1 Samuela 8 - AI VOLA TABU

Erau sa tamata ca na luve i Samueli, a sa kerea kina ko ira na Isireli me ra vakatui, 1-5. Sa masu ki na Kalou ko Samueli, a sa kaya na. Kalou me rogoci ira na tamata e na ka ko ya, 6-9. Sa tukuna ko Samueli vei ira na tamata nai valavala ni tui, 10-18. A ra sa gata ga na tui ko ira na tamata, 19-22.

¹ IA ni sa qase ko Samueli, sa lesi rau na luvena mo rau dauveilewai vei ira na Isireli.

² Ia na yaca ni nona ulumatua ko Joeli; kei na yacana na kenai karua ko Epia: sa dauveilewai koi rau mai Pieri-sepa.

³ A sa sega ni muria na nonai valavala koi rau na luvena, a rau sa vuki me muria na yau, ka taura nai solisoli me rau lewa vakatani, a rau sa vakatanitaka na lewa.

⁴ A ra sa soqo vata ko ira kecega na qase nei Isireli, a ra sa lako mai vei Samueli ki Rama,

⁵ a ra sa kaya vua, Raica, ko sa qase mai, ia na luvemu, erau sa sega ni muria na nomui valavala: mo lesia mada vei keda e dua na tui me lewai keda me vakai ira na veimatanitu kecega.

⁶ A sa ca na ka o qo e na mata i Samueli, ni ra sa kaya, Solia vei keda e dua na tui me lewai keda. A sa masu vei Jiova ko Samueli.

⁷ A sa kaya ko Jiova vei Samueli, Mo vakarorogo ki na domodra na tamata e na ka kecega era sa kaya vei iko: ni sa sega ni ko iko era sa beca, sa koi au ga era sa beca, meʼu kakua ni nodra tui.

⁸ Me vaka na cakacaka kecega era sa cakava mai na siga kaʼu a kauti ira cake mai kina mai Ijipita ka yacova na siga o qo, ni ra sa i laivi au ka qarava na veikalou tani, era sa cakacaka vakakina vei iko talega.

⁹ Ia o qo, mo vakarorogo ki na domodra; ia mo tukuna vakaidina ga vei ira, ka vakatakila vei ira na nonai valavala na tui ena lewai ira.

¹⁰ A sa tukuna kecega na vosa i Jiova ko Samueli vei ira na tamata era masuta vua me dua na tui.

¹¹ A sa kaya ko koya, O qo na nonai valavala na tui ena lewai kemudou: Ena kauti ira na luvemudou ko koya, ka lesia vei koya, ki na nona vale-vodoki, ka me nona tamata me ra vodoka na ose; ka so me ra cici ka liutaka na nona vale-vodoki.

¹² Ia ena lesia e so vei koya me ra turaga ni tauyaudolu, ka turaga ni tauyalimasagavulu; ka me cukita na nona veiwere e nai sivi yara, me tamusuka talega na nona sila, ka tulia na nonai yaya ni valu, kei nai yaya ni nona vale-vodoki.

¹³ Ia ena kauti ira ko koya na nomudou gonealewa me caka kakana kamikamica, me ra dauvakasasaqa talega, ka dauvavavi.

¹⁴ Ia ena kauta talega ko koya na nomudou veiwere, kei na nomudou veivaini, kei na nomudou veiolive, io na kena e vinaka, kei na solia vei ira na nona tamata.

¹⁵ Ia ena kauta na kenai katini ni nomudou sore ni kau, kei na nomudou veivaini, ka solia vei ira na nona matanivanua, kei ira na nona tamata.

¹⁶ Ia ena kauti ira talega na nomudou tamata, kei ira na nomudou vada, kei ira na nomudou cauravou vinaka, kei na nomudou veiasa, me ra kitaka na nona cakacaka.

¹⁷ Ena kauta ko koya nai katini ni nomudou sipi, ia koi kemudou, dou na nona tamata.

¹⁸ Dou na qai qoqolou e na siga ko ya e na vuku ni nomudou tui dou sa digitaka oti me nomudou; ena qai sega ni rogoci kemudou ko Jiova e na siga ko ya.

¹⁹ A ra sa bese ga na tamata ni vakarogoca na domo i Samueli; a ra sa kaya, E segai; keimami na vakatui ga:

²⁰ me vakai ira na veimatanitu kecega koi keimami talega; me lewai keda na neimami tui, ka liutaki keimami, ka laʼki kitaka na neimami valu.

²¹ A sa rogoca kecega ko Samueli na nodra vosa na tamata, a sa laʼki cavuta e na daliga i Jiova.

²² A sa kaya ko Jiova vei Samueli, Mo vakarorogo ki na domodra, ka qisia vei ira e dua na tui. A sa kaya ko Samueli vei ira na Isireli, Dou lako na tamata yadua ki na nona koro.