ko ira kecega na tamata sa kacivi, era sa tiko kei Etoniya, a ra sa tu cake, ka dui lako na tamata e nonai lakolako.

⁵⁰ A sa rere ko Etoniya e na vuku i Solomoni, ka tu cake, ka laʼki taura na veitikina sa tu cake e nai cabocabo-ni-soro.

⁵¹ A sa tukuni vei Solomoni, ka vaka, Raica, sa rerevaki Solomoni na tui ko Etoniya: ka, raica, sa taura na veitikina sa tu cake e nai cabocabo-ni-soro, a sa kaya, Me vosavavakini vei au edaidai ko Solomoni na tui, ni na sega ni vakamatea na nona tamata e nai seleiwau.

⁵² A sa kaya ko Solomoni, Kevaka sa tamata yaga ko koya, ena sega e dua na drau ni uluna me lutu ki na qele: ia kevaka sa kune vua na ca, ena mate.

⁵³ A sa talaki ko Solomoni na tui, a ra sa kauti koya sobu mai nai cabocabo-ni-soro. A sa lako mai ko koya ka cuva vei Solomoni na tui: a sa kaya vua ko Solomoni, Mo lako ki na nomu vale.