1 Timoci 4 - AI VOLA TABU

Sa tukuna ko koya ni na so era na biuta na lotu dina, 1-5. A sa vakarota vei Timoci me dautukuna na ka dina, ka me gumatua sara e na wili vola, ka me dauvakatavuvuli, 6-16.

¹ IA sa tukuna vakamacala na Yalo ni na vuki tani e so mai na vakabauta e na gauna emuri, ni ra vakarogoca e so na yalo e dauveivakacalai kei na nodrai vakavuvuli na tevoro;

² e na nodra dauveivakaisini era sa vosa lasu, me vaka sa tavuni na nodra lewa-eloma e na kaukamea katakata;

³ era sa dautarova na ia na vakawati, a ra sa vakatabuya na kakana e so, sa cakava ko na Kalou me ra kania ka vakavinavinaka kina ko ira sa vakabauta ka kila nai vakavuvuli dina.

⁴ Ni sa vinaka na ka kecega sa cakava ko na Kalou, a sa sega na ka me beci, kevaka sa ia na vakavinavinaka ni sa tauri;

⁵ ni sa vakasavasavataki e na vosa ni Kalou kei na masu.

⁶ Kevaka ko sa talaucaka na veika o qo vei ira na veiwekani, o na qai talatala vinaka nei Jisu Karisito, ni ko sa vakatuburi cake e na vakabauta kei nai vakavuvuli vinaka ko ya ko sa yaco kina.

⁷ Ia mo biuta sara na vosa sa tabu ka lialia, ia mo dauvakaogai iko ki na lotu.

⁸ Ni sa yaga vakalailai ga na ogaoga vakayago: ia na lotu sa yaga e na ka kecega, ni sa yalataki kina na ka ni bula o qo, kei na ka ni bula talega ena muri mai.

⁹ Sa dina na vosa, a sa yaga me vakabauti vakalevu.

¹⁰ Ni sai koya ga o qo keitou sa daucakacaka kina ka vakalialiai, ni keitou sa vakararavi e na Kalou bula, nai Vakabula ni tamata kecega, a sa nodra dina sara era sa vakabauta.

¹¹ A veika o qo mo vakarota ka vakatavulica.

¹² Me kakua ni beci iko e dua ni ko sa cauravou; ia mo yaco mo nodrai vakarau era sa vakabauta, e na vosa, e nai valavala, e na loloma, e na vakayalo, e na lomadina, e na yalosavasava.

¹³ Mo gumatua e na wili vola, e na dauveivakaroti, e nai vakavuvuli, ka yacova na noqu lako yani.

¹⁴ Kakua ni biuta wale nai solisoli sa tu vei iko, o koya ka soli vei iko e na vosa vakayalo, kei na virikotora na ligadra nai talatala qase.

¹⁵ Mo dauvakananuma na veika o qo; me ra rawai iko sara; me rairai kina ni ko sa vuku cake mai e na ka kecega.

¹⁶ Vakaraici iko vinaka, kei nai vakavuvuli; tu dei kina: ni ko sa kitaka vakaoqo ko na vakabulai iko, kei ira talega era sa rogoci iko.