1 Samuela 7 - AI VOLA TABU

Sa kau na kato ki na vale i Epinatapi mai Kiriaci-yiarimi, 1, 2. Sa vunauci ira na tamata ko Samueli, a ra sa veivutuni kina, 3-6. Era sa mai vala na kai Filisitia, a sa gumatua ko ira na Isireli ni sa sorovaki ira ko Samueli, 7-12. Era sa malumalumu na kai Filisitia, 13, 14. A lewa i Samueli, 15-17.

¹ A RA sa lako mai na kai Kiriaci-yiarimi, ka kauta cake na kato i Jiova, ka kauta ki na vale i Epinatapi mai Kipia, a ra sa qisi Eliasari na luvena me qarava na kato i Jiova.

² Ia ka sa dede ni sa tiko mai Kiriaci-yiarimi na kato; ia sa ruasagavulu na yabaki. IA sa tagicaki Jiova ko ira kecega na mataqali nei Isireli.

³ A sa vosa ko Samueli vei ira kecega na mataqali nei Isireli, ka kaya, Kevaka dou sa saumaki vei Jiova e na yalomudou taucoko, dou biuta na nodra kalou na kai tani kei Aseteroci mai na kemudou maliwa, ka vakarautaka na yalomudou vei Jiova, ka qaravi koya duaduaga; ena qai vakabulai kemudou ko koya mai na ligadra na kai Filisitia.

⁴ Era sa qai biuti ira tani na Peali, kei na Aseteroci, ko ira na luve i Isireli, a ra sa qaravi Jiova duaduaga.

⁵ A sa kaya ko Samueli, Dou vakasoqoni ira vata na Isireli kecega ki Misipa, ia kaʼu na masulaki kemudou vei Jiova.

⁶ A ra sa soqo vata ki Misipa, a ra sa taki wai mai, ka sovara e na mata i Jiova, ka lolo e na siga ko ya, a ra sa kaya maikea, Eda sa valavala ca vei Jiova. A sa lewai ira na luve i Isireli ko Samueli mai Misipa.

⁷ Ia ni ra sa rogoca na kai Filisitia ni sa soqo vata mai Misipa ko ira na luve i Isireli, era sa lako cake ko ira na nodra turaga na kai Filisitia me veivala kei ira na Isireli. A sa rogoca ko ira na luve i Isireli, a ra sa rerevaki ira na kai Filisitia.

⁸ A sa kaya vei Samueli ko ira na luve i Isireli, Mo kakua ni cegu ni tagi vei Jiova na noda Kalou e na vukuda, me vakabulai keda mai na ligadra na kai Filisitia.

⁹ A sa kauta ko Samueli e dua na lami sa sucu tiko, a sa cabora taucoko mei soro kama vei Jiova: a sa tagi ko Samueli vei Jiova e na vukudra na Isireli; a sa vakarorogo vua ko Jiova.

¹⁰ Ia ni sa cabora tiko nai soro kama ko Samueli, era sa toro mai na kai Filisitia me kitaka nai valu vei ira na Isireli; a sa kitaka na kurukuru vakadomoilevu vei ira na kai Filisitia ko Jiova e na siga ko ya, ka vakubutaki ira; a ra sa moku e matadra na Isireli.

¹¹ A sa lako yani e Misipa ko ira na tamata Isireli, ka cicivi ira na kai Filisitia, ka yaviti ira ka yaco ki na ruku i Peci-kari.

¹² A sa taura e dua na vatu ko Samueli, ka viritaka e na maliwa i Misipa kei Seni, ka vakatoka na yacana ko Epeni-eseri [Na vatu ni veivuke], ni sa kaya, Sa vukei keda mai kike ko Jiova.

¹³ A ra sa malumalumu sobu na kai Filisitia, ka sega ni lako tale mai ki nai yalayala nei Isireli: a sa veivala kei ira na kai Filisitia na liga i Jiova e na veisiga kecega i Samueli.

¹⁴ Ia sa vakasukai mai kivei ira na Isireli na veikoro, era a kovea maivei ira na Isireli ko ira na kai Filisitia, mai Ekironi ka yaco ki Kaca; na kedra veiyasana talega sa roqota tale ko ira na Isireli mai na ligadra na kai Filisitia. A sa sautu ko ira na Isireli kei ira na luve i Amori.

¹⁵ A sa lewai ira na Isireli ko Samueli e na veisiga kecega ka bula kina.

¹⁶ Asa lako voli e na veiyabaki ki Peceli, kei Kilikali, kei Misipa, a sa lewai ira na Isireli e na yasana kecega o qori.

¹⁷ A sa daulesu mai ki Kama; ni sa tiko maikina na nona vale; a sa lewai ira na Isireli maikina ko koya; a sa tara maikina e dua nai cabocabo-ni-soro vei Jiova.