1 Timoci 3 - AI VOLA TABU

Sa tukuna ko koya nai valavala e kilikili kei ira nai talatala qase kei nai talatala lalai, 1-13. Sa vakaroti Timoci vakakina, ka tukuna nai vakavuvuli dina, 14-16.

¹ SA dina na vosa, Kevaka e dua sa gadreva na cakacaka ni talatala qase, sa gadreva na cakacaka vinaka.

² Ia ka sa kilikili kaya nai talatala qase me tawa cala, me dua bauga na watina, me yalomamakutu, me yalomatua, mei valavala dodonu, me daulomasoli, me vakatavuvuli vakavuku:

³ me kakua ni daugunu waini, me kakua ni dauveivala, me kakua ni daugarova nai yau vakasisila; me yalomalua, me kakua ni daucudrucudru, me kakua ni daukocokoco;

⁴ me lewai ira vinaka na nona lewe-ni-vale, ka me talairawarawa ko ira na luvena ka ia nai valavala sa kilikili; (

⁵ ia kevaka sa dua na tamata sa sega ni lewai ira rawa na nona lewe-ni-vale, ena vakaraica vakaevei nai vavakoso lewe ni soro ni Kalou?)

⁶ mo kakua e dua sa qai lotu, de viavialevu, ka cudruvi kina me vaka na tevoro.

⁷ A sa dodonu talega me rogorogo vinaka vei ira etaudaku; de bale ki na ka ena vosavakacacataki kina, kei nai cori ni tevoro.

⁸ Me yaloqaseqase ko ira talega nai talatala lalai, me ra kakua ni veivakaisini e na vosa, me ra kakua ni guta vakalevu na waini, me ra kakua ni daugarova nai yau vakasisila;

⁹ me ra taura matua nai vakavuvuli ka vuni eliu era sa qai vakabauta, e na lewa-eloma vinaka.

¹⁰ Ia me ra vakatovolei mada eliu ko ira talega o qo; me ra qai yaco mei talatala lalai ni ra sa tawa cala.

¹¹ Me yaloqaseqase ko ira talega na yalewa, me ra kakua ni daukakase, me ra yalomatua, ka lomadina e na ka kecega.

¹² Me sa yadua ga na watidra nai talatala lalai, ia me ra lewai ira vinaka na luvedra, kei na nodra lewe-ni-vale.

¹³ Ia ko ira era sa kitaka vinaka na cakacaka ni talatala lailai, era sa rawata kina me ra tubu cake, a ra sa doudou talega me tukuna na vakabauti Karisito Jisu.

¹⁴ A veika o qo kaʼu sa vola vei iko, ia kaʼu sa vakanuinui meʼu lako kusarawa vei iko:

¹⁵ ia kevaka kaʼu sa dede, mo kila nai valavala sa kilikili kei iko mo kitaka e na vale ni Kalou, o qori nai vavakoso lewe ni soro ni Kalou bula, na duru kei na yavu ni vakavuvuli dina.

¹⁶ Ia na ka o qo sa tawa veiletitaki ni sa ka levu na ka ni Kalou ka vuni tu eliu: Sa rairai vakatamata na Kalou, sa vakadinadina na Yalo vei koya, sa raici koya na agilose e so, sa vunautaki ko koya vei ira na veimatanitu, sa vakabauti koya e so na kai vuravura, sa kau cake ki na vanua vakaiukuuku.