1 Timoci 5 - AI VOLA TABU

Sa vakavulici Timoci ko koya me kakua ni vunauci ira vakailoa na tamata, 1, 2. Sa qai tukuni ira na yada, kei ira nai talatala qase, 3-25.

¹ KAKUA ni vunauca vakaukauwa na qase, ia mo vakarota vakamalua ga me vaka vua na tamamu; vei ira na cauravou me vaka vei ira na tacimu;

² vei ira na yalewa qase, me vaka vua na tinamu; vei ira na gonealewa, me vaka vei ira ua ganemu, e na yalosavasava sara.

³ Vakaraici ira na yada era sa yada dina.

⁴ Ia kevaka sa dua na yada ka so na luvena se na makubuna, me ra vakatavulici mada ko ira o qo me ra kitaka nai valavala dodonu mai nodratou, me ra sauma vinaka na nodra loloma na nodra qase: ni sa dodonu o qo ka vinaka vua na Kalou.

⁵ Ia na yada dina, o koya sa sega na wekana, sa vakararavi tiko ki na Kalou, a sa dauia tiko na veimasulaki kei na kerekere e na bogi kei na siga.

⁶ Ia ko koya sa dauguta na marau, sa mate ga ni sa bula lako.

⁷ Ia mo dauvakarota na veika o qo, me ra tawa cala kina.

⁸ Ia kevaka e dua sa sega ni vakaraici ira na kai nona, ka ia vakalevu vei ira na nona lewe-ni-vale, sa cakitaka na vakabauta, ka sa uasivi sobu e na ca vei koya sa tawa lotu.

⁹ Me kakua e dua na yada me digitaki sa tawa onosagavulu na nona yabaki, ka sa dua bauga na watina eliu,

¹⁰ me rogo e na vuku ni valavala vinaka; kevaka sa qaravi ira na gone, kevaka sa dauvakacegui ira na vulagi, kevaka sa vuya na yavadra era sa lotu, kevaka sa vukei ira era sa vakararawataki, kevaka sa gumatua ni daucakava na cakacaka vinaka kecega.

¹¹ Ia ko ira ga na yada vakavoki mo vakasuka: ni ra sa dau via vakawati, ni ra sa mai daugarova na marau, ka sega ko Karisito:

¹² a ra sa cudruvi, ni ra sa biuta na ka era sa vakabauta eliu.

¹³ A ra sa yaco talega me ra vucesa, a ra sa veilakoyaki ki na veivale; a ra sa sega ni vucesa walega, era sa dautalanoa wale talega, ka makutu vakatani, a ra sa daukaya na ka e tawa kili.

¹⁴ O koya o qo kaʼu sa vinakata kina me ra vakawati ko ira o qori sa vakavoki, me ra vakasucu gone, me ra lewa na vale, me ra kakua ni kitaka e dua na ka me vosa vakasewasewani kina ko na meca.

¹⁵ Ni sa lesu tani e so me ra muri Satani.

¹⁶ Kevaka sa dua na tagane se na yalewa sa vakabauta a sa nona e so na yada, me vukei ira ko koya, ka me kakua ni vakabibi nai vavakoso lewe ni soro: me vukei ira kina era sa yada dina ko ira o qori.

¹⁷ O ira na qase era sa lewa vinaka me ra vakarokorokotaki vakalevu, ia ka levu sara ko ira sa daucakacaka e na vosa kei nai vakavuvuli:

¹⁸ ni sa kaya nai Vola, Mo kakua ni vauca na gusu ni karavau, ni sa buturaki sila. Ia, Sa dodonu me soli vua na tamata daucakacaka na kenai voli.

¹⁹ Mo kakua ni vakabauta e dua sa beitaka na qase, kevaka e sega ni lewe rua se lewe tolu era sa vakadinadina.

²⁰ O ira sa valavala ca, vunauca ena matadra na tamata kecega, me rere kina ko ira na tani.

²¹ Au sa vakarota e na mata ni Kalou kei na mata ni Turaga ko Jisu Karisito, kei na matadra na agilose digitaki, mo muria na veika o qo ka kakua ni vinakata e dua ka cata e dua, ka kakua sara ni cakacaka e na digitaka walega e dua.

²² Kakua ni tabaka vakasauri e dua e na ligamu; mo kakua ni cudruvi e na vuku ni nodrai valavala ca na tamata tani: maroroi iko mo savasava tiko.

²³ Kakua ni gunu wai dranu tikoga, ia mo gunuva vakalailai na waini e na vuku ni ketemu, kei na malumalumu sa dautauvi iko.

²⁴ Na nodrai valavala ca na tamata e so sa votu ga eliu, a ra sa lako eliu me cudruvi; ia na nodra na tamata e so sa muri mai.

²⁵ Sa vaka talega kina nai valavala vinaka sa votu ga eliu; ia ko ira e sega sa tawa tabonaki rawa.