1 Timoci 1 - AI VOLA TABU

A WASE I. —Sa loloma yani vei Timoci ko Paula, a sa tukuna na ka sa laivi koya kina mai Efeso, 1-4. Sa tukuna na ka sa yaga kina na vunau i Mosese, 5-11. Sa tukuni koya ko Paula, 12-17. Sa vakarota vei Timoci, a sa tukuni Imeneo kei Alekisadro, 18-20.

¹ O PAULA, nai apositolo i Jisu Karisito, me vaka na vosa ni Kalou na nodai Vakabula, kei na Turaga ko Jisu Karisito na vu ni nodai nuinui;

² vei Timoci, na luvequ dina e na vakabauta: Me sa mai vua na Kalou ko Tamada, kei na noda Turaga ko Karisito Jisu, na loloma, na yalololoma, na vakacegu.

³ Me vaka kaʼu a masuti iko me tiko ga mai Efeso, niʼu a lako ki Masitonia, mo vakarota kina vei ira e so me ra kakua ni vakatavulica nai vakavuvuli tani,

⁴ me ra kakua talega ni dinata nai tukutuku wale kei nai vola ni kawa tawa mudu, sa tubu kina na veileti, ka sega ga na veivakatataki cake e na ka ni Kalou, a ya sa yaco e na vakabauta.

⁵ Ia na ka sa nakiti e na vunau na loloma mai na yalosavasava, kei na lewa-eloma vinaka, kei na vakabauta tawa vakailasu;

⁶ a sa cala maikina ko ira e so, ka sa lesu tani me ra ia na veileti w alega;

⁷ a ra sa gadreva me ra vu-ni-vunau: a ra sa sega ni kila na ka era sa dautukuna, se na ka era sa dau vakadinadina kina.

⁸ Ia eda sa kila ni sa ka vinaka na vunau, kevaka sa ia me vaka na kenai valavala:

⁹ ni da sa kila sa sega ni bale na vunau vei ira na tamata yalododonu, vei ira ga era sa tawa muria na vunau, ka sa dautalaidredre, vei ira era sa tawa lotu, a ra sa dauvalavala ca, vei ira era tawa yalosavasava, a ra sa vakasisila ga; vei ira era sa labata na tamadra, a ra sa labata na tinadra, a ra sa dauveiraravui,

¹⁰ vei ira era sa daudara, vei ira era sa veimoceri vakatagane, vei ira era sa daubutakoca na tamata, vei ira era sa daulasu, vei ira era sa daububului vakailasu, kei na ka kecega sa vo sa sega ni vaka nai vakavuvuli vinaka:

¹¹ me vaka nai tukutuku-vinaka vakaidina nei koya na Kalou mamarau, kaʼu sa lesi kina meʼu vunautaka.

¹² Ia kaʼu sa vakavinavinaka vei Karisito Jisu na noda Turaga, o koya sa vakaukauwataki au, ni sa vakasami au niʼu sa lomadina, a sa lesi au ki na cakacaka vakaitalatala;

¹³ oi au eliu na dauvosavakacaca, kei na dauvakacaca, kei na dauveivakasewasewani: ia kaʼu sa lomani, e na vuku niʼu a kitaka e na lialia kei na tawa vakabauta,

¹⁴ ia ka uasivi cake sara na loloma ni noda Turaga, kaʼu a vakabauti Karisito Jisu kina ka lomana.

¹⁵ Sa dina na vosa, a sa yaga me vakabauti vakalevu, ni sa lako mai ki vuravura ko Karisito Jisu me vakabulai ira na tamatai valavala ca; ia koi au, kaʼu sa uasivi cake vei ira.

¹⁶ Ia e na vuku ga ni ka o qo kaʼu a lomani kina, me vakaraitaka ko Jisu Karisito vei au sa uasivi cake na vosota vakalevu sara, meʼui vakarau vei ira era na vakabauti koya emuri me ra bula tawa mudu kina.

¹⁷ Ia, vua na Tui tawa tubu, sa tawa mate rawa, sa tawa rairai, a Kalou vuku duaduaga, me ia na vakarokoroko kei na doka ka tawa mudu. Emeni.

¹⁸ Ai vakaro o qo kaʼu sa solia vei iko, na luvequ Timoci, me vaka na vosa vakayalo ko a tukuni kina eliu, mo ia kina na veivala vinaka;

¹⁹ mo taura matua na vakabauta, kei na lewa-eloma vinaka: o qori era sa biuta e so, a sa kasa kina na nodra vakabauta ka mate:

²⁰ sa vakaoqo ko Imeneo kei Alekisadro, koi rau kaʼu sa solia vei Satani, me rau kila kina me rau kakua ni dauvosavakacaca.