1 Samuela 6 - AI VOLA TABU

Era sa bose na kai Filisitia me kauti tale ki na nona vanua na kato ni Kalou, 1-9. Sa kauta na kato ki Peci-semesi e rua na karavau, 10-18. Sa yaviti ira na kai Peci-semesi ko Jiova; a ra sa talaki ki Kiriaci-yiarimi, me kauti tani tei ira na kato ni Kalou, 19-21.

¹ A SA tiko na kato i Jiova e na nodra vanua na kai Filisitia ka vula vitu.

² Ia era sa kacivi ira na bete kei ira na rairai ko ira na kai Filisitia, ka kaya, A cava na ka me da cakava ki na kato i Jiova? dou vakatakila vei keitou se keitou na vakauta vakaevei ki na nona tikina.

³ A ra sa kaya, Kevaka dou sa vakauta yani na kato ni Kalou nei Isireli, dou kakua ni vakauta wale; ia dou vakasuka sara vua e dua nai soro ni caka cala: dou na qai vakabulai, ia ena qai kilai vei kemudou se na vuku ni cava sa sega ni lako tani kina vei kemudou na ligana.

⁴ A ra sa kaya, A cava na ka mei soro ni caka cala me keitou vakauta yani vua? A ra sa kaya, E lima na somunadara koula, ka lima na kalavo koula, me vaka na kedratoui wili na nodra turaga na kai Filisitia: ni sa dua ga na mate sa tauvi ira kecega kei iratou na nomudou turaga.

⁵ Ia dou qai cakava e so nai vakatakarakara ni nomudou somunadara, ka so nai vakatakarakara ni nomudou veikalavo sa vakacacana na vanua; ia dou vakarokorokotaka na Kalou nei Isireli: ena qai vakamama-dataka beka ko koya na ligana vei kemudou, kei ira na nomudou kalou, kei na nomudou vanua.

⁶ Ia a cava dou sa vakaukauwataka kina na yalomudou, me vaka era a vakaukauwataka na yalodra na kai Ijipita kei Fero? ni sa caka mana oti ko koya vei ira, cia sa sega li ni talai ira yani, a ra sa lako kina?

⁷ Ia o qo ga, mo dou ia ka cakava e dua na vale-vakayavana vou, ka kauta e rua na karavau alewa sa vakawai-ni-sucu, sa sega ni veiyarataki oti, ia dou vauci rau na karavau alewa ki na vale-vakayavana, ka kauta tani ki vale na luvedrau me rau kakua ni muri rau:

⁸ ka kauta na kato i Jiova, ka vakavodoka ki na vale-vakayavana; ia nai yaya koula dou sa vakauta vua mei soro ni caka cala, dou tugana ki na dua na kato lailai me tu e na kena yasana; ia dou qai vakatala yani me lako:

⁹ ia mo dou rai voli: kevaka sa lako cake e na sala ki na nonai yalayala ki Peci-semesi, sa qai koya ga ka cakava vei keda na ka ca levu o qo: ia kevaka e segai, eda na qai kila ni sa sega ni ligana ka yaviti keda: a ka ga sa yaco walega vei keda.

¹⁰ A ra sa cakacaka vakakina ko ira na tamata; a ra sa kauta e rua na karavau alewa sa vakawai-ni-sucu, a ra sa nokati rau ki na vale-vakayavana, ka sogota na luvedrau ki vale:

¹¹ a ra sa vakavodoka na kato i Jiova ki na vale-vakayavana, kei na kato lailai sa tu kina na veikalavo koula kei na veivakatakara-kara ni nodra somunadara.

¹² Ia erau sa lako vakadodonu na karavau alewa, e na sala me vaka ki na sala sa lako ki Peci-semesi, a rau sa lako yani e na salatu, a rau sa tagi lako ga, ka sega ni lesu ki nai matau se nai mawi; ia sa muri rau ko iratou na nodra turaga na kai Filisitia, ka yacova nai yalayala ni Peci-semesi.

¹³ Ia era sa tamusuki witi tiko e na buca ko ira na kai Peci-semesi, a sa ta cake na matadra ka raica na kato, ka reki ni ra sa raica.

¹⁴ A sa lako mai na vale-vakayavana ki na were i Josua, na kai Peci-semesi, a sa tu kina, ia sa dua maikea na vatu levu: a ra sa basia na kau ni vale-vakayavana, ka cabori rau na karavau alewa mei soro kama vei Jiova.

¹⁵ Ia sa ko ira na Levi era a laveta sobu na kato i Jiova, kei na kato lailai sa e lomana, sa tu kina nai yaya koula, ka viria ki na dela ni vatu levu: ia sa cabora e so nai soro kama ko ira na kai Peci-semesi, ka vakamatea e so nai soro vei Jiova e na siga ko ya.

¹⁶ Ia ni ratou sa raica na nodra turaga e lima na kai Filisitia, eratou sa lesu mai ki Ekironi e na siga ko ya.

¹⁷ Ia ko ira o qo na somunadara koula era sa solia na kai Filisitia mei soro ni caka cala vei Jiova; e dua e na vuku i Esitoti, e dua e na vuku i Kesa, e dua e na vuku i Asikiloni, e dua e na vuku i Kaca, e dua e na vuku i Ekironi;

¹⁸ kei na veikalavo koula me vaka nai wiliwili ni nodra koro kecega na kai Filisitia, a ya sa nodratou na turaga e lewe lima, io na Veikoro vakabai, kei na Veikoro lalai sa sega ni vakabai; ia sai vakadinadina, ka yacova na siga o qo, na vatu levu, era sa viritaka kina na kato i Jiova, e na were i Josua na kai Peci-semesi.

¹⁹ Asa yaviti ira na kai Peci-semesi ko Jiova, e na vuku ni ra sa rai ki na loma ni nona kato; a sa yaviti ira na tamata e lewe vitusagavulu, maivei ira na tamata e lewe lima na oba: a ra sa tagi na tamata e na vuku ni sa yavita ko Jiova na lewe vuqa maivei ira na tamata.

²⁰ A ra sa kaya na kai Peci-semesi, O cei sa rawata mo tu e na mata i Jiova na Kalou yalosavasava o qo? ia ena lako cake vei cei ko koya maivei keda?

²¹ A ra sa tala e so nai talatala vei ira na kai Kiriaci-yiarimi, a ra sa kaya, Era sa kauta tale mai na kato i Jiova ko ira na kai Filisitia; dou lako sobu mai, dou kauta cake vei kemudou.